فوتو: ۆيدەودان الىندى
10 قازان كۇنى شىمكەنتتە وتكەن ءانشى قايرات نۇرتاستىڭ كونتسەرتى كەزىندە كورەرمەن اراسىندا دۇربەلەڭ تۋىندادى. كىرەبەرىستە جينالعان حالىق ءبىر-ءبىرىن قىسىپ، كەيبىر ادامدار قۇلاپ، جاراقات العان. وقيعا ورنىنان تۇسىرىلگەن ۆيدەولار الەۋمەتتىك جەلىلەردە تارادى، دەپ حابارلايدى “ادىرنا”.
كۋاگەرلەردىڭ ايتۋىنشا، كورەرمەن اراسىندا ەسىنەن تانىپ قالعاندار بولعان. سونداي-اق كونتسەرتتەن كەيىن كەيبىر ادامدار اياق كيىمدەرىنەن ايىرىلىپ، ۇيلەرىنە جالاڭاياق قايتۋعا ءماجبۇر بولعانى تۋرالى اقپارات تارادى.
وقيعاعا بايلانىستى Freedom افيشا كومپانياسى تۇسىنىكتەمە بەردى. كومپانيانىڭ حابارلاۋىنشا، كونتسەرتتى ۇيىمداستىرۋمەن Show Service اينالىسقان. ال Freedom افيشا ۇيىمداستىرۋشى بولگەن كۆوتا اياسىندا بيلەتتەردى ساتۋعا، ولاردى تەكسەرۋگە جانە كورەرمەندەرگە بىلەزىك تاراتۋعا كومەكتەسكەن ەرىكتىلەردىڭ جۇمىسىنا جاۋاپتى بولعان.
كومپانيانىڭ مالىمەتىنشە، كونتسەرت الاڭىن دايىنداۋ، كورەرمەندى كىرگىزۋ جانە كۇزەتتى ۇيىمداستىرۋ ونىڭ مىندەتىنە كىرمەگەن.
Freedom افيشا قۇقىق قورعاۋ ورگاندارىنا قاجەتتى اقپاراتتى ۇسىنۋعا جانە وقيعانىڭ سەبەپتەرىن انىقتاۋعا كومەكتەسۋگە دايىن ەكەنىن مالىمدەدى.
شىمكەنت قالاسىنىڭ دەنساۋلىق ساقتاۋ باسقارماسى وقيعا سالدارىنان 18 جاستاعى قىزدىڭ اۋىر جاراقات الىپ، مەديتسينالىق مەكەمەگە جەتكىزىلگەنىن حابارلادى. قازىرگى ۋاقىتتا ونىڭ جاعدايى اۋىر ەكەنى ايتىلدى.
الەۋمەتتىك جەلى قولدانۋشىلارى دا كونتسەرت كەزىندەگى جاعدايعا قاتىستى پىكىرلەرىن ءبىلدىرىپ، كورەرمەننىڭ قاۋىپسىزدىگى ماسەلەسىن كوتەردى. وقيعا ورنىنان جەدەل جاردەم كولىكتەرىنىڭ سۋرەتتەرى دە جاريالاندى.
پوليتسيا قىلمىستىق ءىس قوزعادى
شىمكەنت قالالىق پوليتسيا دەپارتامەنتى كونتسەرت كەزىندە قاۋىپسىزدىك تالاپتارىنا ساي كەلمەيتىن قىزمەت كورسەتۋ فاكتىسى بويىنشا قىلمىستىق ءىس تىركەلگەنىن حابارلادى.
«كونتسەرت كەزىندە قاۋىپسىزدىك تالاپتارىنا ساي كەلمەيتىن قىزمەت كورسەتۋ فاكتىسى بويىنشا قىلمىستىق ءىس تىركەلدى.
ادامداردىڭ كوپ جينالۋىنا بايلانىستى كەلۋشىلەردىڭ ءبىرى زارداپ شەكتى. قىز مەديتسينالىق مەكەمەدە دارىگەرلەردىڭ باقىلاۋىندا.
ءىس-شارانى ۇيىمداستىرۋشىلار پوليتسياعا جەتكىزىلدى. سوتقا دەيىنگى تەرگەپ-تەكسەرۋ اياسىندا وقيعانىڭ بارلىق ءمان-جايى انىقتالۋدا.
ۇيىمداستىرۋشىلاردىڭ ارەكەتتەرىنە قۇقىقتىق باعا بەرىلەدى. تەرگەۋ ناتيجەسى بويىنشا ءتيىستى پروتسەستىك شەشىم قابىلدانادى»، – دەپ مالىمدەدى پوليتسيا.
وقيعادان كەيىن ۇيىمداستىرۋشىلار مەن پوليتسيا اراسىنداعى جاۋاپكەرشىلىك ماسەلەسى دە تالقىلانا باستادى. ۇيىمداستىرۋشىلار قاۋىپسىزدىككە قاتىستى مىندەتتەردى وزگە تاراپتارعا جۇكتەسە، پوليتسيا ءىس-شارانى وتكىزۋ كەزىندە قاۋىپسىزدىك تالاپتارىنىڭ ساقتالۋىنا بايلانىستى تەرگەۋ جۇرگىزىپ جاتىر.
قازىرگى ۋاقىتتا وقيعانىڭ ناقتى سەبەپتەرى مەن وعان جاۋاپتى تۇلعالار تەرگەۋ ناتيجەسىندە انىقتالۋى ءتيىس.
