Jasmın Tastan esimdi shymkenttik túlek UBT-da 120 ball alǵan edi. Alaıda qabyldaý komıssııasynyń qateliginen tegin bilim alý múmkindiginen aıyrylyp qaldy. Alaıda, bul másele sheshildi, dep habarlaıdy “Adyrna” ulttyq portaly.
Túlektiń ata-anasy oqý ornynyń basshylyǵy men Ǵylym jáne joǵary bilim mınıstrligine shaǵym túsiredi. Keıin bul másele áleýmettik jelide birshama rezonans týdyrady.
Ǵylym jáne joǵary bilim mınıstrligi bul máseleni tez arada nazarǵa alyp, shuǵyl sheshim qabyldady. Oǵan ózi qalaǵan ýnıversıtetten grant bólinetin boldy.
“Ǵylym jáne joǵary bilim mınıstrligi mamandary búgin bul máseleni nazarǵa alyp, shuǵyl sheshim qabyldady. Mınıstrdiń keńesshisi túlektiń ata-anasymen sóılesip, ketken qatelik úshin mınıstr men mınıstrliktiń atynan keshirim surady. Tez arada tehnıkalyq qatelik túzetilip, talapker Tastan Jasmın Qýanyshqyzy úshin Súleımen Demırel atyndaǵy ýnıverısıtetke grant bólinetin boldy. Sondaı-aq, ol jataqhanamen qamtylady.
Al, qujat qabyldaýda qatelik jibergen M.Áýezov atyndaǵy Ońtústik Qazaqstan ýnıversıteti qabyldaý komıssııasynyń mamanyna «sógis» berildi”, dep jazdy QR Ǵylym jáne joǵary bilim mınıstri Saıasat Nurbek.
Ǵylym jáne joǵary bilim mınıstri Saıasat Nurbek apparat basshylaryna jáne Joǵarǵy oqý oryndary rektorlaryna talapkerler men testileýge qatysýshylardyń qujattaryn qabyldaý barysynda muqııat bolýdy eskertti.
“Adyrna” ulttyq portaly
