فوتو: وقۋ-اعارتۋ مينيسترلىگى
قازاقستاندىق مەكتەپ وقۋشىلارى وزبەكستاننىڭ تاشكەنت قالاسىندا وتكەن 58-ءشى حالىقارالىق حيميا وليمپياداسىندا (International Chemistry Olympiad, IChO 2026) جوعارى ناتيجە كورسەتتى، دەپ حابارلايدى "ادىرنا".
وقۋ-اعارتۋ مينيسترلىگىنىڭ مالىمەتىنشە، ۇلتتىق قۇرامانىڭ بارلىق 4 مۇشەسى جۇلدەگەر اتانىپ، ەل قورجىنىنا 1 التىن جانە 3 كۇمىس مەدال سالدى.
التىن مەدالدى وسكەمەن قالاسىنداعى نازارباەۆ زياتكەرلىك مەكتەبىنىڭ (NIS) 11-سىنىپ وقۋشىسى ايزەرە جەنىسحانوۆا جەڭىپ الدى.
كۇمىس مەدال يەگەرلەرى:
- استانا قالاسى نۇرا اۋدانىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى ءابىلمانسۇر قالي;
- الماتى قالاسىنداعى №134 ليتسەيدىڭ 11-سىنىپ وقۋشىسى دانيل پولەتاەۆ;
- استانا قالاسىنداعى Spectrum International School مەكتەبىنىڭ 11-سىنىپ وقۋشىسى انسار جاقسىلىقوۆ.
ۇلتتىق قۇرامانى حالىقارالىق جانە رەسپۋبليكالىق وليمپيادالاردىڭ جەڭىمپازدارى، KAIST ۋنيۆەرسيتەتىنىڭ ستۋدەنتى سانجار بەگداير جانە حيميا مەن ەكونوميكا ماگيسترى انۋار نۇرتازين دايىندادى.
بيىلعى وليمپياداعا الەمنىڭ 90-نان استام ەلىنەن 350-دەن استام دارىندى وقۋشى قاتىستى. قاتىسۋشىلار 5 ساعاتقا سوزىلعان تەوريالىق جانە پراكتيكالىق كەزەڭدەردە كۇردەلى حيميالىق ەسەپتەردى شىعارىپ، زەرتحانالىق جۇمىستار ورىندادى.
حالىقارالىق حيميا وليمپياداسى – مەكتەپ وقۋشىلارىنا ارنالعان الەمدەگى ەڭ بەدەلدى 7 پاندىك وليمپيادانىڭ ءبىرى. قازاقستان بۇل دوداعا 1998 جىلدان بەرى تۇراقتى قاتىسىپ، جىل سايىن جوعارى ناتيجەلەرگە قول جەتكىزىپ كەلەدى.
بيىلعى جەتىستىك – ەلىمىزدەگى دارىندى جاستاردى قولداۋ، وليمپيادالىق قوزعالىستى جۇيەلى دامىتۋ جانە پەداگوگتەردىڭ كاسىبي ەڭبەگىنىڭ ايقىن ناتيجەسى. بۇل جەڭىس قازاقستاندىق وقۋشىلاردىڭ حالىقارالىق ءبىلىم دودالارىنداعى تابىستى جولىن جالعاستىرىپ وتىر.
