ساياساتكەر مۇحتار تايجان پرەزيدەنتتىككە ۇمىتكەر جيگۋلي دايراباەۆتىڭ مالىمدەمەسىنە جاۋاپ بەردى، دەپ جازادى "ادىرنا" ۇلتتىق پورتالى.
"پرەزيدەنت لاۋازىنا ءتۇسىپ جاتقان ۇمىتكەر جيگۋلي دايراباەۆ مىرزا ماعان قاتتى رەنجىپ ۇندەۋ جاريالاپتى. نامىس، ۇيات تۋرالى ءسوز قوزعاپ ماعان "شىق" دەپ شاقىرىپ جاتىر ەكەن. شىقساق شىعايىق، جيگۋلي مىرزا. كەز كەلگەن تەلەارنا بولسىن، يۋتۋبارنا بولسىن مەن سىزبەن تىكەلەي ەفيردە اشىق پىكىرتالاسقا دايىنمىن. كىمدىكى دۇرىس، كىمدىكى بۇرىس - تورەشى حالىقتىڭ ءوزى بولسىن", - دەپ جازدى مۇحتار تايجان ءوزىنىڭ فەيسبۋك پاراقشاسىندا.
ەستەرىڭىزگە سالا كەتەيىك، كۇنى كەشە پرەزيدەنتتىككە ۇمىتكەر جيگۋلي دايراباەۆ ەكونوميست مۇحتار تايجانعا ۆيدەو جولداپ: “مۇحتار اينالايىن-اي، سەندە ۇيات بار ما؟ سەن مەنى اعا دەپ جۇرگەن ادامسىڭ عوي. ەندى سەن مەنىڭ پرەزيدەنتتىككە كانديداتقا تۇسكەنىمە ءىشىڭ جارىلىپ بارا جاتىر ما؟ پىسىق بولساڭ، اقىلدى بولساڭ، ءوزىڭ ناعىپ تۇسپەدىڭ؟ ەلدىڭ ءبارىن بۇزىپ، ىرىتكى سالدىڭ. سەنىڭ جۇرگەن جەرىڭە ءشوپ شىعا ما؟ سەنىڭ مەندە نەڭ بار؟ ادامگەرشىلىك بولۋ كەرەك قوي. مۇحتار تايجان ءبىر جەردى وڭدىرىپ كەتتى دەگەندى ەستىمەپپىن. سەن نازارباەۆتىڭ اق ۇيىندە دە جۇمىس ىستەدىڭ عوي. بىلتىر جەر ماسەلەسى بويىنشا رەسپۋبليكالىق كوميسسياعا ءوزىڭ كىردىڭ سۇرانىپ. ول كوميسسيادا سەن مەننەن ۇتىلدىڭ. نامىسىڭ بار بولسا، نەڭ بار؟ قايتا قۋانبايسىڭ با؟ قاراپايىم اۋىلدان شىققان ازامات پرەزيدەنتتىككە تالاسىپ جاتقانىنا… اۋىز مەنىكى دەپ وتتاي بەرەسىڭ بە؟ دەموكراتيا دەگەن وتتاۋ ما؟ سۇراعىڭ بولسا كەل وزىمە!”،- دەپ اشۋلانعان ەدى.
"ادىرنا" ۇلتتىق پورتالى
