27 قىركۇيەكتەن باستاپ ەلدە كارانتيندىك شەكتەۋلەر جەڭىلدەتىلەدى، سالتاناتتى جانە وتباسىلىق شارالارعا رۇقسات ەتىلەدى، دەپ حابارلايدى "ادىرنا" ۇلتتىق پورتالى. بۇل تۋرالى قر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن Covid-19 تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسىندا ايتىلدى.
دەنساۋلىق ساقتاۋ ءمينيسترى الەكسەي تسوي ەلدەگى ەپيدەميولوگيالىق جاعداي تۇراقتانعانىن، سوڭعى 2 اپتادا سىرقاتتانۋشىلىق پەن ءولىم-ءجىتىم دەڭگەيى 60 پايىزعا تومەندەگەنىن ايتتى.
وسىعان بايلانىستى ۆاك بىرقاتار شەشىمدەر قابىلدادى:
- 27 قىركۇيەكتەن باستاپ Ashyq بويىنشا "قاۋىپسىز" مارتەبەسى بار قىزمەتكەرلەر مەن كەلۋشىلەردىڭ قاتىسۋىمەن كەلەسى ءىس-شارالاردى وتكىزۋگە رۇقسات ەتىلسىن ( قىزمەتىنە قاتىستى كارانتيندىك تالاپتار جەڭىلدەتىلگەن نىساندار ءتىزىمى كەستەدە كورسەتىلگەن).
- 16 ەلمەن اۋە قاتىناسىن جاڭارتۋ جانە ۇلعايتۋ (رەسەي فەدەراتسياسى، تۇركيا، ءباا، وزبەكستان، گەرمانيا، مالديۆى، كورەيا، پولشا، ۆەنگريا، يتاليا، چەحيا، شري-لانكا، قىتاي، ساۋد ارابياسى، كۋۆەيت، ءازىربايجان).
- قولايلى ەپيدەميولوگيالىق احۋالى جانە حالىقتى ۆاكتسيناتسيالاۋدىڭ جوعارى دەڭگەيى بار 30 شەت مەملەكەتپەن قازاقستان رەسپۋبليكاسىنا كىرۋ ءۇشىن ۆيزاسىز رەجيمدى قايتا باستاۋ (يتاليا، نيدەرلاندى، فرانتسيا، گەرمانيا، يسپانيا، جاپونيا، ءباا، ساۋد ارابياسى، كۋۆەيت، پولشا دانيا، چيلي، ۆەنگريا، كورەيا، چەحيا، باحرەين، كاتار، موناكو، كيپر، يسلانديا، فينليانديا، مالتا، شۆەتسيا، پورتۋگاليا، ليحتەنشتەين، سلوۆاكيا، ليۋكسەمبۋرگ، كانادا، سينگاپۋر، بەلگيا).
سونداي-اق كونفەرەنتسيالار، فورۋمدار جانە باسقا دا بۇقارالىق شارالاردى، كورمەلەردى وتكىزۋگە رۇقسات ەتىلدى. بۇعان قوسا، تازا اۋادا مارافون ۇيىمداستىرىپ، كورەرمەندەردىڭ قاتىسۋىمەن سپورتتىق شارالار وتكىزۋگە بولادى. سپورتتىق-ساۋىقتىرۋ ورتالىقتارى مەن سپورت كەشەندەرىنىڭ، ويىن كلۋبتارىنىڭ (كازينو) قىزمەتى جاندانادى.
"ادىرنا" ۇلتتىق پورتالى
