الماتىدا قىتايدىڭ تانىمال جازۋشىسى، ادەبيەت سالاسىنداعى نوبەل سىيلىعىنىڭ لاۋرەاتى مو يانمەن كەزدەسۋ ءوتتى. شارانى قازاقستان جازۋشىلار وداعى ۇيىمداستىردى. بۇل تۋرالى جۋرناليست نۇرگەلدى ابدىعاني جەلىدەگى پاراقشاسىندا جازدى، دەپ حابارلايدى "ادىرنا".
كەزدەسۋ بارىسىندا جازۋشى نوبەل سىيلىعىن العاننان كەيىنگى شىعارماشىلىق جولى تۋرالى اڭگىمەلەدى. ونىڭ ايتۋىنشا، بەدەلدى ماراپاتتان كەيىن جازاتىن تۋىندىلارى بۇرىنعىدان دا جوعارى دەڭگەيدە بولۋى كەرەك دەگەن تالاپ قويعان.
سول ماقساتتا ول الەمنىڭ ءارتۇرلى ەلدەرىنە بارىپ، ايگىلى قالامگەرلەردىڭ ءومىرى مەن شىعارماشىلىعىن زەرتتەگەن. اتاپ ايتقاندا، يسپانيادا ميگەل دە سەرۆانتەس تۇرعان ۇيگە بارعان، ارگەنتينادا حورحە لۋيس بورحەستىڭ قولجازبالارىمەن تانىسقان، ال رەسەيدە ميحايل شولوحوۆتىڭ جۇمىس ۇستەلىن كورگەن.
كەزدەسۋ كەزىندە قاتىسۋشىلاردىڭ ءبىرى مو ياننان قازاقستانعا كەلەر الدىندا قانداي قازاق اۆتورلارىن وقىعانىن سۇرادى.
«قازاقستانعا كەلەر الدىندا اقبار ءماجيت اۋدارعان اباي شىعارمالارىن عانا وقىدىم. مۇمكىن، قازاق ادەبيەتى قىتاي تىلىنە كوپ اۋدارىلماعان شىعار، سوندىقتان ماعان قولجەتىمدى بولمادى»، – دەپ جاۋاپ بەردى جازۋشى.
بۇل پىكىر كەزدەسۋگە قاتىسۋشىلار اراسىندا قازاق ادەبيەتىن شەتەل تىلدەرىنە اۋدارۋ ماسەلەسىن قايتا كوتەردى. قازاقستان جازۋشىلار وداعىنىڭ توراعاسى مەرەكە قۇلكەنوۆ تە ءسوز سويلەپ، ۇلتتىق ادەبيەتتى الەمگە تانىتۋ باعىتىنداعى جۇمىستاردى كۇشەيتۋ قاجەتتىگىن اتاپ ءوتتى.
شارا بارىسىندا مو يان مەن جازۋشى-اۋدارماشى اقبار ماجيتكە ءال-فارابي اتىنداعى قازاق ۇلتتىق ۋنيۆەرسيتەتىنىڭ «قۇرمەتتى پروفەسسورى» اتاعى تابىستالدى.
سونداي-اق قازاق تىلىنە اۋدارىلعان مو ياننىڭ ەكى كىتابىنىڭ تۇساۋكەسەرى ءوتتى. ولار – اۋدارماشى تولەگەن مەللات تارجىمالاعان «سارىمساق جىرى» جانە ەدىلبەك دۇيسەن مەن ءاليحان ماحاش اۋدارعان ء«حالىڭىز قالاي، فولكنەر اعاي؟» شىعارمالارى.
كەزدەسۋ بارىسىندا جازۋشى ءوزىنىڭ شىعارماشىلىق لاقاپ اتىنىڭ شىعۋ تاريحىن دا ايتىپ بەردى. ونىڭ ايتۋىنشا، بالا كەزىندە كوپ سويلەيتىن بولعاندىقتان، اتا-اناسى ۇنەمى «از سويلەپ، كوپ تىڭداۋعا» كەڭەس بەرگەن. كەيىن ول وزىنشە ءازىل رەتىندە «ۇندەمە» دەگەن ماعىنانى بىلدىرەتىن مو يان دەگەن ادەبي ەسىمدى تاڭداعان.
ايتا كەتەيىك، مو ياننىڭ شىن ەسىمى – گۋان موە.
