عارىشكەرلەردى اي مەن مارسقا جەتكىزۋگە ارنالعان Starship عارىش كەمەسى 28 قىركۇيەكتە جەردى تولىق اينالىپ وتەتىن العاشقى سىناقتىق وربيتالىق ۇشۋىن باستادى. ۇشىرىلىمنىڭ تىكەلەي كورسەتىلىمىن ازىرلەۋشى SpaceX كومپانياسى جۇرگىزۋدە، دەپ حابارلايدى «ادىرنا» ءتىلشىسى Caliber.Az-عا سىلتەمە جاساپ.
Starship كەمەسى Super Heavy زىمىران-تاسىعىشىنىڭ كومەگىمەن تەحاس شتاتىنىڭ وڭتۇستىك-شىعىسىنداعى بوكا-چيكا ەلدى مەكەنىندە ورنالاسقان SpaceX Starbase عارىش ايلاعىنان جەرگىلىكتى ۋاقىت بويىنشا ساعات 12:48-دە ۇشىرىلعان.
كەمە جەردەن شامامەن 275 شاقىرىم بيىكتىككە كوتەرىلىپ، پلانەتانى التى رەت اينالىپ وتەدى. ۇشۋ بارىسىندا ول وربيتاعا 26 Starlink ينتەرنەت-سپۋتنيگىن شىعارادى.
ۇشۋدىڭ جالپى ۇزاقتىعى شامامەن 10 ساعاتقا سوزىلادى. وربيتادان شىققاننان كەيىن كەمە ءچيليدىڭ باتىس جاعالاۋىنا جاقىن تىنىق مۇحيتىنا جۇمساق قونۋى ءتيىس.
ال Super Heavy زىمىران-تاسىعىشى كەمەنى ۇشىرعان سوڭ امەريكا شىعاناعىنا قونادى.
«الداعى ۇشۋ Starship كەمەسىنىڭ جەر ماڭىنداعى وربيتاعا العاش رەت شىعۋىن قامتاماسىز ەتۋى ءتيىس. بۇعان دەيىنگى بارلىق سىناق سۋبوربيتالىق تراەكتوريالار بويىنشا جۇرگىزىلدى. وربيتاعا شىعۋ Starship جوباسىنىڭ كەلەسى كەزەڭىنە جول اشادى. بۇل – كەمەنى تولىققاندى ءارى جىلدام قايتا پايدالانۋعا مۇمكىندىك بەرەتىن جۇيەنى ازىرلەۋ»،– دەدى كومپانيا.
