قازاق ءباسپاسوزىنىڭ قاراشاڭىراعى سانالاتىن «Egemen Qazaqstan» گازەتى وقىرمان سۇرانىسىنا وراي ارنايى ءنومىردى قايتا شىعارادى، دەپ حابارلايدى "ادىرنا".
24 بەتتەن تۇراتىن ءنومىر «ەتجەڭدى» دەپ اتالادى.
«ەتجەڭدى» بۇعان دەيىن گازەتتىڭ تۇراقتى جوبالارىنىڭ ءبىرى رەتىندە وقىرمانعا ۇسىنىلعان. جاڭعىرعان ارنايى شىعارىلىمدا تانىمدىق، تاريحي، ادەبي-مادەني جانە الەۋمەتتىك تاقىرىپتار قامتىلادى. نەگىزگى ماقسات – كۇندەلىكتى جاڭالىقتاردان بولەك، كولەمدى زەرتتەۋ مەن ساراپتامالىق ماتەريالداردى ۇسىنۋ.
گازەت ۇجىمىنىڭ مالىمەتىنشە، «ەتجەڭدىنى» قايتا شىعارۋ تۋرالى ۇسىنىس وڭىرلەردەگى وقىرماندارمەن كەزدەسۋلەر كەزىندە ايتىلعان تىلەكتەردەن كەيىن قولعا الىنعان.
«Egemen Qazaqstan» گازەتىنىڭ شەف-رەداكتورى تالعات باتىرحان ارنايى ءنومىردىڭ العاشقى بەتىندە جاريالانعان ماقالاسىندا جوبانىڭ ەرەكشەلىگىنە توقتالعان.
«باسپاسوزگە جازىلۋعا بايلانىستى وتەتىن جەر-جەردەگى كەزدەسۋلەردە كوپشىلىك تاراپىنان ادەبي-مادەني، تاريحي-تانىمدىق سيپاتتاعى وقىلىمدى ماتەريالداردىڭ وتاۋى ىسپەتتى «ەتجەڭدىنى» ەل بولىپ كۇتۋدەمىز. جاقسى ءداستۇر جالعاسسا ەكەن دەگەن ءوتىنىشتى ءار كەز ەستيتىنبىز»، – دەپ جازدى ول.
جاڭارعان ارنايى نومىردە قوعامداعى وزەكتى ماسەلەلەر مەن قازاقستان تاريحىنا قاتىستى زەرتتەۋلەر جاريالانعان.
اتاپ ايتقاندا، اۋە بيلەتتەرىنىڭ باعاسى، لوۋكوستەرلەر ساياساتى، سينگاپۋر مەن ۆەنا قالالارىنىڭ تۇرعىن ۇيمەن قامتۋ تاجىريبەسى، وتاندىق كىتاپ نارىعىنىڭ ەكونوميكاسى جانە قازاقستاندىق ماماندار ازىرلەگەن جاساندى ينتەللەكت جوبالارى تالدانعان.
سونىمەن قاتار باسىلىمدا جازۋشى تولەن ابدىكتىڭ عىلىم مەن زايىرلىلىق ماسەلەلەرىنە ارنالعان فيلوسوفيالىق ماقالاسى، كەڭەستىك اتوم سۇڭگۋىر كەمەسىن باسقارعان قازاق وفيتسەرى مايدان سالمەنوۆتىڭ تاعدىرى جانە حح عاسىردىڭ باسىندا اقمولادا جۇمىس ىستەگەن قوسشىعۇلوۆتاردىڭ شوكولاد فابريكاسى تۋرالى زەرتتەۋ ۇسىنىلعان.
گازەت باسشىلىعىنا ەرجان بايتىلەس كەلگەننەن كەيىن شىعارماشىلىق ۇجىم مەرزىمدى ءباسپاسوزدى زاماناۋي تالاپتارعا بەيىمدەۋگە باسىمدىق بەرىپ وتىر.
رەداكتسيا وكىلدەرىنىڭ ايتۋىنشا، تسيفرلىق كەڭىستىكتە قىسقا اقپارات كولەمى ارتقانىمەن، ءباسپاسوزدىڭ تەرەڭ تالداۋ مەن ساپالى ساراپتاما ۇسىناتىن الاڭ رەتىندەگى ماڭىزى ساقتالادى.
«ەتجەڭدى» ارنايى ءنومىرى بۇدان بىلاي ايىنا ءبىر رەت جارىق كورىپ تۇرادى.
