2026 جىلعى 16 مامىردا استاناداعى ۇلتتىق نەيروحيرۋرگيا ورتالىعى بازاسىندا Kazakh Spine Days 2026 حالىقارالىق جۇلىن نەيروحيرۋرگياسى بويىنشا ءبىلىم بەرۋ كۋرسى اشىلدى. بۇل — ورتالىق ازياداعى جۇلىن نەيروحيرۋرگياسى سالاسىنداعى ەڭ ءىرى كاسىبي ءىس-شارالاردىڭ ءبىرى.
ەكى كۇن بويى قازاقستاننىڭ وڭىرلەرىنەن جانە شەتەلدەن كەلگەن جەتەكشى نەيروحيرۋرگتەر، ومىرتقا حيرۋرگياسىنىڭ ماماندارى، زەرتتەۋشىلەر مەن جاس دارىگەرلەر ومىرتقا اۋرۋلارىن دياگنوستيكالاۋ مەن ەمدەۋدىڭ زاماناۋي تاسىلدەرىن، جوعارى تەحنولوگيالىق حيرۋرگيالىق ادىستەردى ەنگىزۋ جانە حالىقارالىق كاسىبي ىنتىماقتاستىقتى دامىتۋ ماسەلەلەرىن تالقىلاۋدا.
العاشقى كۇنى 100-دەن استام قاتىسۋشى تىركەلدى. ولاردىڭ باسىم بولىگى قازاقستاننىڭ وڭىرلەرىنەن كەلگەن ماماندار بولسا، سونداي-اق ءىس-شاراعا تۇركيا، ۇلىبريتانيا، وڭتۇستىك كورەيا جانە قىتاي ەلدەرىنەن ساراپشىلار قاتىسۋدا.
قاتىسۋشىلاردى اشىلۋ سالتاناتىندا قازاقستان رەسپۋبليكاسىنىڭ دەنساۋلىق ساقتاۋ ۆيتسە-ءمينيسترى ەربول وسپانوۆ قۇتتىقتاپ، مۇنداي حالىقارالىق ءبىلىم بەرۋ الاڭدارىنىڭ وتاندىق مەديتسيناسىنىڭ دامۋىنا زور سەرپىن بەرەتىنىن اتاپ ءوتتى. ول استانا قالاسى مەن ۇلتتىق نەيروحيرۋرگيا ورتالىعىنىڭ الەمدىك دەڭگەيدەگى مامانداردى قابىلداۋى — دەنساۋلىق ساقتاۋ جۇيەسىن دامىتۋداعى جۇيەلى جۇمىستىڭ ناتيجەسى ەكەنىن جەتكىزدى.
قازاق نەيروحيرۋرگتار اسسوتسياتسياسىنىڭ جانە ۇلتتىق نەيروحيرۋرگيا ورتالىعىنىڭ پرەزيدەنتى، ەلىمىزدىڭ باس شتاتتان تىس نەيروحيرۋرگى، قر ۇعا اكادەميگى سەرىك اقشولاقوۆ جۇلىن نەيروحيرۋرگياسىن دامىتۋ قازاقستان مەديتسيناسىنىڭ ستراتەگيالىق باعىتى ەكەنىن اتاپ ءوتتى.
كونفەرەنتسيانىڭ نەگىزگى حالىقارالىق سپيكەرلەرىنىڭ ءبىرى — پروفەسسور Mehmet Zileli (نەيروحيرۋرگيالىق قوعامداردىڭ دۇنيەجۇزىلىك فەدەراتسياسى (WFNS) جۇلىن نەيروحيرۋرگياسى كوميتەتىنىڭ نەگىزىن قالاۋشى جانە العاشقى توراعاسى، WFNS-ءتىڭ قۇرمەتتى مۇشەسى). ول «بەل اۋىرسىنۋ كوزدەرىن دياگنوستيكالاۋ» اتتى بايانداماسىندا ومىرتقا پاتولوگيالارىن، اسىرەسە دەگەنەراتيۆتى اۋرۋلاردى انىقتاۋ جانە اۋىرسىنۋدىڭ ناقتى سەبەبىن تابۋدىڭ زاماناۋي تاسىلدەرىنە توقتالدى.
پروفەسسوردىڭ ايتۋىنشا، حيرۋرگيالىق ەمنىڭ ءساتتى ناتيجەسى تەك وپەراتسيانىڭ تەحنيكالىق ساپاسىنا عانا ەمەس، سونىمەن قاتار دۇرىس دياگنوز قويۋ مەن ناۋقاستى وپەراتسياعا دۇرىس ىرىكتەۋگە تىكەلەي بايلانىستى.
«دۇرىس الىنعان پاتسيەنت — وپەراتسيانىڭ تابىستى ناتيجەسىنىڭ جانە قازىرگى الەمدىك نەيروحيرۋرگياداعى قاۋىپسىزدىك قاعيدالارىنىڭ نەگىزگى فاكتورلارىنىڭ ءبىرى»، — دەدى پروفەسسور Mehmet Zileli.
سونداي-اق ول قازاقستانداعى جۇلىن نەيروحيرۋرگياسى دەڭگەيىنىڭ جوعارى ەكەنىن اتاپ ءوتتى. ونىڭ ايتۋىنشا، كلينيكالىق تاسىلدەر، جابدىقتالۋ دەڭگەيى جانە ورىندالاتىن وپەراتسيالار الەمنىڭ جەتەكشى ورتالىقتارىمەن تولىقتاي سايكەس كەلەدى.
پروفەسسور ۇلتتىق نەيروحيرۋرگيا ورتالىعى بۇگىندە حالىقارالىق دەڭگەيدەگى وقۋ جانە ترەنينگ بازاسى رەتىندە قالىپتاسقانىن، مۇندا جاس مامانداردى وقىتۋعا جانە الەمدىك قاۋىپسىزدىك ستاندارتتارىن ەنگىزۋگە ەرەكشە كوڭىل بولىنگەنىن ايتتى.
ول كۋرس اياسىندا حالىقارالىق ساراپشىلاردىڭ نەگىزگى ماقساتى — قازاقستاننىڭ وڭىرلەرىنەن كەلگەن جاس دارىگەرلەردى وقىتۋ، تاجىريبە الماسۋ جانە جۇلىن نەيروحيرۋرگياسى بويىنشا پراكتيكالىق داعدىلاردى دامىتۋ ەكەنىن دە اتاپ ءوتتى.
ومىرتقا حيرۋرگياسى سالاسىنداعى مامانداردى بىرىكتىرەتىن International Spine Society (ISS) حالىقارالىق قوعامىنىڭ پرەزيدەنتى - Yahya Güvenç ءوز سوزىندە حالىقارالىق تاجىريبە الماسۋ مەن ءبىلىم بەرۋ باستامالارىنىڭ جۇلىن نەيروحيرۋرگياسىنىڭ دامىتۋداعى ءرولىن ەرەكشە اتاپ ءوتتى.
كۋرس اياسىندا Hands-on Workshop on Models فورماتىنداعى پراكتيكالىق ساباقتارعا ەرەكشە نازار اۋدارىلدى. قاتىسۋشىلار اناتوميالىق ۇلگىلەر مەن سيمۋلياتسيالىق مودەلدەردە حيرۋرگيالىق داعدىلاردى جەتىلدىرۋدە.
عىلىمي باعدارلاما ومىرتقا حيرۋرگياسىنىڭ وزەكتى باعىتتارىن قامتيدى: دەگەنەراتيۆتى اۋرۋلاردى ەمدەۋ، دەفورماتسيالاردى تۇزەتۋ، جۇلىن جاراقاتتارىن ەمدەۋ، ىسىكتەر حيرۋرگياسى جانە دالەلدى مەديتسينانى ەنگىزۋ.
Kazakh Spine Days 2026 — تاجىريبە الماسۋعا، كاسىبي ديالوگقا جانە حالىقارالىق ىنتىماقتاستىقتى نىعايتۋعا ارنالعان ماڭىزدى الاڭعا اينالدى.
