الداعى بىرنەشە جىلدا قازاقستاندا تۋبەركۋلەز اۋرۋ ءورشۋى مۇمكىن. بۇل تۋرالى بۇگىن قر ۇلتتىق فتيزيوپۋلمونولوگيا ورتالىعىندا وتكەن ءباسپاسوز جيىنىندا ماماندار ايتتى، دەپ حابارلايدى “ادىرنا» ءتىلشىسى.
الداعى جىلدارعا بولجام جاساعان مامانداردىڭ پىكىرىنشە، دەرتتىڭ اسقىنۋىنا دەر كەزىندە سكرينينگتەردىڭ جاسالماۋى سەبەپ. ويتكەنى، جالپى حالىقتىڭ دەنساۋلىعىن قاداعالاۋمەن اينالىساتىن ەمحانالار پاندەمياعا بايلانىستى جابىلىپ، كوروناۆيرۋسقا قارسى جۇمىس ىستەدى. بۇل ءوز كەزەگىندە حالىقتىڭ جاپپاي تۋبەركۋلەزگە قارسى تەكسەرىستەن دەر كەزىندە ءوتۋىن اجەپتاۋىر شەكتەگەن.
«كامەدا» قوعامدىق قورى ۇيىمداستىرعان شاراعا وتاندىق باق وكىلدەرى قاتىسىپ، تۋبەركۋلەز تۋرالى جان-جاقتى اقپارات الدى.
ورتىلىق ماماندارىنىڭ ايتۋىنشا حالىقتا تۋبەركۋلەزگە بايلانىستى قورقىنىش پەن ۇرەي قالىپتاسقان. ونىڭ باستى سەبەبى اقپاراتتىڭ دۇرىس جەتكىزىلمەۋى دەيدى قر ۇلتتىق فتيزيوپۋلمونولوگيا ورتالىعىننىڭ باقىلاۋ، باعالاۋ، ەپيدەميولوگيا جانە ستاتيستيكا، اقپاراتتاندىرۋ دەپارتامەنتىنىڭ باسشىسى جازىبەكوۆا پاناگۇل.
«بۇگىنگى تاڭدا تۋبەركۋلەز ەشقانداي دا قورقىنىشتى اۋرۋ ەمەس. ادامدار اراسىندا ول تۋرالى دۇرىس ەمەس تۇسىنىك قالىپتاسقان. بىلتىر كوروناۆيرۋس بولعان كەزدە ەشكىم جاسىرعان جوق. ەمدەلىپ جازىلىپ جاتتى. بۇل دا سونداي. وكپەگە تۇسكەن ينفەكتسيانى ەمدەۋگە بولادى. سونىمەن بىرگە ەمدەۋدىڭ بارلىق ءتۇرى جانە ءدارى-دارمەكتەر تەگىن» دەيدى پ.جازىبەكوۆا.
«ادىرنا» ۇلتتىق پورتالى
