2023 جىلعا قاراي دارىگەرلەردىڭ جالاقىسى 550 مىڭ تەڭگەدەن اسادى - دەنساۋمين

3148
Adyrna.kz Telegram

2023 جىلعا قاراي دارىگەرلەردىڭ جالاقىسى ورتا ەسەپپەن 550 مىڭ تەڭگەدەن اسىپ، قازاقستانداعى ورتاشا جالاقىدان 2,5 ەسەگە جوعارى بولادى. بۇل تۋرالى اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ ستۋدەنتتەرىمەن كەزدەسۋىندە قر دەنساۋلىق ساقتاۋ ءمينيسترى اجار عينيات مالىمدەدى، دەپ جازادى "ادىرنا".

«دەنساۋلىق ساقتاۋ جۇيەسىنىڭ بولاشاعى: العاشقى مەديتسينالىق-سانيتارلىق كومەكتىڭ بەدەلى، موتيۆاتسيا، قۇزىرەت» اتتى كەزدەسۋدە، دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق ايماقتىق ديرەكتورى حانس ەنري پ.كليۋگە، قازاقستاننىڭ دەنساۋلىق ساقتاۋ ءمينيسترى اجار عينيات، ددۇ-نىڭ قازاقستانداعى وكىلى كەرولاين كلارينۆال، ددۇ ەۋروپالىق العاشقى مەديتسينالىق-سانيتارلىق كومەك ورتالىعىنىڭ باسشىسى مەليتتا ياكاب، وزبەكستان دەنساۋلىق ساقتاۋ ءمينيسترىنىڭ ورىنباسارى امريللو ينوياتوۆ ءسوز سويلەدى.

قر دەنساۋلىق ساقتاۋ ءمينيسترى اجار عينياتتىڭ ايتۋىنشا، بۇگىندە سەگىز جوعارى وقۋ ورنى رەسپۋبليكانىڭ ءبىلىم بەرۋ باعدارلامالارىنىڭ تىزىلىمىنە ەنگىزىلگەن 60-تان استام مەديتسينالىق ماماندىقتاردى وقىتادى.

«جىل سايىن ماماندىقتىڭ بەدەلى ارتىپ، مەديتسيناعا ىنتالى جاستار ءوسىپ كەلەدى. جىل سايىن مەديتسينالىق جوعارى وقۋ ورىندارى توعىز مىڭنان استام مامان شىعارادى. 2021 جىلدان باستاپ دەنساۋلىق ساقتاۋ مينيسترلىگى گرانت قۇنىن ءوسىردى، بۇل مەديتسينالىق جوعارى وقۋ ورىندارىنىڭ ماتەريالدىق-تەحنيكالىق بازاسىن جاقسارتۋعا ايتارلىقتاي اسەر ەتەدى. مەديتسينا قىزمەتكەرلەرىنىڭ جالاقىسىن جىل سايىن، جۇيەلى تۇردە ارتتىرۋعا كوبىرەك كوڭىل بولىنۋدە، 2023 جىلعا قاراي دارىگەرلەردىڭ جالاقىسى ورتاشا ەسەپپەن 561 مىڭ تەڭگەگە دەيىن جانە قازاقستانداعى ورتاشا جالاقىدان 2,5 ەسە جوعارى بولادى»، - دەدى مينيستر.

سونىمەن قاتار، ول العاشقى مەديتسينالىق-سانيتارلىق كومەكتىڭ ۇنەمى جەتىلدىرىلىپ جاتقانىن اتاپ ءوتتى.

«باستاپقى مەديتسينالىق-سانيتارلىق كومەك قىزمەتكەرلەرىنىڭ الەۋەتىن ارتتىرۋ دەنساۋلىقتى جاقسارتۋدىڭ نەگىزى بولىپ تابىلادى»، - دەدى ول.

دۇنيەجۇزىلىك دەنساۋلىق ساقتاۋ ۇيىمىنىڭ ەۋروپاداعى ايماقتىق ديرەكتورى، دوكتور حانس كليۋگە ستۋدەنتتەرگە ءدارىس وقىدى. باستاپقى مەديتسينالىق-سانيتارلىق كومەكتى ىلگەرىلەتۋ جانە وزگەرتۋ ءۇشىن جاس مامانداردىڭ الەۋەتى زور، دەدى ول.

«سىزدەر كوشباسشى بولاسىزدار دەپ ۇمىتتەنەمىز. دەنساۋلىقتىڭ بولاشاعى جاستارعا بايلانىستى. سىزدەردىڭ ىنتالارىڭىز بەن وزگەرىستەرگە دەگەن قۇلشىنىستارىڭىز – ءبىزدىڭ تىرەگىمىز»، – دەدى.

"ادىرنا" ۇلتتىق پورتالى

پىكىرلەر