پرەزيدەنت قاسىم-جومارت توقاەۆ استانا اكىمى جەڭىس قاسىمبەككە عيماراتتاردىڭ قابىرعالارىنا رۇقساتسىز گراففيتي سالاتىن ادامدارعا قاتىستى قاتاڭ شارا قولدانۋدى تاپسىردى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردا حابارلادى.
مەملەكەت باسشىسى قازاقستان قالالارىندا قوعامدىق ورىندار مەن عيماراتتاردى بۇلدىرۋگە جول بەرمەۋ كەرەگىن ايتتى. ونىڭ سوزىنشە، مۇنداي ارەكەت ۆانداليزم مەن بۇزاقىلىقتىڭ كورىنىسى سانالادى.
پرەزيدەنت گراففيتي سالۋعا تولىق تىيىم سالۋعا باعىتتالعان زاڭنامالىق جانە نورماتيۆتىك شارالار قابىلداۋ قاجەتتىگىن اتاپ ءوتتى.
سونىمەن قاتار قاسىم-جومارت توقاەۆ ەلىمىزدە ونداعان مىڭ شاقىرىم اۆتوكولىك جولى مەن تەمىرجول سالىنىپ جاتقانىن ايتتى. مەملەكەت باسشىسى قۇرىلىس ساپاسى جوعارى بولۋى كەرەگىن جەتكىزدى.
«قازاقستان ۇلكەن قۇرىلىس الاڭى، باسقا سوزبەن ايتساق، جاسامپازدىق مەكەنى بولۋى كەرەك. قۇرىلىستىڭ ساپاسى وتە جوعارى بولۋى قاجەت. مەن ءوز باسىم وسى ماسەلەگە باسا نازار اۋدارىپ، بۇل جۇمىستى قاتاڭ باقىلاۋدا ۇستايمىن. اتالعان نۇسقاۋ مەن ءتيىستى ەرەجەنى بۇزاتىن ادامدار زاڭىمىز بويىنشا مىندەتتى تۇردە جازاعا تارتىلادى»، – دەدى پرەزيدەنت.
مەملەكەت باسشىسى اتقارىلىپ جاتقان جۇمىستاردىڭ نەگىزگى ماقساتى حالىقتىڭ تۇرمىس ساپاسىن ارتتىرىپ، ازاماتتارعا قولايلى جاعداي جاساۋ ەكەنىن اتاپ ءوتتى.
پرەزيدەنت استانانىڭ قازاقستاننىڭ ايناسى ءارى ەلدىڭ باستى قالاسى ەكەنىن ايتتى.
«قازىر ەلوردامىزدى جاڭاشىل، جاسامپاز ازاماتتاردىڭ قۇتتى مەكەنى دەپ ايتساق، قاتە بولمايدى. استانامىزدىڭ كوركى ارتىپ كەلە جاتىر»، – دەدى قاسىم-جومارت توقاەۆ.
