ماڭعىستاۋ وبلىسىندا ءوتىپ جاتقان رەفەرەندۋمدا مۇمكىندىگى شەكتەۋلى ازاماتتار دا بەلسەندى قاتىسىپ، ءوز تاڭداۋلارىن جاساۋدا. سولاردىڭ ءبىرى – رۋسلان گايباتوۆ.
رۋسلان گايباتوۆ ءوزى تىركەلگەن №267 رەفەرەندۋم ۋچاسكەسىنە كەلىپ، داۋىس بەردى. ونىڭ ايتۋىنشا، ۋچاسكەدە ەرەكشە قاجەتتىلىگى بار ازاماتتار ءۇشىن بارلىق جاعداي جاسالعان.
– بۇگىن رەفەرەندۋمعا قاتىسىپ، ءوز تاڭداۋىمدى جاسادىم. ۋچاسكەدە بىزگە بارلىق جاعداي قاراستىرىلعان. كىرۋ جولدارى ىڭعايلى، قىزمەتكەرلەر دە كومەك كورسەتىپ جاتىر. وسىنداي ماڭىزدى شاراعا قاتىسۋ – ءار ازاماتتىڭ مىندەتى دەپ ويلايمىن، – دەدى رۋسلان گايباتوۆ.
ايتا كەتەيىك، رەفەرەندۋم ۋچاسكەلەرىندە مۇمكىندىگى شەكتەۋلى ازاماتتار ءۇشىن قوسىمشا جاعدايلار قاراستىرىلعان. اتاپ ايتقاندا، ينۆاتاكسي قىزمەتى ۇيىمداستىرىلىپ، ازاماتتاردىڭ داۋىس بەرۋ ۋچاسكەلەرىنە كەدەرگىسىز جەتۋىنە مۇمكىندىك جاسالعان.
سونىمەن قاتار ۋچاسكەلەردە قولجەتىمدى داۋىس بەرۋ ورتاسى قامتاماسىز ەتىلگەن. كورۋ قابىلەتى تومەن ازاماتتار ءۇشىن بيۋللەتەندەردى ءوز بەتىنشە تولتىرۋعا مۇمكىندىك بەرەتىن برايل قارپى بار ارنايى ترافارەتتەر قولدانىلادى.
بۇدان بولەك، ازاماتتاردىڭ اقپاراتقا قولجەتىمدىلىگىن ارتتىرۋ ماقساتىندا كونستيتۋتسيا جوباسىنىڭ اۋديو نۇسقالارى دايىندالعان. قۇجاتتىڭ مازمۇنى قازاق جانە ورىس تىلدەرىندە اۋديوفورماتتا قولجەتىمدى.
مۇنداي شارالار بارلىق ازاماتتاردىڭ رەفەرەندۋمعا تەڭ دارەجەدە قاتىسۋىنا مۇمكىندىك بەرۋگە باعىتتالعان.
