مەملەكەت باسشىسى قاسىم-جومارت توقاەۆ مەرزىمىنەن بۇرىن پرەزيدەنت سايلاۋىن وتكىزۋ ءتارتىبىن ناقتىلاۋدى ۇسىندى، دەپ حابارلايدى “ادىرنا” ۇلتتىق پورتالى.
بۇل تۋرالى ول ۇلتتىق قۇرىلتايدىڭ وتىرىسىندا ايتتى.
پرەزيدەنتتىڭ سوزىنشە، كاسىبي زاڭگەرلەر كونستيتۋتسيانىڭ جەكەلەگەن نورمالارىن ناقتىلاۋ قاجەتتىگىن كوتەرگەن. سونىڭ ىشىندە، مەملەكەت باسشىسىنىڭ وكىلەتتىگى مەرزىمىنەن بۇرىن توقتاعان جاعدايدا، كەزەكتەن تىس پرەزيدەنت سايلاۋىن وتكىزۋ ماسەلەسىنە ەرەكشە نازار اۋدارىلعان.
قولدانىستاعى كونستيتۋتسياعا سايكەس، پرەزيدەنت ءوز مىندەتىن اتقارا الماعان جاعدايدا، ونىڭ وكىلەتتىگى قالعان مەرزىمگە سەنات توراعاسىنا وتەدى. الايدا «قالعان مەرزىم» التى اي دا، التى جىل دا بولۋى مۇمكىن. وسىعان بايلانىستى قاسىم-جومارت توقاەۆ كونستيتۋتسيادا پرەزيدەنت وكىلەتتىگى مەرزىمىنەن بۇرىن توقتاعان جاعدايدا، كەزەكتەن تىس سايلاۋ ەكى اي ىشىندە وتكىزىلۋى ءتيىس دەگەن ناقتى نورما بەكىتۋدى ۇسىندى.
مەملەكەت باسشىسى بۇل باستاما حالىقارالىق وزىق تاجىريبەگە ساي كەلەتىنىن اتاپ ءوتتى. ونىڭ ايتۋىنشا، ەل باسشىسى بيلىككە تەك زاڭدى جولمەن، ياعني سايلاۋ ارقىلى كەلۋى ءتيىس.
