15 ناۋرىز كۇنى «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ مۇشەلەرى قازاقستان رەسپۋبليكاسى ۇلتتىق ۇلانىنىڭ 5573 اسكەري بولىمىندە كەزدەسۋ وتكىزدى. بۇل اسكەري ءبولىم قوعامدىق ءتارتىپتى قامتاماسىز ەتۋگە، ماڭىزدى مەملەكەتتىك نىسانداردى كۇزەتۋگە جانە توتەنشە جاعدايلار كەزىندە قاۋىپسىزدىكتى ساقتاۋعا جاۋاپ بەرەدى. ءىس-شاراعا 1200-دەن استام سارباز بەن اسكەري قىزمەتشى قاتىستى.
كەزدەسۋگە مەرزىمدى اسكەري قىزمەت ساربازدارى، سەرجانتتار، وفيتسەرلەر جانە ءبولىمنىڭ باسشىلىق قۇرامى قاتىستى. ءىس-شارا بارىسىندا جاڭا كونستيتۋتسيا جوباسىنىڭ نەگىزگى قاعيدالارى تانىستىرىلىپ، ونىڭ مەملەكەتتىك باسقارۋدى جەتىلدىرۋ، ازاماتتاردىڭ قۇقىقتارى مەن بوستاندىقتارىن قورعاۋ، سونداي-اق ەلدىڭ تۇراقتى دامۋىن قامتاماسىز ەتۋگە باعىتتالعان نورمالارى كەڭىنەن ءتۇسىندىرىلدى. قۇجاتتا مەملەكەت پەن قوعام اراسىنداعى ءوزارا جاۋاپكەرشىلىك قاعيدالارى ايقىندالىپ، باسقارۋ تيىمدىلىگىن ارتتىرۋ مەن ۇلتتىق قۇندىلىقتاردى نىعايتۋعا ەرەكشە نازار اۋدارىلعانى اتاپ ءوتىلدى.
«جاڭا كونستيتۋتسيا جوباسى قوعامنىڭ ادىلدىككە دەگەن سۇرانىسىنا جاۋاپ بەرەدى. قۇجاتتا 11 ءبولىم مەن 96 باپ قاراستىرىلىپ، مەملەكەت ادامعا قىزمەت ەتۋى ءتيىس دەگەن نەگىزگى قاعيدا بەكىتىلگەن. سونىمەن قاتار پرەزيدەنت قاسىم-جومارت توقاەۆتىڭ پارلامەنتتى «قۇرىلتاي» دەپ اتاۋ باستاماسى تاريحي ساباقتاستىقتى نىعايتۋعا باعىتتالعان. بۇل جوبا حالىق ءۇشىن جاسالعان ماڭىزدى قۇجات»، – دەدى قر پارلامەنتى ءماجىلىسىنىڭ دەپۋتاتى داۋلەت تۇرلىحانوۆ.
«كونستيتۋتسيا قابىلدانعاننان بەرى وعان كوپتەگەن وزگەرىس ەنگىزىلگەنىن اتاپ ءوتتى. قۇجاتتىڭ كوپتەگەن باپتارى بىرنەشە رەت قايتا قارالعاندىقتان، قازىرگى زامان تالاپتارىنا جاۋاپ بەرەتىن نەگىزگى زاڭنىڭ جاڭا رەداكتسياسىن ازىرلەۋ قاجەتتىلىگى تۋىنداعان. جاڭا جوبا تسيفرلاندىرۋدى دامىتۋ، جاساندى ينتەللەكت ينستيتۋتتارىن قالىپتاستىرۋ، سونداي-اق قۇرىلتاي مەن قازاقستان حالقى كەڭەسى سياقتى جاڭا ينستيتۋتتاردى ەنگىزۋدى كوزدەيدى»،- دەپ ءوز پىكىرىن، استانا قالاسى ءماسليحاتىنىڭ دەپۋتاتى كەندەباي ادامبەك ءبىلدىردى. 
كەزدەسۋ بارىسىندا اسكەري قىزمەتشىلەر دە كونستيتۋتسيالىق وزگەرىستەردىڭ ماڭىزى تۋرالى ءوز پىكىرلەرىن ءبىلدىردى. ولار ەلدىڭ تۇراقتى دامۋى مەن قاۋىپسىزدىگىن قامتاماسىز ەتۋدە زاڭ ۇستەمدىگى مەن ءتيىمدى مەملەكەتتىك باسقارۋدىڭ ءرولى ەرەكشە ەكەنىن اتاپ ءوتتى.
«اسكەر – ەل تىنىشتىعىنىڭ تىرەگى. ءبىز ءۇشىن وتانعا ادال قىزمەت ەتۋ – ەڭ ۇلكەن مىندەت. ءاربىر جاۋىنگەر ءوز بورىشىن ابىرويمەن اتقارسا، ەل قاۋىپسىزدىگى دە بەرىك بولادى. ال رەفەرەندۋمعا قاتىسۋ – ءار ازاماتتىڭ ەل بولاشاعىنا دەگەن جاۋاپكەرشىلىگى»، – دەپ اتاپ ءوتتى كەزدەسۋگە قاتىسقان اسكەري جاۋىنگەرلەر.
كەزدەسۋ قورىتىندىسىندا جاڭا كونستيتۋتسيا جوباسى مەملەكەتتىلىكتى نىعايتۋعا، باسقارۋ جۇيەسىنىڭ تيىمدىلىگىن ارتتىرۋعا جانە ازاماتتاردىڭ قۇقىقتارىن قورعاۋعا باعىتتالعانى اتاپ ءوتىلدى. بۇل وزگەرىستەر قازاقستاننىڭ تۇراقتى دامۋىنا جانە ۇلتتىق قاۋىپسىزدىكتى قامتاماسىز ەتۋگە بەرىك ينستيتۋتسيونالدىق نەگىز قالىپتاستىرادى.
