قازاقستانداعى ادام ساۋداسى مەن قۇلدىق – كوپ جاعدايدا قۇجاتسىزدىققا نەگىزدەلگەن ازاپتاۋ جۇيەسىنىڭ ايقىن مىسالى. ەلدەگى الەۋمەتتىك جۇيەنىڭ ولقىلىقتارىن كورسەتەتىن بۇل جۇيەلى پروبلەما قوعام نازارىنان تىس قالىپ جاتادى. ماسەلەنىڭ توركىنى نەدە؟
ادام ساۋداسىنىڭ قۇربانى بولعان اقمولا وبلىسىنىڭ تۇرعىنى جامالدىڭ (اتى وزگەرتىلگەن) وقيعاسى – قازاقستانداعى ەڭ وسال توپتاردىڭ، اتاپ ايتقاندا، جەتىم بالالاردىڭ قالاي ءماجبۇرلى ەڭبەك قۇرىعىنا تۇسەتىنىن كورسەتتى. 44 جاستاعى جامال ءوزىنىڭ باسىنان وتكەن اۋىر جاعدايلاردى بىزگە ايتۋعا ءبىراز قينالدى. بالكىم قايتادان ەسىنە تۇسىرگىسى كەلمەگەن دە بولار. دەگەنمەن ونان سۇقبات الىپ، ءمان-جايدى تەرەڭىنەن زەرتتەدىك.
“تۋىسىڭ كەلسە، جامان ويلامايسىڭ”
جامال العاش ءماجبۇرلى ەڭبەككە 15 جاسىندا تاپ بولىپتى. سوزىنشە، ونى بالالار ۇيىنەن اناسى جاعىنان تۋىس تاتەسى الىپ كەتكەن.
“بالالار ءۇيى كادىمگىدەي. ول تۋرالى ەش جامان ءسوز ايتا المايمىن. بىراق تاتەم مەنى الىپ كەتۋگە كەلگەندە بىردەن كەلىستىم. تۋىسىڭ كەلسە، ولارمەن بىرگە كەتۋگە كەلىسەسىڭ عوي، جامان نارسە تۋرالى ويلامايسىڭ”، - دەيدى جامال باياعى سەزىمىن ەسكە الىپ.
الايدا بۇل «بوستاندىق» ونىڭ قۇجاتسىز جانە قۇقىقسىز ءومىرىنىڭ باستاۋىنا اينالادى. تاتەسى ونى تۇرعىلىقتى مەكەن جاي بويىنشا ەش جەرگە تىركەمەگەن. ەڭ وكىنىشتىسى - 16 جاسىندا جەكە كۋالىگىن دە رءاسىمدەمەگەن.
تاتەسى جامالدى قۇرىلىستا جۇمىس ىستەۋگە ۇيرەتكەن، اكتەۋدى، بوياۋدى كورسەتكەن. ول العاشقى تابىسىن سول جەردەن تاۋىپتى. ءارى قاراي جامالدىڭ جاعدايى قالاي بولعانىن بىزگە «قايسار» قورىنىڭ ءتورايىمى ايتىپ بەردى.
“شىن مانىندە بۇل – جاسىرىن ادام ساۋداسى”
قازىرگى زامانعى قۇلدىق فورمالارى ادام ساۋداسىنىڭ ءبىر بولىگى رەتىندە قاراستىرىلادى. “قايسار” قورىنىڭ جەتەكشىسى وكسانا تارابۋكينانىڭ سوزىنشە، “قۇلدىق” دەگەن ۇعىم قازاقستان زاڭناماسى بويىنشا قۇقىقتىق تەرمين ەمەس. ونىڭ ورنىنا “ادام ساۋداسى” دەگەن تەرمين قولدانىلادى، نەگىزگى ەلەمەنتى - ەكسپلۋاتاتسيا.
“مەنىڭ ويىمشا “قۇلدىق” دەگەن ءسوزدى تىرناقشاعا العان ءجون. ويتكەنى قازاقستاندا قازىرگى زامانعى قۇلدىق دەگەن قۇقىقتىق تەرمين جوق. ول كوبىنە بەيرەسمي، تۇرمىستىق جاعدايدا قولدانىلادى. بۇگىن “زاماناۋي قۇلدىق” دەپ جۇرگەن قۇبىلىستار زاڭدا “ادام ساۋداسى” دەپ اتالادى. ونىڭ نەگىزگى ەلەمەنتى – ازاپتاۋ” ،- دەيدى تارابۋكينا.
2024 جىلدىڭ 5 قىركۇيەگىندە قابىلدانعان “ادام ساۋداسىنا قارسى ءىس-قيمىل تۋرالى” جاڭا زاڭدا ء“ماجبۇرلى ەڭبەك” دەگەن تەرمين ناقتى بەكىتىلگەن. بۇل – قازىرگى ازاپتاۋدىڭ استارلى، جاسىرىن تۇرلەرىن قامتيتىن نەگىزگى ەلەمەنت.
ازاپتاۋ, الداۋ، قارىزدىق تاۋەلدىلىك، كۇش قولدانۋ نەمەسە قورقىتۋ، سونداي-اق ادامنىڭ ءالسىز جاعدايىن پايدالانۋ ارقىلى جۇزەگە اسادى. السىزدىك الەۋمەتتىك، قارجىلىق، دەنساۋلىق جاعدايىنا، جاسىنا، تولىق ەمەس وتباسى جانە باسقا دا فاكتورلارعا بايلانىستى بولۋى مۇمكىن. ادام ازاپتاۋعا ۇشىراعان جاعدايدا جۇمىس ورنىن ەركىن تاستاپ كەتە المايدى نەمەسە ەڭبەك شارتتارىن وزگەرتە المايدى. ازاپتاۋدىڭ كەڭ تارلاعان بەلگىلەرىنە پاسپورت پەن قۇجاتتاردى الىپ قويۋ، جالاقىنى كەشىكتىرۋ نەمەسە مۇلدە تولەمەۋ، ەركىن قوزعالىستى شەكتەۋ، زورلىق-زومبىلىقپەن نەمەسە شەتەلدىك بولسا، دەپورتاتسيامەن قورقىتۋ جاتادى. سونداي-اق قارىزدىق تاۋەلدىلىك دە بۇل تىزىمگە ەنەدى.
بۇگىندە ازاپتاۋدىڭ بىرنەشە جاڭا فورمالارى بار. بۇرىن قيناۋ كوبىنە سەكسۋالدىق نەمەسە اۋىر فيزيكالىق ەڭبەكپەن جانە انتيسانيتارلىق جاعدايلارمەن بايلانىستى بولسا، قازىر جاعداي وزگەرىپ، ەكسپلۋاتاتسيا ادىستەرى جاسىرىن سيپات الۋدا. مامانداردىڭ سوزىنشە، مىسالى جاسىرىن مانيپۋلياتسيا، قايىرشىلاردىڭ جاعدايىن سىرتتاي جاقسى كورسەتۋ، ميگرانتتاردى ازاپتاۋسەكىلدى ادىستەر كەڭىنەن تارالىپ كەلەدى.
“ماسەلەن، اۋىل شارۋاشىلىعىنداعى ءماجبۇرلى ەڭبەك. بۇرىن ادامداردى شىنىمەن قۇل سياقتى ۇستاسا، قازىر ولارعا جاقسى تاماق، قالىپتى باسپانا بەرەدى. بىراق ايەل نەمەسە وتباسى بولسا، ولاردىڭ بالاسىن جۇمىس بەرۋشى ءوز ۇيىندە قالدىرادى. بالا مەكتەپكە بارىپ، جاعدايى جاقسى كورىنگەنمەن ءىس جۇزىندە ول – قاماۋداعى كەپىل، - دەيدى قۇقىق قورعاۋشى.
وكسانا تارابۋكينا
سونداي-اق قايىرشىلىق ارقىلى دا ادامداردى ەكسپلۋاتاتسيالاۋ ءجيى كەزدەسەدى ەكەن. سوڭعى رەزونانستى ىسكە قاتىستى اياق-قولدان ايرىلعان ەر ادام مەن ونىڭ ايەلى (ول باستاپقىدا بىرگە تۇراتىن سەرىگى بولعان، كەيىن رەسمي نەكەگە تۇرعان) ەكەۋىنىڭ بالاسىن ەكسپلۋاتاتورلار تارتىپ العان. بالا ەكسپلۋاتاتوردىڭ تۋىسىنىڭ قولىندا ءوسىپ، اتا-اناسىنا قارسى مانيپۋلياتسيا قۇرالىنا اينالعان.
«بالاڭدى كورگىڭ كەلە مە؟ وندا جۇمىس ىستە» دەگەن سياقتى ايلا-شارعىلار ءالى كۇنگە دەيىن بار. سىرت كوزگە ءبارى جاقسى، بىراق شىن مانىندە بۇل –ادام ساۋداسى”، - وكسانا تارابۋكينا.
وسىنداي ءماجبۇرلى ەڭبەك كوبىنە اۋىلدىق جەرلەردە، شارۋاشىلىقتار مەن قۇرىلىس نىساندارىندا كەزدەسەدى. سەبەبى مۇنداي جۇمىستارعا جەرگىلىكتى حالىق بارعىسى كەلمەيدى. سوندىقتان جۇمىس بەرۋشىلەر كوبىنە ورتالىق ازيا (وزبەكستان، قىرعىزستان، تاجىكستان) ەلدەرىنىڭ ميگرانتتارىن تارتادى. مامانداردىڭ سوزىنشە، مۇنداي جاعدايدا پاسپورت نەمەسە تىركەۋ ماسەلەسى ارقىلى مانيپۋلياتسيا جۇرەدى. ەگەر جۇمىس بەرۋشى ۋاقىتىندا تىركەۋ جاساماسا،ميگرانتتى دەپورتاتسيامەن قورقىتادى. كوبىنەسە,ميگرانتتار مۇنداي ماسەلەلەردى جاسىرادى، سەبەبى دەپورتاتسيا ولاردىڭ تابىس تابۋ مۇمكىندىگىن بەس جىلعا دەيىن شەكتەيدى.
اينۇردىڭ جاعدايى «قايسار» قورىنىڭ جەتەكشىسى وكسانا تارابۋكينا اتاپ وتكەندەي، ءماجبۇرلى ەڭبەكتىڭ جاسىرىن فورماسىنا كەلەدى. ونىڭ ەكسپلۋاتاتسياسى فيزيكالىق زورلىق-زومبىلىقپەن ەمەس، قۇجاتسىزدىق، ءماجبۇرلى ەڭبەك جانە الەۋمەتتىك وقشاۋلاۋ ارقىلى بولدى. جامال 19 جاسىندا بالالار ۇيىندە بىرگە وسكەن ەر ازاماتقا تۇرمىسقا شىعادى. تاتەسىنەن كەتكەن سوڭ، ءومىرىنىڭ باسىم بولىگىن ءتۇرلى قاراعاندى وبلىسىنداعى فەرمەرلىك شارۋاشىلىقتاردا وتكىزدى. سيىر باعۋ، ونى ساۋ، ءۇي شارۋاشىلىعى سياقتى اۋىر جۇمىستاردىڭ بارلىعىن اتقارعان ەكەن. سونداي-اق تاتەسىمەن بايلانىستى تولىقتاي ۇزگەن.
“كوپ ۋاقىت جۇمىس ىستەيسىڭ، اقشانى از تولەيدى نەمەسە مۇلدەم تولەمەيدى. سودان ول جەردەن كەيىن كەتۋگە دە مۇمكىندىك بەرمەيدى»، - دەيدى جامال.
سوڭعى جۇمىس ورنىندا ول التى جىل بويى قۇجاتسىز ءومىر ءسۇردى. سول كەزدە بالاسى دا دۇنيەگە كەلگەن ەكەن. الايدا ونىڭ كۇيەۋىندە دە قۇجات بولماعان. سوزىنشە, ەر ازامات ونى جوعالتىپ العان.
«ولار جىلۋسىز, سىرتتاعى دارەتحاناسى بار شاعىن جەرتولەدە تۇردى. پەش ۇيىقتايتىن بولمەدە بولعان. ول, كۇيەۋى جانە ورتاق بالاسى بىرگە تۇردى. بالاسى دۇنيەگە كەلگەندە جەدەل جاردەم شاقىرىلماعان, ول ەشقاشان تەكسەرۋدەن ءوتپەگەن. بالاسى 6 جاسقا دەيىن قۇجاتسىز ءوستى»، - دەپ داعدارىس ورتالىعىنىڭ ءتورايىمى اڭگىمەنى جالعادى.
ەكسپلۋاتاتسيانىڭ ءداستۇرلى فورمالارىنان بولەك, XXI عاسىردا جاڭا باعىتتار پايدا بولدى. سونىڭ ءبىرى – تسيفرلىق ەكسپلۋاتاتسيا. بۇل فورماعا سايكەس جاستاردى شەتەلگە “ونلاين-جۇمىس” دەپ شاقىرىپ, كەيىن كيبەرفەرمالار مەن ونلاين-الاياقتىق سحەمالارىنا ماجبۇرلەۋ جيىلەدى. قازاقستانداعى جالعان “بانك قىزمەتكەرى” قوڭىراۋلارى سياقتى قىلمىستاردى ورىندايتىن تۇلعالار – جاستار. ولار زاڭسىز ارەكەت جاساعان سوڭ, قىلمىستىق توپقا تاۋەلدى بولىپ, قىلمىستىق قىزمەتتىڭ “قۇلىنا” اينالادى.
سونداي-اق قازىر ەسىرتكى زاتتارىن جاساۋ ارقىلى اقشا العان جاستار كەيىن مانيپۋلياتسيا قۇربانى بولىپ كەتەدى. ساراپشىلار بۇل جاڭا فورمانى“ناركوترافيك” دەپ اتايدى. ال ەكسپلۋاتاتسيانىڭەڭ جاڭا ءتۇرى – ۆەبكام ەكسپلۋاتاتسياسى.
بۇل – ونلاين يندۋسترياداعى سەكسۋالدىق جانە ەڭبەك ازاپتاۋى. “جوعارى تابىس” دەگەن جەلەۋمەن جاس قىزدار مەن جاسوسپىرىمدەر، ونىڭ ىشىندە ۇلدار دا تارتىلىپ، قىلمىستىق سحەمالاردىڭ تۇزاعىنا تۇسەدى.
“ماسەلەن جاستاردى شەتەلدە جۇمىس ىستەۋ نەمەسە ونلاين تابىس تابۋ دەگەن ۋادەمەن تارتىپ، كەيىن ولاردى ونلاين الاياقتىق، قارجى پيراميدالارى نەمەسە كيبەرفەرمالاردا ءماجبۇرلى جۇمىس ىستەۋگە يتەرمەلەيدى… سول سياقتى ەسىرتكى تاراتۋمەن دە بايلانىسى بار. مىسالى, ەسىرتكى جەتكىزۋشى رەتىندە بىرنەشە تاپسىرما ورىنداعان ادام كەيىن ءوز ءىسىنىڭ زاڭسىز ەكەنىن ءتۇسىنىپ، ەكسپلۋاتاتوردىڭ قۇربانىنا اينالادى”، - دەيدى “قايسار” قورىنىڭ جەتەكشىسى.
قازاقستانداعى ماسەلەنىڭ اۋقىمى
قازاقستانداعى ادام ساۋداسى – جاسىرىن، لاتەنتتىك قىلمىس. ساراپشىلاردىڭ ايتۋىنشا، ونىڭ ناقتى اۋقىمىن باعالاۋ قيىن، سەبەبى نەگىزگى كورسەتكىش رەتىندە تىركەلگەن قىلمىستىق ىستەردىڭ سانى شىنايى جاعدايدى تولىق كورسەتە المايدى. سونداي-اق قۇقىقتىق نورمالاردىڭ كەيبىرى اشىقتىقتىڭ جەتكىلىكسىز بولۋىنا اسەر ەتەدى دەيدى ماماندار.
“ماسەلەن جىنىستىق ازاپتاۋعا قاتىستى جاعدايلار بويىنشا ايتار بولساق، كەيبىر زاڭدار وزدەرى-اق اشىقتىقتىڭ بولماۋىنا ىقپال ەتىپ وتىر. مىسالى بۇگىندە كوپتەپ كەزدەسەتىن جابىق ماسساج سالوندارى بار. قۇجاتتا ولار زاڭدى جۇمىس ىستەيدى دەپ كورسەتىلگەنىمەن، ءىس جۇزىندە ءبارى باسقاشا. ماسەلە – اشىقتىقتا ەمەس، قولجەتىمدىلىكتە. نەگە بۇلاي؟ سەبەبى مۇنداي ورىندارعا كىرۋ شەكتەلگەن، ولار جەكە اۋماق. ءدال وسىنداي جاعداي قۇرىلىس سالاسىندا جانە باسقا دا كەيبىر بيزنەس تۇرلەرىندە كەزدەسەدى”، - دەيدى تارابۋكينا.
دەگەنمەن ءبىزدىڭ ەلدە مۇنداي جاعدايلارعا مونيتورينگتىك توپتار، ەڭبەك ينسپەكتسياسى، پروكۋراتۋرا جانە پوليتسيا تارتىلعانىمەن, ولارتىكەلەي تەكسەرۋ جۇرگىزە المايدى. سەبەبى، زاڭ بويىنشا تەك شاعىم بولعان جاعدايدا عانا تەكسەرىس جاسالۋى كەرەك.
The Times Of Central Asia-نىڭ دەرەگىنە سايكەس, وتكەن جىلدىڭ العاشقى جارتىجىلدىعىنىڭوزىندە قازاقستاندا ەڭبەك جانە جىنىستىق ەكسپلۋاتاتسيا قۇربانى بولعان 1891 ادامعا كومەك كورسەتىلگەن. Global Slavery Index (GSI) 2023 جىلعى ەسەبىندە قازاقستاندا ادام ساۋداسىنا قاتىستى قۇرباندار سانى 208 مىڭ ادام بولۋى مۇمكىن دەلىنگەن.
“قايسار” قورىنىڭ جەتەكشىسى وكسانا تارابۋكينانىڭ ۇسىنعان ستاتيستيكالىق دەرەكتەرىندە 2024 جىلى – 445, ال 2025 جىلدىڭ باسىنان شامامەن تامىز ايلارىنا دەيىن 285 قىلمىستىق ءىستىڭ تىركەلگەنى كورسەتىلگەن.
فوتو: وكسانا تارابۋكينادان
“قازىرگى زاماننىڭ ادامى ەمەس سياقتى”
مامانداردىڭ سوزىنشە, ادامداردى وسال توپقااينالدىراتىن الەۋمەتتىك جانە ەكونوميكالىق فاكتورلار كوپ. ەڭ الدىمەن, بۇل ادامنىڭ دەنساۋلىعى مەن فيزيكالىق جاعدايىنا بايلانىستى ەكەن. ءتۇرلى اۋرۋلار, پسيحيكالىق اۋىتقۋلار, دامۋداعى كەشەۋىلدەۋ نەمەسە مۇگەدەكتىك ادامدى ءالسىز ءارى تاۋەلدى كۇيگەتۇسىرەدى. تۇراقتى مەكەنجايى جوق ادامدار, تۇرمىسى قيىن تۇلعالار, تولىق ەمەس وتباسىلاردان شىققاندار, بالالار ۇيىندە ءوسكەندەر, جالعىزباستى انالار مەن ايەل-ميگرانتتار دا وسال توپقا كىرەدى دەيدى ماماندار.
سونداي-اق پسيحولوگيالىق تۇرعىدان ۇزاق مەرزىم بويى قۇجاتسىز ءجۇرۋ، ۇنەمى باقىلاۋ، الەۋمەتتىك وقشاۋلاۋ جانە تۇراقتى قورقىنىش سوزىلمالى تراۆماعا اكەلەدى دەيدى ساراپشىلار. پسيحولوگتاردىڭ ايتۋىنشا، مۇنداي جاعدايدا ادامدا «ليمبو» كۇيى، تۇراقتى الاڭداۋ جانە يەرارحيالىق تاۋەلدىلىك داميدى.
“زەرتتەۋلەر كورسەتكەندەي، قۇجاتقا قاتىستى ماسەلەلەر مەن زاڭسىز مارتەبە ادامدى الەۋمەتتىك، مەديتسينالىق جانە پسيحولوگيالىق قولداۋدان ايىرىپ، تراۆمانىڭ اسەرىن كۇشەيتەدى: سيمپتومدار سوزىلادى، ءوز-ءوزىن قورعاۋ قابىلەتى السىرەيدى، ءومىر ساپاسى مەن فۋنكتسيونالدىق قابىلەتى ناشارلايدى. مىسالى جۇمىس ىستەۋ، قارىم-قاتىناس، كۇندەلىكتى تاپسىرمالاردى ورىنداۋ سياقتى. بۇل – «كومپلەكس PTSD» (قوعامدىقفۋنكتسيونالدىق ديسكريميناتسيا، وزىندىك تۇلعا وزگەرىستەرى) قاۋپىنە اكەلەدى” ،- دەيدى پسيحولوگ ايگۇل ناۋرىزباەۆا.
ايگۇل ناۋرىزباەۆا
قۇجاتسىز ءومىر، ۇزدىكسىز باقىلاۋ جانە الەۋمەتتىك وقشاۋلانۋ كەيىپكەرىمىز جامالدى دا پسيحولوگيالىق تۇرعىدان تولىق تاۋەلدى بولۋعا اكەپ سوقتىردى.
“ول قازىرگى قوعامنان مۇلدەم وقشاۋلانعان. قاراپايىم باتىرمالى تەلەفوندى پايدالانا المايدى, ساۋاتى تومەن. ينتەرنەتتى, QR-كودتاردى تۇسىنبەيدى. قازىرگى زاماننىڭ ادامى ەمەس سياقتى, 44 جاستا بولسا دا. ول – ءۇنسىز عانا ءبارىنورىندايتىن, ەشقاشان شاعىمدانبايتىن ادامدار قاتارىنان”، - دەيءدى قور باسشىسى.
جامالدىڭ سوزىنشە, قاشىپ كەتسە باراتىن جەرىبولماعاندىقتان كەتە الماعان. وعان قولما-قولاقشا بەرمەي, تەك ازىق-تۇلىك پەن ەسكى كيىم بەرگەن ەكەن. ۋاقىت وتە كەلە, قاشۋعا مۇلدەم قورقا باستاپتى.
«سەبەبى قازىرگى الەمدى تۇسىنبەي، قايدا باراتىنىمدى بىلمەدىم», - دەيدى ول.
وعان جۇمىس ىستەگەن فەرمالارىندا ۇنەمى داۋىس كوتەرگەن، ال بۇرىنعى ەڭبەك ورىندارىندا ءتىپتى ۇرىپ-سوققان. الايدا ۇيىم جەتەكشءىسى جامالدىڭ جانجالداسا المايتىنىن ايتادى.
«ول تەك ايتقاندى ءۇنسىز ورىنداعاندى ءجون كورەدى.جۇمىس بەرۋشىلەر جىلدار بويى قۇجات جاساپ بەرەمىز دەپ ۋادە ەتكەنىمەن، ورىنداماعان»، - دەيدى.
ال كوپتەگەن جابىرلەنۋشىلەر ءتىپتى قۇتقارىلعاننان كەيىن دە «قايتا ۇستاپ الادى» نەمەسە «بالاما زيانىن تيگىزەدى» دەگەن قورقىنىشتان ارىلا المايدى ەكەن.
ادىلدىككە اپارعان ءتورت ايلىق جول
جامالدىڭ بۇگىنگى جالعىز ارمانى – وزىنە جانە بالاسىنا قۇجات الىپ، ونى مەكتەپكە بەرۋ. داعدارىس ورتالىعىنا كەلگەننەن كەيىن، ونىڭ قۇقىقتىق ماسەلەسىنىڭ قانشالىقتى كۇردەلى ەكەنى انىقتالدى. تاتەسى ونى بالالار ۇيىنەن الىپ كەتكەنىمەن، قورعانشىلىقتى راسىمدەمەگەن، سوندىقتان قۇجات جاساۋعا زاڭدى وكىل بولا الماعان. ول ەسەيگەننەن كەيىن تۋ تۋرالى كۋالىگىن دە جوعالتقان.
ء“بىز ونىڭ تۋ تۋرالى كۋالىگىن قالپىنا كەلتىردىك، سوتقا دەيىنگى تانۋ پروتسەسىن جۇرگىزدىك. ول قازاقستان ازاماتتىعىن الماعان ەكەن، قازىر ازاماتتىقتى قابىلداۋدا، جسن الىپ جاتىر. وسىلايشا ءبىز ونىڭ قۇجاتتارىن ءتورت ايعا جۋىق ۋاقىت ىشىندە جاسادىق»، – دەپ ءتورايىم تۋىنداعان قيىندىقتاردى اتاپ ءوتتى.
جالپى جامالدىڭ وقيعاسى – قازاقستانداعى ادام ساۋداسىنىڭ جاسىرىن جانە كوپ جاعدايدا قۇجاتسىزدىققا نەگىزدەلگەن ازاپتاۋ جۇيەسىنىڭ ايقىن مىسالى. سونىمەن قاتار ەلدەگى الەۋمەتتىك جۇيەنىڭ ولقىلىقتارىن كورسەتەتىن جۇيەلى پروبلەمانىڭ كورىنىسى.
لۋيزا ءالياسقاروۆا
