الەكساندر لۋكاشەنكو، قاسىم-جومارت توقاەۆ، سادىر جاپاروۆ پەن ۆلاديمير پۋتين ارمەنيانى ەۋروپالىق وداققا كىرۋ نەمەسە ەۋرازيالىق ەكونوميكالىق وداقتاعى (ەاەو) مۇشەلىگىن ساقتاۋ ماسەلەسى بويىنشا مۇمكىندىگىنشە قىسقا مەرزىمدە جالپىحالىقتىق رەفەرەندۋم وتكىزۋگە شاقىردى. بۇل تۋرالى كرەمل سايتىندا جاريالانعان، دەپ حابارلايدى “ادىرنا”.
ء«بىز، بەلارۋس رەسپۋبليكاسى، قازاقستان رەسپۋبليكاسى، قىرعىز رەسپۋبليكاسى جانە رەسەي فەدەراتسياسىنىڭ پرەزيدەنتتەرى، ارمەنيا رەسپۋبليكاسىنىڭ ەۋروپالىق وداققا كىرۋگە باعىتتالعان ارەكەتتەرىن، سونىڭ ىشىندە 2025 جىلى ارمەنيا رەسپۋبليكاسىنىڭ ۇلتتىق جينالىسى ماقۇلداپ، ارمەنيا پرەزيدەنتى قول قويعان “ارمەنيا رەسپۋبليكاسىنىڭ ەۋروپالىق وداققا كىرۋ پروتسەسىن باستاۋ تۋرالى” زاڭىن، سونداي-اق 2026 جىلعى 5 مامىردا وتكەن العاشقى “ارمەنيا – ەۋروپالىق وداق” ءسامميتىنىڭ قورىتىندىسى بويىنشا قابىلدانعان بىرلەسكەن دەكلاراتسيادا ەۋروپالىق وداقتىڭ ارمەنيا ۇكىمەتىنىڭ ەۋروپالىق ۇمتىلىستارىن قولداعانىن ەسكەرە وتىرىپ، ارمەنيانىڭ ەۋروپالىق وداققا دايىندالۋىنا بايلانىستى ەۋرازيالىق ەكونوميكالىق وداققا مۇشە مەملەكەتتەردىڭ ەكونوميكالىق قاۋىپسىزدىگىنە تونەتىن ەلەۋلى تاۋەكەلدەردى جانە وسىعان بايلانىستى وداققا مۇشە ەلدەرگە كەلۋى مۇمكىن زالالدىڭ الدىن الۋ قاجەتتىگىن نازارعا الا وتىرىپ، ارمەنيا رەسپۋبليكاسىندا ەۋروپالىق وداققا كىرۋ نەمەسە ەۋرازيالىق ەكونوميكالىق وداق قۇرامىندا قالۋ ماسەلەسى بويىنشا بارىنشا قىسقا مەرزىمدە جالپىحالىقتىق رەفەرەندۋم وتكىزۋ قاجەت دەگەن ۇستانىمدى قولدايمىز»، – دەلىنگەن كرەمل سايتىندا جاريالانعان مالىمدەمەدە.
سونداي-اق بەلارۋس، قازاقستان، قىرعىزستان جانە رەسەي وكىلدەرى 2026 جىلدىڭ جەلتوقسانىنا دەيىن ارمەنياعا قاتىستى ەاەو تۋرالى شارتتىڭ قولدانىلۋىن توقتاتۋدىڭ ىقتيمال سالدارى جونىندە بايانداما دايىندايتىنى اتاپ وتىلگەن.
