گەرمانيا ۋكرايناعا IRIS-T زەنيتتىك-زىمىران كەشەنىنىڭ جاڭا ۇشىرۋ قوندىرعىسىن بەردى. بۇل تۋرالى ۋكراينا پرەزيدەنتى ۆلاديمير زەلەنسكي مالىمدەدى، دەپ حابارلايدى "ادىرنا".
مەملەكەت باسشىسىنىڭ ايتۋىنشا، رەسەي سوڭعى اپتادا ۋكرايناداعى ازاماتتىق ينفراقۇرىلىم نىساندارىنا جاپپاي شابۋىل جاساعان. اتاپ ايتقاندا، رەسەي اسكەرى 2300 سوققى بەرۋشى دروندى، شامامەن 1560 باسقارىلاتىن اۆياتسيالىق بومبانى جانە ءتۇرلى ۇلگىدەگى 108 زىمىراندى قولدانعان.
زەلەنسكيدىڭ سوزىنشە، گەرمانيا تاراپىنان كورسەتىلىپ جاتقان اسكەري قولداۋ مىڭداعان ادامنىڭ ءومىرىن ساقتاپ قالۋعا مۇمكىندىك بەرىپ وتىر.
«كەشە ءبىز جاڭا IRIS-T ۇشىرۋ قوندىرعىسىن الدىق. ادامداردى قورعاۋعا قوسقان تۇراقتى ۇلەسى ءۇشىن گەرمانياعا العىس بىلدىرەمىز. وسىنداي قۋاتتى قولداۋدىڭ ارقاسىندا مىڭداعان ادامنىڭ ءومىرىن ساقتاپ قالۋعا مۇمكىندىك تۋدى»، – دەدى ۋكراينا پرەزيدەنتى.
سونىمەن قاتار زەلەنسكي ەلگە اۋە شابۋىلىنا قارسى قورعانىس جۇيەلەرىنە ارنالعان قوسىمشا زىمىراندار قاجەت ەكەنىن اتاپ ءوتتى. ونىڭ ايتۋىنشا، رەسەيدىڭ اۋە شابۋىلدارىنىڭ قارقىندىلىعى جوعارى بولىپ وتىرعاندىقتان، ۋكراينا قورعانىس الەۋەتىن كۇشەيتۋگە مۇددەلى.
IRIS-T – گەرمانيادا جاسالعان زاماناۋي اۋە شابۋىلىنا قارسى قورعانىس جۇيەسى. ول درونداردى، ۇشاقتاردى، تىكۇشاقتاردى جانە قاناتتى زىمىرانداردى جويۋعا ارنالعان. سوعىس باستالعالى بەرى گەرمانيا ۋكرايناعا بىرنەشە IRIS-T كەشەنىن جەتكىزىپ، ەلدىڭ اۋە قورعانىسىن نىعايتۋعا قولداۋ كورسەتىپ كەلەدى.
ۋكراينا بيلىگى حالىقارالىق سەرىكتەستەردەن قوسىمشا اۋە قورعانىس قۇرالدارىن بەرۋ ماسەلەسى ەل قاۋىپسىزدىگىن قامتاماسىز ەتۋدەگى باستى باسىمدىقتاردىڭ ءبىرى بولىپ قالا بەرەتىنىن مالىمدەدى.
قازاقستان رەسەيدىڭ «بايتەرەك» كەشەنى بويىنشا ءوز مىندەتتەمەلەرىن ورىنداۋىن كەيىنگە قالدىرۋعا كەلىستى
