رەسەيدىڭ ساحالين وبلىسىنا قاراستى كۋريل ارالدارىندا بەنزين تاپشىلىعى بايقالىپ، اي-92 بەنزينىنىڭ تۇرعىندارعا ساتىلۋى تولىق توقتاتىلدى. بۇل تۋرالى 25 تامىز كۇنى كۋريل مۋنيتسيپالدى وكرۋگىنىڭ باسشىسى كونستانتين يستومين Telegram پاراقشاسىندا جازدى، دەپ حابارلايدى “ادىرنا”.
ونىڭ ايتۋىنشا، قازىرگى ۋاقىتتا اي-92 بەنزينىن ساتۋ ۋاقىتشا توقتاتىلدى – قالعان قور ارنايى تەحنيكالارعا قاجەت. سونىمەن قاتار، ول تۇستەن كەيىن جاڭا بەنزين پارتياسى تۇسىرىلەتىنىن، سودان كەيىن عانا ساتۋ باستالاتىنى تۋرالى قوسىمشا حابارلايتىنىن جەتكىزگەن. الايدا، كەلەسى 17 ساعات ىشىندە وكرۋگ باسشىسىنان بۇل جونىندە قوسىمشا اقپارات جاريالانباعان.
كۋريل ارالدارىندا بەنزينگە شەكتەۋلەر 20 تامىزدان باستاپ كۇشىنە ەندى
The Moscow Times باسىلىمىنىڭ مالىمەتىنشە، 20 تامىزدان باستاپ كۋريل ارالدارىندا جانارماي ساتۋ شەكتەلدى – ءبىر ادامعا 10 ليتردەن ارتىق بەنزين بەرىلمەيدى. ال 17 تامىزدان باستاپ كورشىلەس پريمورەدە بەنزين تاپشىلىعى بايقالىپ، جانارماي قۇيۋ بەكەتتەرىندە ۇزىن-سونار كەزەكتەر پايدا بولدى. وتكەن اپتادا زابايكالە مەن رەسەي اننەكسيالاعان قىرىمدا جانارمايدى تالونمەن ساتۋ قايتا ەنگىزىلگەن.
The Moscow Times جازعانداي، تامىز ايىندا كەمىندە جەتى ءىرى مۇناي زاۋىتىنا دروندار شابۋىل جاساپ، ونىڭ بەسەۋى – نوۆوكۋيبىشەۆ، سىزران، ۆولگوگراد، ساراتوۆ جانە ريازان زاۋىتتارى جارتىلاي نەمەسە تولىق توقتاپ قالعان. بۇل وقيعالار رەسەيدى جانارماي تاپشىلىعى داعدارىسىنا الىپ كەلدى.
باسىلىمنىڭ ەسەپتەۋىنشە، 2025 جىلدىڭ جازىندا رەسەيدىڭ مۇناي وڭدەۋ قۋاتىنىڭ شامامەن 13 پايىزى نەمەسە جىلىنا 44 ملن توننا كولەمى ىستەن شىققان.
1 تامىز كۇنى Reuters اگەنتتىگى تامىز-قىركۇيەك ايلارىندا رەسەيدە بەنزين جەتكىزۋدە ۇزىلىستەر بولادى دەپ حابارلاعان. اگەنتتىكتىڭ نارىقتاعى دەرەككوزدەرىنىڭ ايتۋىنشا، ەكسپورتقا تىيىم سالىنعانىنا قاراماستان، ەل ىشىندە بەنزين باعاسى وسە بەرگەن، ءارى دەفيتسيت قاۋپى دە ارتقان.
«تامىز-قىركۇيەك ايلارى وتە قيىن بولماق. كەي جەرلەردە جەرگىلىكتى دەڭگەيدە تاپشىلىق بولۋى مۇمكىن. بۇل 2023 جانە 2021 جىلدارداعى جانارماي داعدارىستارىن ەسكە سالادى»، – دەگەن ءبىر ساراپشى.
ونىڭ ايتۋىنشا، قازان ايىندا عانا باعانىڭ ءتۇسۋى مۇمكىن، سەبەبى سۇرانىس ازايادى.
ساراپشىلار بەنزين تاپشىلىعىنىڭ باستى سەبەبىن – جەكە مەنشىك جانارماي قۇيۋ بەكەتتەرىنىڭ الدىن الا قور جاساماۋىنان كورەدى. بۇعان سەبەپ – نەسيە پايىزدارىنىڭ بيىل ايتارلىقتاي كوتەرىلۋى، سونىڭ سالدارىنان كوپ كاسىپكەرلەر قىس پەن كوكتەمدە ارزان بەنزين ساتىپ الا الماعان. سونىمەن بىرگە، ۇشاق رەيستەرىنىڭ ءجيى كەشىگۋى دە بەنزينگە دەگەن سۇرانىستى وسىرگەن بولۋى مۇمكىن.
ايتا كەتەيىك، 2024 جىلى رەسەي مۇناي وڭدەۋ زاۋىتتارىنا جاسالعان درون شابۋىلدارىنان كەيىن ەل بيلىگى بەنزين ءوندىرىسى تۋرالى رەسمي ستاتيستيكانى قۇپيا ەتتى، كەيىن بۇل تىزىمگە ديزەل دە كىردى. Reuters اگەنتتىگىنىڭ مالىمەتىنشە، 2024 جىلى رەسەيدىڭ مۇناي وڭدەۋ كولەمى 12 جىلداعى ەڭ تومەن كورسەتكىشكە – 269,9 ملن تونناعا دەيىن تومەندەگەن.
رەسەيدە تامىز ايىنىڭ سوڭىنا دەيىن بەنزين ەكسپورتتاۋعا تولىق تىيىم سالىندى
رەسەي ۇكىمەتى تامىز ايىنىڭ سوڭىنا دەيىن بەنزين ەكسپورتتاۋعا تولىق تىيىم سالۋ تۋرالى شەشىم قابىلدادى. 28 شىلدەدە جاريالانعان قاۋلىدا: «بۇل شەشىم ىشكى نارىقتاعى تۇراقتىلىقتى ساقتاۋ جانە اۋىل شارۋاشىلىعى ناۋقانى كەزىندە قاجەتتىلىكتى قامتاماسىز ەتۋ ءۇشىن قابىلداندى»، – دەلىنگەن.
سونداي-اق، اقپان ايىنىڭ سوڭىندا ۇكىمەت 31 تامىزعا دەيىن بەنزين ەكسپورتتاۋعا تىيىمدى ۇزارتقان بولاتىن – بۇل تىيىم ءوندىرۋشى ەمەس ۇيىمدارعا، ياعني ترەيدەرلەر، مۇناي بازالارى مەن شاعىن زاۋىتتارعا قاتىستى ەدى. ال شىلدە ايىنداعى جاڭا قاۋلى ءوندىرۋشى كومپانيالارعا دا ەكسپورتتاۋعا تىيىم سالىپ وتىر.
2025 جىلدىڭ شىلدەسىنىڭ سوڭىندا اي-95 بەنزينىنىڭ باعاسى تونناسىنا 76 330 رۋبلگە دەيىن جەتتى. بۇل 2024 جىلعى ەڭ جوعارى كورسەتكىشتەن (74 416 رۋبل) اسىپ ءتۇسىپ، 2023 جىلعى تاريحي رەكوردقا (76 876 رۋبل) جاقىندادى، ول كەزدە دە رەسەيدە جانارماي باعاسى داعدارىسى بولعان.
