ارمەنيا پرەمەر-ءمينيسترى نيكول پاشينيان ەلدىڭ ەۋروپالىق وداققا قوسىلۋى مەن ەۋرازيالىق ەكونوميكالىق وداق قۇرامىنان شىعۋى تۋرالى رەفەرەندۋمدى ءدال قازىر وتكىزۋدىڭ نەگىزى جوق ەكەنىن مالىمدەدى، دەپ حابارلايدى «ادىرنا» ءتىلشىسى DW-گە سىلتەمە جاساپ.
ايتۋىنشا، مۇنداي باستاما «لوگيكاعا ساي ەمەس».
«ەاەو مەن ەو اراسىندا تاڭداۋ جاساۋ قاجەتتىلىگى تۋىندامايىنشا، ءبىز ەاەو اياسىندا جۇمىسىمىزدى جالعاستىرا بەرەمىز»، – دەدى پاشينيان.
ونىڭ سوزىنشە، بۇگىندە بۇل تاڭداۋ تەك تەوريالىق سيپاتتا عانا، سوندىقتان تەوريالىق ماسەلەنى رەفەرەندۋمعا شىعارۋ ورىندى ەمەس.
ارمەنيا پرەمەرى رەفەرەندۋم وتكىزۋ ماسەلەسىن ەل رەسمي تۇردە ەو مۇشەلىگىنە ءوتىنىش بەرگەن نەمەسە كانديدات مارتەبەسىن الۋعا جاقىنداعان كەزەڭگە دەيىن كەيىنگە قالدىرۋدى ۇسىندى. سول ۋاقىتقا دەيىن ارمەنيا ەاەو قۇرامىندا «بەيبىت جاعدايدا، داۋ-دامايسىز» جۇمىسىن جالعاستىرادى. پاشينيان بۇل باعىتتا ەلدىڭ ءالى دە پايدالانۋعا بولاتىن الەۋەتى بار ەكەنىن اتاپ ءوتتى.
وسىلايشا پاشينيان مامىر ايىنىڭ سوڭىندا رەسەي پرەزيدەنتى ۆلاديمير پۋتين كوتەرگەن رەفەرەندۋم وتكىزۋ تۋرالى باستاماعا جاۋاپ بەردى. كەيىن بۇل ۇسىنىستى ەاەو-عا مۇشە تاعى ءۇش ەلدىڭ باسشىلارى دا قولداعان.
كرەملدىڭ رەسمي سايتى جاريالاعان بىرلەسكەن مالىمدەمەدە ارمەنيادان ەۋروپالىق وداققا كىرۋ مەن ەاەو مۇشەلىگىن ساقتاۋ اراسىندا ناقتى تاڭداۋ جاساۋدى تالاپ ەتكەن.
قۇجاتتا: «ارمەنيا رەسپۋبليكاسىندا مۇمكىندىگىنشە قىسقا مەرزىمدە ەۋروپالىق وداققا كىرۋ نەمەسە ەۋرازيالىق ەكونوميكالىق وداق قۇرامىندا قالۋ ماسەلەسى بويىنشا جالپىحالىقتىق رەفەرەندۋم وتكىزۋ قاجەت دەگەن ۇستانىمدى قولدايمىز»، – دەلىنگەن.
استانادا وتكەن جيىندا قابىلدانعان مالىمدەمە اۆتورلارى ارمەنيانىڭ ەو-عا كىرۋگە دايىندالۋى ەاەو-عا مۇشە مەملەكەتتەردىڭ ەكونوميكالىق قاۋىپسىزدىگىنە ەلەۋلى تاۋەكەلدەر تۋدىرۋى مۇمكىن ەكەنىن دە اتاپ ءوتتى.
سوڭعى ۋاقىتتا رەسەي ارمەنيانىڭ ەۋرووداقپەن جاقىنداسۋىنا بايلانىستى قىسىمدى كۇشەيتىپ وتىر. بۇل جاعداي 7 ماۋسىمعا جوسپارلانعان پارلامەنتتىك سايلاۋ قارساڭىندا بايقالۋدا. رەسەيدىڭ ۆەتەرينارلىق جانە فيتوسانيتارلىق باقىلاۋ قىزمەتى بىرقاتار ارميان ونىمدەرىنىڭ، سونىڭ ىشىندە مينەرالدى سۋ، كوكونىس جانە كونياكتىڭ يمپورتىنا شەكتەۋ قويدى. سونىمەن قاتار رەسەي ەنەرگەتيكا مينيسترلىگى ارمەنياعا مۇناي ونىمدەرىن، تابيعي گازدى جانە وڭدەلمەگەن المازداردى باجسىز جەتكىزۋ جونىندەگى كەلىسىمدى توقتاتۋى مۇمكىن ەكەنىن مالىمدەدى.
ءپۋتيننىڭ ايتۋىنشا، ەو مەن ەاەو مۇشەلىگىن قاتار الىپ ءجۇرۋ مۇمكىن ەمەس. ول سونداي-اق «ۋكراينالىق ستسەناري» كيەۆتىڭ ەۋرووداققا كىرۋگە ۇمتىلىسىنان باستالعانىن مالىمدەدى.
30 مامىردا ماسكەۋ ءوز ەلشىسىن ارمەنيادان «كەڭەس الۋ ءۇشىن» كەرى شاقىردى. كرەملدىڭ حابارلاۋىنشا، 1 ماۋسىمدا پۋتين مەن پاشينيان تەلەفون ارقىلى سويلەسكەن. رەسەي پرەزيدەنتى ارميان پرەمەرىن تۋعان كۇنىمەن دە قۇتتىقتاعان. ال پاشينيان ارمەنيا مەن رەسەي اراسىنداعى قارىم-قاتىناستاردىڭ «ترانسفورماتسيا كەزەڭىندە» تۇرعانىن ايتتى.
