قازاقستاننىڭ ەنەرگەتيكا ءمينيسترى ەرلان اقكەنجەنوۆتىڭ ايتۋىنشا، كاسپي قۇبىر كونسورتسيۋمىنا (كقك) قازىرگى تاڭدا بالاما باعىت جوق. بۇل تۋرالى ول استانادا وتكەن جوعارى ەۋرازيالىق ەكونوميكالىق كەڭەس وتىرىسىنىڭ كۋلۋارىندا مالىمدەدى، دەپ حابارلايدى "ادىرنا".
ءمينيستردىڭ سوزىنشە، كقك-نىڭ جىلدىق تاسىمالداۋ قۋاتى شامامەن 82 ملن توننا مۇنايدى قۇرايدى جانە بۇل كولەمدى الماستىراتىن باسقا قۇبىر جەلىسى ازىرگە جوق. سوندىقتان ونى «بالاما باعىت» دەپ اتاۋ دۇرىس ەمەس، تەك قوسىمشا باعىتتار قاراستىرىلۋدا.
"قازىرگى ۋاقىتتا كقك 82 ميلليون توننا مۇناي تاسىمالداۋعا قاۋقارلى. بۇل وسى قۇبىردىڭ قۋاتى. بۇگىندە وعان بالاما جوق. (...) قازىر قازاقستاننان حالىقارالىق نارىقتارعا وسىنشاما كولەمدى (60-70 ميلليون توننا - رەد. ەسك.) تاسىمالداي الاتىن بالاما نەمەسە باسقا قۇبىر جوق. سوندىقتان ءبىزدىڭ ايتىپ وتىرعانىمىزدىڭ ءبارى - قوسىمشا باعىتتار", - دەدى اقكەنجەنوۆ.
مينيستر قازاقستان مۇناي تاسىمالداۋ ءۇشىن كەز كەلگەن قوسىمشا باعىتتى قاراستىرىپ جاتقانىن ايتىپ ءوتتى.
"بىزدە قازاقستان - قىتاي قۇبىرى بار، قازىر كەيبىر كولەمدەردى كاسپي تەڭىزى ارقىلى، ازەربايجان ارقىلى، سونداي-اق اقتاۋ - ماحاچكالا ارقىلى تاسىمالداپ جاتىرمىز. سوندىقتان مۇنىڭ ءبارى قوسىمشا باعىتتار", - دەپ اتاپ ءوتتى ول.
