فيلولوگ، ادەبيەت سىنشىسى، رەجيسسەر، قازاق مادەنيەتىنىڭ ارداگەرى عالىم دوسكەن قايتىس بولدى، دەپ حابارلايدى "ادىرنا" ۇلتتىق پورتالى.
بۇل تۋرالى بازاربەك اعىتاي حابارلادى.
"جارىق دۇنيەدەن قازاقتىڭ اردا ازاماتى عالىم دوسكەن دە ءوتتى..." - دەپ جازدى ول ءوز پاراقشاسىندا.
جۋرناليست بولات ءمۇرسالىم دە قارالى حاباردى جەتكىزدى.
“قاشان كورسەڭ جايدارى، سويلەپ كەتكەندە ارعى مەن بەرگىنى، باتىس پەن شىعىستى ساپىرىپ وتىراتىن، قازاقتىڭ ءانىن، كۇيىن، جالپى ۇلتتىق دۇنيەسىن تۇگەندەپ، سونىڭ جوقشىسى بولا بىلگەن عالىم اعامىز و دۇنيەلىك بولعان ەكەن. عالىم اعاداي بيىك، عالىم اعاداي پاراساتتى باسقا ادامدى دۇنيەدە كەزىكتىردىم بە، جوق پا، بىلمەيمىن. قاباعى تۇكسيىپ، كۇركىرەگەن كۇندەي كورىنگەنىمەن، جانى بالاداي نازىك، دوسىنا اسىق، توڭىرەگىنە جيعان باۋىر-قارىنداستارىنا اكەدەي قامقور جان ەدى”، – دەپ ەسكە الدى.
عالىم دوسكەن 1960 جىلى 19 شىلدەدە دۇنيەگە كەلگەن. ول — فيلولوگ، ادەبيەت سىنشىسى، رەجيسسەر جانە ستسەناريست. اباي اتىنداعى قازاق پەداگوگيكالىق ينستيتۋتىنىڭ تۇلەگى.
كوپ جىل بويى وتاندىق تەلەراديو سالاسىندا جەمىستى ەڭبەك ەتتى.
2001–2002 جىلدارى «قازاقستاننىڭ رەسپۋبليكالىق تەلەۆيدەنيە جانە راديو كورپوراتسياسى» جاق باسقارما توراعاسىنىڭ ءبىرىنشى ورىنباسارى قىزمەتىن اتقاردى.
2002–2006 جىلدارى – «قازاقستان» رترك» اق باسقارما توراعاسى بولدى.
ال 2007 جىلدان باستاپ – «ەل» پروديۋسەرلىك ورتالىعىنىڭ كوركەمدىك جەتەكشىسى بولىپ قىزمەت اتقارعان.
ول «ساۋلەنى كۇتۋ»، «ۇلى دالا استانالارى»، «ماڭعىستاۋ قابىرلەرىنىڭ ءتۇسى»، «جوعالعان جارىق حرونيكاسى» سىندى دەرەكتى فيلمدەردىڭ اۆتورى. سونىمەن قاتار، «توعىز قۇيرىقتى اق تۇلكى»، «سيقىرلى فلەيتا»، «بيلەيتىن قۇس» كىتاپتارىن جازىپ، «جەزتىرناق» بالەتىنىڭ ليبرەتتوسىن جازعان.
