وزبەك جازۋشىسى حاميد يسمايلوۆ 2026 جىلعى ادەبيەت سالاسىنداعى نوبەل سىيلىعىنا ۇمىتكەر بولۋى مۇمكىن اۆتورلار تىزىمىنە ەندى. بۇل تۋرالى 24.kg جازدى، دەپ حابارلايدى «ادىرنا» ءتىلشىسى.
يسمايلوۆتان بولەك، اتالعان تىزىمدە الەمگە ايگىلى جازۋشىلار حارۋكي مۋراكامي، مارگارەت ەتۆۋد، سالمان رۋشدي، دەۆيد گروسسمان، دجوان روۋلينگ جانە ستيۆەن كينگتىڭ ەسىمدەرى دە اتالعان.
نوبەل سىيلىعىنىڭ ەرەكشەلىكتەرىنىڭ ءبىرى – ادەبيەت سالاسىنداعى سىيلىققا ۇسىنىلعان كانديداتتار مەن ولاردى ۇسىنعان تۇلعالار تۋرالى مالىمەتتەردىڭ 50 جىل بويى قۇپيا ساقتالۋى. نوبەل سىيلىعىنىڭ رەسمي بازاسىندا دا جاڭا نوميناتسيالار تۋرالى اقپارات وسى مەرزىم وتكەننەن كەيىن عانا جاريالاناتىنى كورسەتىلگەن. سوندىقتان حاميد يسمايلوۆتىڭ 2026 جىلعى سىيلىققا شىنىمەن ۇسىنىلعانىن قازىرگى ۋاقىتتا رەسمي تۇردە راستاۋ مۇمكىن ەمەس.
حاميد يسمايلوۆ شىعارمالارىن وزبەك جانە ورىس تىلدەرىندە جازادى. ونىڭ ەڭبەكتەرى اعىلشىن، تۇرىك، نەمىس جانە فرانتسۋز تىلدەرىنە اۋدارىلعان. 2019 جىلى ول «The Devil’s Dance» («جىنداردىڭ ءبيى») رومانى ءۇشىن ەۋروپالىق قايتا قۇرۋ جانە دامۋ بانكىنىڭ (ەقدب) ادەبي سىيلىعىن العان. سونداي-اق ونىڭ «We Computers» شىعارماسى ەقدب-نىڭ 2026 جىلعى ادەبي سىيلىعىنىڭ قىسقا تىزىمىنە ەنگەن.
جازۋشى 1954 جىلعى 5 مامىردا قىرعىزستاننىڭ شۋ وبلىسىنداعى توقماق قالاسىندا دۇنيەگە كەلگەن.
يسمايلوۆ اسكەري بايلانىس ۋچيليششەسىن ءتامامداپ، كەيىن تاشكەنت مەملەكەتتىك ۋنيۆەرسيتەتىنىڭ بيولوگيا، زاڭ جانە مەنەدجمەنت فاكۋلتەتتەرىن بىتىرگەن.
1992 جىلى ول ۇلىبريتانياعا قونىس اۋدارىپ، 25 جىل بويى BBC دۇنيەجۇزىلىك قىزمەتىندە جۇمىس ىستەگەن. 2006 جىلى ونىڭ «تەمىرجول» رومانى بەلگىلى جازۋشى ءارى اۋدارماشى روبەرت چاندلەردىڭ اۋدارۋىمەن اعىلشىن تىلىندە لوندوندا جارىق كورگەن. ال اقىننىڭ ولەڭدەرىن نەمىس تىلىنە ينگەبورگا بالداۋف پەن زيگريد كلياينميحەل اۋدارعان.
2019 جىلى يسمايلوۆتىڭ «جىندار ءبيى» رومانى ەۋروپالىق قايتا قۇرۋ جانە دامۋ بانكىنىڭ ادەبي سىيلىعىنا يە بولدى.
جازۋشىنىڭ ەسىمى Literary Hub باسىلىمى جاريالاعان ادەبيەت سالاسىنداعى نوبەل سىيلىعىنا قاتىستى بۋكمەكەرلىك بولجامداردا دا اتالادى.
يسمايلوۆتىڭ كانديداتۋراسىنا قاتىستى پىكىر بىلدىرگەن قىرعىزستاننىڭ مەملەكەتتىك حاتشىسى ارسلان قويشيەۆ جازۋشىنىڭ قىرعىز تەگىنەن شىققانىن ايتتى.
«بەدەلدى سىيلىققا بايلانىستى جازۋشى حاميد يسمايلوۆتىڭ ەسىمى ءجيى اتالىپ جاتىر. شىن مانىندە، ول شىعۋ تەگى بويىنشا قىرعىز، اديگينە تايپاسىنىڭ ءبورى رۋىنان تارايدى. بىراق ونىڭ وزبەك حالقىنىڭ پاتريوتى ەكەنىن مويىنداۋىمىز كەرەك»، – دەپ جازدى ارسلان قويشيەۆ Facebook پاراقشاسىندا.
ايتا كەتەيىك، قويشيەۆ تە يسمايلوۆ سياقتى ۇزاق جىلدار بويى BBC-دە قىزمەت اتقارعان. ول 1996–2010 جىلدارى كورپوراتسيانىڭ قىرعىز قىزمەتىندە پروديۋسەر بولعان.
2026 جىلعى ادەبيەت سالاسىنداعى نوبەل سىيلىعىنىڭ لاۋرەاتى 8 قازاندا ستوكگولمدە جاريالانادى. جەڭىمپازعا 12 ميلليون شۆەد كرونى (شامامەن 1,2 ميلليون دوللار) تابىستالادى. سىيلىقتى تاپسىرۋ ءراسىمى 10 جەلتوقساندا وتەدى.
وتكەن جىلى ادەبيەت سالاسىنداعى نوبەل سىيلىعى ۆەنگر جازۋشىسى لاسلو كراسناحوركايگە بەرىلگەن بولاتىن.
