تۇركىستان قالاسىنىڭ اكىمى ازىمبەك پازىلبەكۇلى قالا اۋماعىندا بوي كوتەرىپ جاتقان الەۋمەتتىك ماڭىزى بار نىساندار مەن ينفراقۇرىلىمدىق جوبالاردىڭ قۇرىلىس بارىسىمەن تانىستى.
الدىمەن قالا باسشىسى جاڭادان سالىنىپ جاتقان ونەر ورتالىعىنىڭ قۇرىلىس الاڭىنا بارىپ، نىسانداعى جۇمىستاردى تەكسەردى. قازىرگى تاڭدا ونەر ورتالىعىنىڭ قۇرىلىس جۇمىستارىنىڭ 95 پايىزى اياقتالعان. انىقتالعان بىرقاتار كەمشىلىكتەردى جويۋ جۇمىستارى جۇرگىزىلۋدە. اكىم نىساننىڭ ساپالى ءارى ۋاقىتىلى اياقتالۋىن قاداعالاۋ قاجەتتىگىن اتاپ ءوتىپ، مەردىگەر مەكەمەلەرگە تاپسىرمالار بەردى.
سونداي-اق، قالا اكىمى بەكزات ىقشام اۋدانى مەن ابىلايحان كوشەسىندە سالىنىپ جاتقان جاياۋ جۇرگىنشىلەر كوپىرلەرىنىڭ قۇرىلىس بارىسىمەن تانىستى.
تۇركىستان ستانتسياسىنىڭ تۇسىندا ورنالاسقان ۇزىندىعى 46 مەترلىك جاياۋ جۇرگىنشىلەر كوپىرىنىڭ قۇرىلىسى 90 پايىزعا ورىندالعان. ال تۇرىك اۋىلىنداعى ۇزىندىعى 141,7 مەتر بولاتىن جاياۋ جۇرگىنشىلەر كوپىرىنىڭ جۇمىستارى 65 پايىزعا جەتكەن.
ازىمبەك پازىلبەكۇلى اتالعان جوبالاردىڭ قالا تۇرعىندارى ءۇشىن الەۋمەتتىك ماڭىزى زور ەكەنىن اتاپ ءوتىپ، ساپانى باستى نازاردا ۇستاي وتىرىپ، بەلگىلەنگەن مەرزىمدە تولىق اياقتاۋدى مەردىگەر مەكەمەلەرگە تاپسىردى.
ۇقساس جاڭالىقتار
