الماتى وبلىسىنىڭ اكىمى مارات سۇلتانعازيەۆ ورتالىق كوممۋنيكاتسيالار قىزمەتىندە وتكەن بريفينگتە اگروونەركاسىپ كەشەنىنىڭ ينفراقۇرىلىمىن دامىتۋ بويىنشا جوسپارلار مەن اتقارىلىپ جاتقان جۇمىستاردى باياندادى. ونىڭ ايتۋىنشا، وڭىردە سۋارمالى جەرلەردى كەڭەيتۋ جانە سۋ ۇنەمدەۋ تەحنولوگيالارىن ەنگىزۋ باستى باسىمدىقتاردىڭ ءبىرى بولىپ وتىر.
قازىرگى وزەكتى ماسەلەلەردىڭ ءبىرى – 9 مىڭ شاقىرىم يرريگاتسيا جەلىلەرىنىڭ 60%-ى توزىپ، سۋ شىعىنى 50%-دى قۇراپ وتىر.
اكىمنىڭ مالىمەتىنشە، الداعى جىلدارى سۋارۋ جەلىلەرىن جاڭعىرتۋعا يسلام دامۋ بانكى ارقىلى 255 ملرد تەڭگە باعىتتاۋ جوسپارلانعان. ناتيجەسىندە بالقاش، ەڭبەكشىقازاق، جامبىل، رايىمبەك جانە ۇيعىر اۋداندارىندا سۋارۋ جەلىلەرى جاڭعىرتىلىپ، 111 مىڭ گەكتار جەر اينالىمعا قوسىلادى.
وڭىردە اۋىل شارۋاشىلىعى ماقساتىنداعى پايدالانىلماعان جەرلەردى انىقتاپ، مەملەكەت مەنشىگىنە قايتارۋ جۇمىستارى دا جالعاسىپ جاتىر. 2022-2025 جىلدار ارالىعىندا 528 مىڭ گەكتار پايدالانىلمايتىن جەر مەملەكەت مەنشىگىنە قايتارىلىپ، ونىڭ 340 مىڭ گەكتارى قايتادان اينالىمعا ەنگىزىلدى.
سونىمەن قاتار، تۇرعىنداردى اۋىل كاسىپكەرلىگىنە تارتۋعا باعىتتالعان «اۋىل اماناتى» باعدارلاماسى شەڭبەرىندە بۇگىنگە دەيىن 11 ملرد تەڭگەگە 1 373 شاعىن نەسيە بەرىلگەن.
مارات سۇلتانعازيەۆتىڭ ايتۋىنشا، بۇل شارالار اۋىلداعى تابىستى دا وسىرگەن. اۋىل حالقىنىڭ ورتاشا تابىسى 22,7% ارتىپ، 311,4 مىڭ تەڭگەگە جەتتى.
