تۇركىستان قالاسىندا كولىك قوزعالىسىن رەتتەۋ جانە تۇرعىندارعا قولايلى جاعداي قالىپتاستىرۋ ماقساتىندا جول ينفراقۇرىلىمىن دامىتۋ جۇمىستارى جۇيەلى تۇردە جۇرگىزىلۋدە.
قازىرگى ۋاقىتتا بەكزات تۇرعىن الابىندا ۇزىندىعى 8,4 شاقىرىمدى قۇرايتىن 5 كوشەدە ورتاشا جوندەۋ جۇمىستارى اتقارىلۋدا. جوندەۋ بارىسىندا جول نەگىزىن دايىنداۋ، ءىرى جانە ۇساق تۇيىرشىكتى اسفالت جابىندىسىن توسەۋ، جول جيەكتەرىن رەتكە كەلتىرۋ، سونداي-اق ءبىر جاقتى اياقجول سالۋ جۇمىستارى جۇرگىزىلۋدە.
سونىمەن قاتار، وتىرار تۇرعىن الابىندا جالپى ۇزىندىعى 24,6 شاقىرىم بولاتىن 28 كوشەنى ورتاشا جوندەۋ جۇمىستارى قولعا الىنعان. بۇل كوشەلەردىڭ قاتارىندا شايان، ويسىلقارا، كەلەس جانە ولارعا ىرگەلەس وزگە دە كوشەلەر بار.
ايتا كەتەيىك، تۇركىستان قالاسى اۋماعىندا ۇزىندىعى 845 شاقىرىمدى قۇرايتىن 875 كوشە ورنالاسقان. 2024 جىلدىڭ قورىتىندىسى بويىنشا ولاردىڭ 50,3 پايىزى جاقسى جانە قاناعاتتانارلىق جاعدايدا دەپ باعالانعان.
بيىل قوسىمشا 138,5 شاقىرىم جولدى ورتاشا جوندەۋدەن وتكىزۋ جوسپارلانعان. اتالعان جۇمىستار تولىق ورىندالعان جاعدايدا، قالاداعى جاقسى جاعدايداعى جولداردىڭ ۇلەسى 66,7 پايىزعا جەتەدى.
ۇقساس جاڭالىقتار
