تۇركىستان قالاسىنىڭ اكىمى ازىمبەك پازىلبەكۇلى قالا اۋماعىن كوگالداندىرۋ جانە ينفراقۇرىلىمدىق نىسانداردىڭ قۇرىلىس بارىسىمەن تانىستى.
شاھار باسشىسى الدىمەن ب.ساتتارحانوۆ داڭعىلىندا اتقارىلىپ جاتقان گۇل ەگۋ جۇمىستارىن، اۋەجاي جولى بويىنداعى كوگالداندىرۋ شارالارىن، سونداي-اق س.قوجانوۆ كوشەسىنىڭ اباتتاندىرىلۋ بارىسىن باقىلادى. سونىمەن قاتار، اينالما جول اۋماعىندا جۇرگىزىلىپ جاتقان جۇمىستارمەن دە تانىستى.
قالانىڭ نەگىزگى ماگيسترالدى كوشەلەرى – اۋەجاي تاس جولى مەن ب.ساتتارحانوۆ داڭعىلى بويىندا ءتۇرلى اعاش تۇرلەرى وتىرعىزىلۋدا. ال اتالعان جولداردىڭ قيىلىسىنا 21 791 شارشى مەتردى قۇرايتىن «لاۆاندا القابىن» سالۋ جوسپارلانۋدا.
بيىلعى جىلى تۇركىستان قالاسى بويىنشا كوگالداندىرۋ جۇمىستارى جالپى 772 گەكتار اۋماقتى قامتىپ وتىر. جوسپارعا سايكەس، جىل سوڭىنا دەيىن 238 مىڭنان استام اعاش پەن بۇتالاردى ەگۋ كوزدەلگەن. ونىڭ ىشىندە كوكتەمگى ماۋسىمدا 80 375 ءتۇپ اعاش پەن 67 310 ءتۇپ بۇتا وتىرعىزىلسا، كۇزگى كەزەڭدە قوسىمشا 134 250 ءتۇپ اعاش جانە 129 350 ءتۇپ بۇتا ەگىلەدى.
سونىمەن قاتار، 128 گەكتار اياقجول اۋماقتارىندا كوگالداندىرۋ جۇمىستارى جۇرگىزىلۋدە.
قالا اۋماعىنداعى ءىرى ينفراقۇرىلىمدىق جوبالاردىڭ ءبىرى – كەنتاۋ تاس جولى بويىنداعى اينالما جول قۇرىلىسى. جالپى اۋماعى 17,8 گەكتاردى قۇرايتىن بۇل نىساندا 150 770 شارشى مەتر جەرگە كوگالداندىرۋ جۇمىستارى جۇرگىزىلۋدە. 2022 جىلى باستالعان جوبانىڭ مەردىگەرى – «GARANT STROY KZ» جشس. بۇگىنگى تاڭدا قۇرىلىس جۇمىستارىنىڭ 50%-ى اياقتالدى. جوبا اياسىندا اينالما جولمەن قاتار جەلىلىك ساياباق تا سالىنىپ جاتىر.
كەزدەسۋ بارىسىندا قالا اكىمى جاۋاپتى مەكەمە باسشىلارىنا كوگالداندىرۋ جانە قۇرىلىس جۇمىستارىن ساپالى ءارى بەلگىلەنگەن مەرزىمدە اياقتاۋدى تاپسىردى. سونىمەن بىرگە ەگىلگەن اعاشتار مەن گۇلدەردىڭ كۇتىمىن جۇيەلى ۇيىمداستىرۋدى، اباتتاندىرۋ ءىس-شارالارىن ماۋسىمدىق جوسپارعا سايكەس جۇرگىزۋدى مىندەتتەدى.
ۇقساس جاڭالىقتار
