تۇركىستان قالاسىنىڭ اكىمى ازىمبەك پازىلبەكۇلىنىڭ توراعالىعىمەن كەزەكتى اپپاراتتىق ءماجىلىس ءوتتى. كۇن تارتىبىندە ەكى نەگىزگى ماسەلە قارالدى — قىسقى جىلىتۋ ماۋسىمىنا دايىندىق بارىسى جانە كۇزگى اسكەرگە شاقىرۋ جۇمىستارىنىڭ ۇيىمداستىرىلۋى.
ءبىرىنشى ماسەلە بويىنشا كوممۋنالدىق شارۋاشىلىق ءبولىمىنىڭ باسشىسى ارمان وڭالحانۇلى بايانداما جاساپ، جىلىتۋ جۇيەلەرىنىڭ اعىمداعى جاعدايى مەن الداعى ماۋسىمعا ازىرلىك جۇمىستارىن باياندادى.
قازىرگى تاڭدا جالپى 12 561 تۇتىنۋشى ورتالىقتاندىرىلعان جىلۋمەن قامتىلعان، ونىڭ ىشىندە 223 كوپقاباتتى تۇرعىن ءۇي، 18 بيۋدجەتتىك نىسان، 55 كاسىپكەرلىك سۋبەكتىسى جانە 36 جەكە تۇرعىن ءۇي بار.
2025–2026 جىلدارداعى جىلۋ ماۋسىمىنا دايىندىق جۇمىستارى ءساۋىر ايىندا باستالىپ، بارلىق قازاندىقتار مەن جىلۋ جۇيەلەرى قىسىمداۋ جانە شايۋ سىناعىنان وتكەن. انىقتالعان اقاۋلار تولىق جوندەلىپ، قازىرگى تاڭدا ىستىق سۋمەن قامتاماسىز ەتۋ تۇراقتى جۇرگىزىلۋدە.
قازان ايىندا ماۋسىم باستالار الدىندا قوسىمشا سىناق جۇمىستارى وتكىزىلمەك. ارمان وڭالحانۇلىنىڭ ايتۋىنشا، بۇگىندە قالا قىسقى جىلۋ جۇيەسىنە تولىق دايىن.
قالا اكىمى 13 قازانعا دەيىن بارلىق ءبىلىم جانە دەنساۋلىق ساقتاۋ نىساندارىنداعى جىلۋ جۇيەلەرىن تولىق سىناقتان وتكىزىپ، انىقتالعان اقاۋلاردى جەدەل رەتكە كەلتىرۋدى تاپسىردى.
كۇن تارتىبىندەگى ەكىنشى ماسەلە بويىنشا تۇركىستان قالاسى جانە ساۋران اۋدانىنىڭ قورعانىس ىستەرى جونىندەگى بىرىكتىرىلگەن باسقارماسىنىڭ باسشىسى ديلمۋراد نۇرجانوۆ بايانداما جاسادى.
سپيكەردىڭ ايتۋىنشا، 1 قىركۇيەكتەن باستاپ قر پرەزيدەنتىنىڭ جارلىعىنا سايكەس كۇزگى مەرزىمدى اسكەري قىزمەتكە شاقىرۋ باستالدى. بۇل باعىتتا باسقارما جاستاردى پاتريوتتىق رۋحتا تاربيەلەۋ جانە شاقىرۋ پروتسەسىن جەتىلدىرۋ باعىتىندا بىرقاتار جۇمىستار اتقارۋدا.
ازىمبەك پازىلبەكۇلى اپپاراتتىق ءماجىلىس بارىسىندا بىرقاتار ناقتى تاپسىرمالار جۇكتەدى. ىشكى ساياسات بولىمىنە قالا اۋماعىندا قارۋلى كۇشتەردى ناسيحاتتايتىن بيلبوردتار مەن بەينەروليكتەر ورناتۋدى، ءبىلىم بولىمىنە مەكتەپتەردە العاشقى اسكەري دايىندىق ساباقتارىنىڭ تولىق ءارى جۇيەلى وتكىزىلۋىن قامتاماسىز ەتۋدى، ال قورعانىس ىستەرى جونىندەگى باسقارماعا اسكەرگە شاقىرىلعان جاستاردى سالتاناتتى تۇردە شىعارىپ سالۋ جانە اسكەري بورىشىن وتەپ كەلگەن ساربازداردى كۇتىپ الۋ راسىمدەرىن تۇراقتى تۇردە ۇيىمداستىرۋدى تاپسىردى.
ۇقساس جاڭالىقتار
