بۇگىن تۇركىستان قالاسىنىڭ اكىمى ازىمبەك پازىلبەكۇلى شاھار اۋماعىندا جۇرگىزىلىپ جاتقان اباتتاندىرۋ، كوگالداندىرۋ جانە جول جوندەۋ جۇمىستارىنىڭ بارىسىن باقىلاپ، بىرقاتار نىسانداردى ارالادى.
الدىمەن قالا باسشىسى وتىرار تۇرعىن الابىنداعى جول ينفراقۇرىلىمىنىڭ جاي-كۇيىمەن تانىستى. مۇندا شايان، ويسىل قارا، كەلەس جانە وعان ىرگەلەس جاتقان، جالپى ۇزىندىعى 24,6 شاقىرىمدى قۇرايتىن 28 كوشەدە ورتاشا جوندەۋ جۇمىستارى جۇرگىزىلۋدە. قۇرىلىس بارىسىندا جولدىڭ نەگىزى ازىرلەنىپ، ءىرى جانە ۇساق تۇيىرشىكتى اسفالت قاباتى توسەلۋدە. سونىمەن بىرگە، جول جيەگى مەن بىرجاقتى اياقجول سالۋ جۇمىستارى اتقارىلۋدا.
ازىمبەك پازىلبەكۇلى مەردىگەر ۇيىمدارعا اتقارىلىپ جاتقان جۇمىستاردىڭ ساپاسىن قاتاڭ باقىلاۋعا الىپ، تۇرعىنداردىڭ قاۋىپسىزدىگى مەن جايلىلىعى ءۇشىن بارلىق ينجەنەرلىك جانە ينفراقۇرىلىمدىق تالاپتاردىڭ ورىندالۋىن قامتاماسىز ەتۋدى مىندەتتەدى.
سونداي-اق، جاڭادان سالىنىپ جاتقان يپپودرومعا اپاراتىن جولدىڭ قۇرىلىسىمەن تانىستى. ۇزىندىعى 1,3 شاقىرىمدى قۇرايتىن بۇل جولدا ەكى قاباتتى اسفالت توسەلىپ، جارىق شامدارى ورناتىلعان. قازىرگى تاڭدا جولدىڭ ەكى جاعىندا اياقجول توسەۋ جۇمىستارى جالعاسۋدا. قالا اكىم قۇرىلىس ساپاسىنا ەرەكشە نازار اۋدارىپ، جاۋاپتى مەردىگەر مەكەمەگە بارلىق تالاپتاردىڭ ساقتالۋىن جانە جۇمىستى بەلگىلەنگەن مەرزىمدە اياقتاۋدى تاپسىردى.
سونىمەن قاتار ارالاۋ بارىسىندا ازىمبەك پازىلبەكۇلى ب.ساتتارحانوۆ داڭعىلى مەن اۋەجاي تاس جولى بويىنداعى كوگالداندىرۋ جانە گۇل ەگۋ جۇمىستارىن ارالادى. قالانىڭ نەگىزگى ماگيسترالدى كوشەلەرىنىڭ بويىندا ءتۇرلى اعاش تۇرلەرى وتىرعىزىلىپ، جاسىل ايماقتاردىڭ كولەمى ۇلعايۋدا.
قالا اكىمى اتالعان جۇمىستاردىڭ ەستەتيكالىق جانە ەكولوگيالىق ماڭىزدىلىعىن اتاپ ءوتىپ، كوگالداندىرۋ شارالارىنىڭ ساپاسىن ارتتىرۋ، وتىرعىزىلعان اعاشتار مەن گۇلدەردىڭ كۇتىمىن تۇراقتى باقىلاۋدا ۇستاۋ جونىندە ناقتى تاپسىرما بەردى.
ايتا كەتەيىك، قازىرگى تاڭدا قالا اكىمدىگى تاراپىنان بارلىق نىسانداردىڭ ۋاقتىلى ءارى ساپالى اياقتالۋىنا تۇراقتى مونيتورينگ جۇرگىزىلۋدە.
ۇقساس جاڭالىقتار
