جۋىردا ارحيتەكتور ارىپتەستەرىممەن بىرگە وزبەكستان رەسپۋبليكاسىنىڭ كونە ءارى كيەلى قالالارى — سامارقاند پەن بۇحاراعا ىسساپارمەن بارىپ، تاريحي-مادەني مۇرالار مەن زاماناۋي ارحيتەكتۋرالىق نىسانداردى زەرتتەپ قايتتىق. بۇل ساپار ءبىز ءۇشىن كاسىبي تۇرعىدا اسا ماڭىزدى تاجىريبە الماسۋ الاڭىنا اينالدى. تۇركىستان قالاسىنىڭ بولاشاق دامۋىنا باعىتتالعان ستراتەگيالىق جوسپارلاردى جەتىلدىرۋدە، اسىرەسە ارحيتەكتۋرا، مادەنيەت جانە تۋريزم سالالارىندا، وسى ساپاردان تۇيگەنىمىز مول.
سامارقاند — ۇلى جىبەك جولىنىڭ بويىنداعى رۋحاني، عىلىمي ءارى ساۋلەتتىك ورتالىق. ءامىر تەمىر داۋىرىنەن قالعان كوركەم ەسكەرتكىشتەر — رەگيستان الاڭى، ءبيبى-حانىم مەشىتى، شاحي-زيندا كەشەنى — تەك ارحيتەكتۋرالىق جاۋھارلار عانا ەمەس، سونىمەن قاتار بۇكىل وركەنيەتتىڭ التىن مۇراسى. بۇحارا قالاسى دا وزىندىك بولمىسىمەن ەرەكشەلەنەدى: مىڭداعان جىلدىق تاريحى بار، مەدرەسەلەرى مەن مەشىتتەرى ارقىلى يسلام وركەنيەتىنىڭ اسىل قازىناسىن ساقتاپ قالعان، ءتىرى مۋزەي ىسپەتتى كيەلى مەكەن.
سامارقاند تا، بۇحارا دا — تۇركى دۇنيەسىنىڭ التىن دىڭگەكتەرى. بۇل قالالاردا ساقتالعان ورتاعاسىرلىق قالالىق قۇرىلىم، يسلام ونەرىنىڭ نازىك ورنەكتەرى، ساۋلەتتىك ستيلدەردەگى ورتاق مادەني كود — بىزگە جات ەمەس، قايتا كەرىسىنشە، بىزگە ەتەنە تانىس، جاقىن دۇنيەلەر. تۇركىستان دا وسى وركەنيەتتىڭ اجىراماس بولىگى.
ساپار بارىسىندا ءبىزدى ەرەكشە ءتانتى ەتكەن جايت — كونە مەن جاڭانىڭ ۇيلەسىمدىلىگى. ەكى قالادا دا تاريحي مۇرالار مەن زاماناۋي قۇرىلىس ءبىر-ءبىرىن كولەڭكەلەمەي، كەرىسىنشە، ءبىرىن-ءبىرى تولىقتىرىپ تۇر. بۇل — قازىرگى زاماندا ارحيتەكتۋرالىق دامۋدا اسا قاجەت قاعيدا. تۇركىستانداعى قوجا احمەت ياساۋي كەسەنەسىنىڭ اينالاسىن دامىتۋ كەزىندە دە ءدال وسىنداي تەپە-تەڭدىكتى ساقتاۋ — ءبىزدىڭ باستى ۇستانىمىمىز. سەبەبى تاريحي تامىردى ساقتاي وتىرىپ، زاماناۋي تالاپتارعا ساي كەلەتىن ورتا قالىپتاستىرۋ – ۇلت بولاشاعىنا دەگەن جاۋاپكەرشىلىك.
سونداي-اق، ساپار بارىسىندا جەرگىلىكتى بيلىك پەن جەكە سەكتور اراسىنداعى ءتيىمدى سەرىكتەستىكتىڭ، تۋريزم سالاسىن تسيفرلاندىرۋدىڭ، تۋريستىك قىزمەت ساپاسىن ارتتىرۋدىڭ ناقتى ناتيجەلەرىن كوردىك. بۇلاردىڭ بارلىعى تۇركىستاننىڭ تۋريستىك الەۋەتىن كوتەرۋدە بىزگە دە اسا قاجەت تەتىكتەر ەكەنىنە كوز جەتكىزدىك.
وسى تاعىلىمدى ءىسساپار ناتيجەسىندە ءبىز تۇركىستاندى تۇركى الەمىنىڭ مادەني-رۋحاني ورتالىعى رەتىندە ودان ءارى دامىتۋ جولىندا جاڭا باعىتتار ايقىندادىق. ارحيتەكتۋرالىق جوبالاردا ءداستۇر مەن يننوۆاتسيانى ۇشتاستىرا وتىرىپ، تۇرعىندار مەن تۋريستەرگە تاريحي بولمىسى ساقتالعان، جايلى ءارى زاماناۋي ينفراقۇرىلىمى بار ورتا قالىپتاستىرۋ – ءبىزدىڭ باستى ماقساتىمىز.
ۇقساس جاڭالىقتار
