الماتىدا 3,6 مىڭنان استام سپورت نىسانى جۇمىس ىستەيدى. بۇل تۋرالى قالالىق سپورت باسقارماسىنىڭ وكىلدەرى ايتتى.
2024–2025 جىلدارى التى جاڭا دەنە شىنىقتىرۋ-ساۋىقتىرۋ كەشەنى پايدالانۋعا بەرىلدى، سونداي-اق جەكە ينۆەستيتسيا ەسەبىنەن ەكى سپورت كەشەنى بوي كوتەردى. الاتاۋ اۋدانىنداعى نۇركەنت شاعىناۋدانىندا ينۆەستورلار اياقتاعان جاڭا تەننيس ورتالىعى اشىلدى. «تۇلپار» كەشەنى ۇلتتىق سپورت تۇرلەرىن دامىتۋ ءۇشىن كوممۋنالدىق مەنشىككە قايتارىلدى، رايىمبەك داڭعىلىندا ەرەكشە قاجەتتىلىگى بار ادامدارعا ارنالعان سپورت ورتالىعىنىڭ قۇرىلىسى باستالدى.
2027 جىلدىڭ سوڭىنا دەيىن ناۋرىزباي، الاتاۋ جانە تۇركسىب اۋداندارىندا جالپى اۋدانى 71 مىڭ شارشى مەتر بولاتىن التى دەنە شىنىقتىرۋ-ساۋىقتىرۋ كەشەنى سالۋ جوسپارلانىپ وتىر. سونداي-اق ء ۇش سپورت مەكتەبىن جاڭعىرتۋ كوزدەلگەن: №9 سپورت مەكتەبى ءۇشىن سەيسميكالىق كۇشەيتۋمەن بىرگە كۇردەلى جوندەۋگە قۇجاتتاما ازىرلەنىپ جاتىر; سپورتتا دارىندى بالالارعا ارنالعان مەكتەپ-ينتەرنات ساراپتامانىڭ وڭ قورىتىندىسىن الدى; №2 سپورت مەكتەبى ءۇشىن كۇردەلى جوندەۋ جوباسى جاسالىپ جاتىر.
بىرەگەي جوبالاردىڭ قاتارىندا FIFA جانە UEFA ستاندارتتارىنا سايكەس 15 گەكتار اۋماقتا 40 مىڭ ورىندىق جاڭا فۋتبول ستاديونىنىڭ قۇرىلىسى، سونداي-اق 2 گەكتار اۋماقتا توبەسىنىڭ بيىكتىگى 17 مەتر بولاتىن كوركەم گيمناستيكا ورتالىعىن سالۋ بار. بۇل حالىقارالىق جارىس وتكىزۋگە مۇمكىندىك بەرەدى. ورتالىق ستاديوندا ساۋلەتتىك كەلبەتى مەن جەڭىل اتلەتيكا جولاقتارىن ساقتاي وتىرىپ، جاڭارتۋ جۇرگىزۋ جوسپارلانعان. سونىمەن قاتار «مەدەۋ» بيىك تاۋلى سپورت كەشەنىن جاڭعىرتۋ باستالدى. جاڭعىرتۋ اياسىندا كەشەننىڭ تاريحي كەلبەتى ساقتالا وتىرىپ، تولىق جاڭارتۋ جۇرگىزىلەدى. ينجەنەرلىك جەلىلەر جاڭارتىلىپ، زاماناۋي ينفراقۇرىلىم جاسالىپ، سپورتشىلار مەن قوناقتارعا ارنالعان جاعداي جاقسارتىلادى.
بۇعان قوسا، جىل سوڭىنا دەيىن الماتىدا 20-دان استام مۇز ايدىنىن اشۋ جوسپارلانعان، دەپ اتاپ ءوتتى قالالىق سپورت باسقارماسىنىڭ وكىلدەرى.
