بەلگىلى جۋرناليست گۇلميرا ابىقاي ءوزىنىڭ الەۋمەتتىك جەلىدەگى پاراقشاسىندا قوعامدىق دارەتحانالاردىڭ كۇيىن سىنعا الىپ، شىندىقتى اشىق جازدى. ونىڭ ايتۋىنشا، الماتىدان بۋرابايعا ساپار كەزىندە كەزدەسكەن دارەتحانالار ادام شوشىرلىق جاعدايدا بولعان، دەپ حابارلايدى “ادىرنا”.
ابىقايدىڭ جازباسىندا ايتىلعانداي، بالقاش ماڭىنداعى العاشقى ايالدامادا ورنالاسقان دارەتحانا تەك ەر ادامدارعا ارنالعانداي كورىنگەن. اعاشتان جاسالعان ەكى ەسىكتى اجەتحانادان تاراعان ءيىستىڭ وزىنەن جۇرەك اينيدى. ايەلدەر ءۇشىن ارنايى ورىن قاراستىرىلماعان.
ء«سال ۇزاپ، بالقاش سىرتىنداعى @royalpetrol.kz بەكەتىنە توقتادىق. دارەتحانا – 100 تەڭگە. بىراق كەزەكتە – 100 ادام. بايلانىس جوق. مايدا تەڭگە ءار قالتادا قايدان تابىلسىن؟ قىسىلىپ تۇرعان جۇرت دارەتحانانىڭ الدىندا ۇرسىسىپ جاتىر – سوتكاسىن شۇقىلاپ، QR اشىلماي الەك.
شىداعان كۇيى تاعى 300 شاقىرىم ءجۇرىپ، قاراعاندىعا جەتتىك. ول جاقتاعى الىپ جمقس – Qazaq Oil. جاعداي بىلاي: سۋ جوق، دارەتحانا جابىق. ەل-جۇرت اينالاداعى اعاش پەن بۇتانىڭ اراسىنا جايىلىپ كەتكەن. ماڭايداعى كەپكەن تەزەك پەن ۇشقان قاعازعا قاراساڭ، بۇل جەردە سۋ بولماعانىنا بىرنەشە جىل بولعانداي»، دەپ جازدى جۋرناليست.
ءجۋرناليستىڭ ايتۋىنشا، كوپتەگەن جانارماي بەكەتتەرىندە ارنايى تەحنيكالىق قىزمەتكەر جوق. دارەتحانالاردى سول جەردەگى كاسسير-وپەراتور قىزدار وزدەرى جۋىپ-تازالايدى. بۇل ولاردىڭ لاۋازىمدىق مىندەتىنە كىرمەسە دە، امالسىزدان تازالىقپەن اينالىسۋعا ءماجبۇر.
"كۇنىنە ميلليونداپ پايدا كورەتىن جمقس يەلەرى نەگە ءبىر تازالىقشىعا جالاقى تولەۋگە قيمايدى؟" — دەيدى ابىقاي.
جول بويىنداعى اقىلى جولدان ءوتۋدىڭ ءوزى 4600 تەڭگە تۇرسا، نەگە قاراپايىم دارەتحانا، كەمپينگ نەمەسە موتەل سالىنبايدى دەگەن سۇراق تۋىندايدى. مەملەكەت تاراپىنان الىناتىن اۆتو جانە جول سالىعىنىڭ قايدا جۇمسالىپ جاتقانى تۇسىنىكسىز.
"قۇزىرلى مينيسترلىك پەن ءتيىستى مەكەمەلەر وسى جاعدايدان حابارسىز دەپ ايتۋ – اقىلعا قونىمسىز", – دەيدى جۋرناليست.
جول بويىندا سيرەك كەزدەسەتىن سالىستىرمالى تۇردە تازا دارەتحانالاردىڭ وزىندە قاعاز نەمەسە قول جۋاتىن سابىن بولمايدى. بۇل سانيتارلىق تالاپتاردى ورەسكەل بۇزۋ عانا ەمەس، سونىمەن قاتار حالىق دەنساۋلىعىنا تىكەلەي قاۋىپ توندىرەتىن فاكتور.
