اباي وبلىسىندا قىرۋار قارجىعا سالىنعان كوشە دارەتحاناسى جۇمىس ىستەمەي جابىق تۇر، دەپ حابارلايدى "ادىرنا" ۇلتتىق پورتالى حالىق ۇنىنە سىلتەمە جاساپ.
بۇل تۋرالى «ادىلدىك جولى» رەسپۋبليكالىق قوعامدىق بىرلەستىگى توراعاسى ديدار سماعۇلوۆ جەلىدەگى پاراقشاسىندا ءبولىستى.
ونىڭ سوزىنشە، قۇنى 31 562 600 تەڭگەلىك دارەتحانا سەمەي قالاسىنان قاراۋىلعا بارار جولدا جۇمىس ىستەمەي تۇر. تاپسىرىس بەرۋشىلەر بۇل نىساندى اقپاندا قابىلداپ، اقىسىن تولەپ قويىپتى.
جەرگىلىكتى شەنەۋنىكتەر سانيتارلىق-گيگيەنالىق توراپتى «سەمەي جولدارى» جشس ورىندايتىن اۆتوموبيل جولدارىن كۇتىپ ۇستاۋ جۇمىستارىنىڭ ىشىنە كىرگىزىپ جىبەرگەن. الايدا كۇتىپ ۇستاۋ شىعىندارى 1,5 جىل ىشىندە 2 ميلليارد تەڭگەدەن اسىپ كەتكەنىن ايتىپ، توراعا ديدار سماعۇلوۆ دابىل قاقتى.
ىشكى مەملەكەتتىك اۋديت دەپارتامەنتى دارەتحانانى 2024 جىلدىڭ 16 اقپانىنداعى №17 اكتى ارقىلى اباي وبلىسى جولاۋشىلار كولىگى جانە اۆتوموبيل جولدارى باسقارماسىنىڭ بۇرىنعى باسشىسى اسىلبەك نۇعمانوۆ قابىلداپ العان. ەسىگى جابىق تۇرعان دارەتحانانى ەكى كۇزەتشى كۇزەتەتىنى بەلگىلى بولدى.
جولاۋشىنىڭ قاجەتىنە جاراۋ ءۇششىن سالىنعان نىساندا جارىق تا، سۋ دا قوسىلماعان. ميلليونداعان قاراجاتقا سالىنعان دارەتحانانىڭ توبەسى وتىرىلىپ، قۇلاپ جاتقان كورىنەدى.
"سوعان قاراعاندا قىمبات دارەتحاناعا ارزان قۇرىلىس ماتەريالدارى قولدانىلىپ، جۇمىستىڭ ءوزى قالاي بولسا، سولاي ىستەلگەندەي اسەر قالدىرادى. 1 500 شاقىرىم جول ءجۇرىپ كەلگەندە «لاكشەري» دارەتحانادان مۇندايدى كۇتپەگەن ەدىم", - دەپ جازدى ديدار سماعۇلوۆ.
ايتا كەتەيىك، اقتاۋدا 87 ميلليون تەڭگەگە سالىنعان دارەتحانالار ىستەن شىققان بولاتىن.
