الماتى وبلىسى، رايىمبەك اۋدانى، قىزىلشەكارا اۋىلىنداعى مەكتەپتىڭ وقۋشىلارى اجەتىن وتەپ، دارەتحاناعا بارا الماي ءجۇر. اۋلادا ورنالاسقان دارەتحانانىڭ كۇركەدەن ەش ايىرماشىلىعى جوق. "ادىرنا" اپاراتتىق پورتالىنا وقىرمانداردان شاعىم-حات كەلىپ ءتۇستى. جولدانعان دەرەكتەردە قىتايمەن شەكارالاس اۋىلداعى مەكتەپتىڭ سىن كوتەرمەس سيپاتى ءسوز بولادى.
ۆيدەودا قىزىلشەكارا اۋىلىنداعى مەكتەپ نىساناعا الىنعان. ناتيجەسىندە، مەكتەپتىڭ جوعارعى قاباتىنداعى دارەتحانا تەك تەكسەرىس ءۇشىن، "ەسەپ بەرۋ" ءۇشىن اشىلاتىنى اشكەرەلەنەدى. قولىنا بەينەكامەرا ۇستاعان وقىرمان ءۇشىنشى قاباتتاعى دارەتحاناعا كوتەرىلگەنشە قىزمەتكەر وقۋشىلار ءۇشىن قۇلپى بۇزىلمايتىن بولمەنى ءاپ-cاتتە اشا قويادى. اۆتور كىلتتىڭ سىلدىرلاعان دىبىسىن ەستيدى.
- ءبارى تاپ-تازا. ەشكىم قولدانبايدى. بالالاردى مىنا جەرگە كىرگىزبەيدى. كىم ءۇشىن، نە ءۇشىن سالىندى؟ تۇسىنىكسىز... ايعاق رەتىندە قوقىس شەلەكتەرىن كورسەتەيىن. ءبارى جارقىراپ تۇر. جاپ-جاڭا. تەكسەرىس كەلگەندە اشۋ ءۇشىن، جالاڭ ەسەپ بەرۋ ءۇشىن جاۋىپ قويعان، - دەيدى وقىرمان.
سونىمەن قاتار، بەينە-دەرەكتە مەكتەپ اۋلاسىنداعى جوعارعى سىنىپ وقۋشىلارىنا ارنالعان دارەتحانالار دا كورسەتىلەدى. ولاردىڭ دا توزىعى جەتىپ، قۇلاۋعا شاق قالعان.
جالپى، قازاقستاننىڭ كوپتەگەن ەلدى-مەكەندەرىندە تازالىق بولمەلەرىن جاساقتاۋ، جيناقى ۇستاۋ جانە سالۋ ماسەلەسى وقتىن-وقتىن "توبە كورسەتىپ" وتىرادى. بۇدان بۇرىن "ادىرنا" ۇلتتىق پورتالى تورعايداعى قىمبات باعاعا سالىنعان ارزان دارەتحانا جايلى دا جازعان ەدى.
2021 جىلعى دەرەكتەر ەلىمىزدە 800-دەن استام مەكتەپتە اۋلا دارەتحاناسىنىڭ سىن كوتەرمەي تۇرعانىن كورسەتەدى.
"ادىرنا" ۇلتتىق پورتالى
