وسىدان 28 جىل بۇرىن تۋعان اناسى قوقىسقا تاستاپ كەتكەن ەر ازامات، جۋرناليست گۇلميرا ابىقايعا بيولوگيالىق اناسىن تابۋعا كومەك سۇراپ حات جولداپتى، دەپ حابارلايدى “ادىرنا” ۇلتتىق پورتالى.
حات جولداۋىنا سەبەپ بولعان وقيعا - ءبىر كۇن بۇرىن اتىراۋ وبلىسى يندەر اۋدانىندا 30 جاستاعى كەلىنشەك بالاسىن اجەتحاناعا تاستاپ كەتكەن ەدى. نارەستەنىڭ دەنساۋلىعى جاقسى، امان-ساۋ.
1993 جىلعى ازامات وسى جاڭالىقتى ەستي سالىسىمەن، گۇلميرا ابىقايعا “تۋعان انامدى تاپقىم كەلەدى” دەپ حات جولداعان.
“كوپ ادام وسىنداي تۋالەتكە تاستاعان، مۋسورعا لاقتىرعان بالالاردىڭ ءومىرى ارى قاراي نە بولادى دەپ ويلايتىن شىعار؟! سونىڭ ءبىرى مەن ءوزىممىن…
28 جىل بۇرىن، ورال قالاسىندا مەنى تۋعان انام مۋسورعا لاقتىرىپ كەتىپتى. كوپ ۇزاماي سول جەردەن ءوتىپ بارا جاتقان جاقسى ادامدار قىڭسىلاعان داۋسىمدى ەستىپ تاۋىپ الىپ اۋىلعا اكەپتى. ول كەزدە پوليتسياعا ايتۋ، قۇجات راسىمدەۋ جوق بولسا كەرەك مەنى 13 جىل بالا كوتەرمەگەن كورشىلەرىنىڭ ەتەگىنە سالىپتى. سول كىسىلەردى انام-اكەم دەپ ءوستىم.
ءتاۋبا، ەش نارسەدەن تارىقپادىم، ادام بولدىم، وقىدىم، ءوستىم. اسىراپ العان اتا-انام ومىردەن ءوتتى. سول كەزدە باياعىدا مەنى تاۋىپ العان كورشىلەرىم اقيقاتتى ايتىپ، قولىما بيركا تابىستادى: يسماگۋلوۆا روزا
01.05.1993, مالچيك
دەپ جازىلىپتى.
قازىر ءوزىم ۇيلەندىم، 3 بالام بار، اسكەري وفيتسەرمىن. دەگەنمەن، تۋعان اناعا دەگەن ساعىنىش، ونى تابۋ ، ءبىر كورۋ ارمانىم!
ونى ءسىز ورىندايتىنىڭىزعا سەنەمىن. اناما ەش وكپەم جوق، ءتىرى بولسا كورگىم كەلەدى، بالالارىم تەگىن بىلسە دەيمىن، بار ارمانىم تۋعان انامدى ءبىر كورۋ”،- دەگەن حات يەسى.
جازبا استىنا جاريالانعان پىكىر سانىندا شەك جوق. كوبى “سول كەزدە تاستاپ كەتكەن ادام قازىر سەنى قابىلدامايدى، تىنىش ءومىرىڭدى قۇرتپا” دەپ جازعان.
ەستەرىڭىزگە سالا كەتسەك، اتىراۋ وبلىسى پوليتسيا دەپارتامەنتىنىڭ ءباسپاسوز قىزمەتىنىڭ مالىمەتى بويىنشا، بالا تۋىپ، ونى كوشە دارەتحاناسىندا قالدىرعان ايەلدىڭ جەكە باسى انىقتالدى.
"3 قازان كۇنى يندەر اۋدانىندا بالاسىن دارەتحاناعا تاستاپ كەتكەن كۇدىكتى انىقتالدى. بالا دارىگەرلەردىڭ باقىلاۋىنا الىندى. قازىر سوتقا دەيىنگى تەرگەۋ ءجۇرىپ جاتىر. باسقا اقپارات قر قىلمىستىق-پروتسەستىك كودەكسىنىڭ 201-بابىنا سايكەس جاريالاۋعا جاتپايدى", - دەپ حابارلادى دەپارتامەنتتىڭ ءباسپاسوز قىزمەتى وكىلدەرى.
“ادىرنا” ۇلتتىق پورتالى
