الماتىدا 1986 جىلعى جەلتوقسان وقيعاسىنا قاتىسىپ، كەيىن ساياسي قۋدالاۋعا ۇشىراعان ازامات ەندى عانا ادىلەتكە قول جەتكىزدى، دەپ حابارلايدى "ادىرنا" ۇلتتىق پورتالى.
بۇل تۋرالى جوعارعى سوتتىڭ ءباسپاسوز قىزمەتى مالىمدەدى.
«2025 جىلى 64 جاستاعى اقتوبە تۇرعىنى 1986 جىلعى الماتىداعى جەلتوقسان وقيعاسىنا قاتىسقانى ءۇشىن ساياسي قۋعىن-سۇرگىنگە ۇشىراعانىن مويىنداتۋ جونىندە سوتقا تالاپ-ارىز ءتۇسىردى. اقتوبە قالاسىنىڭ №3 سوتى ءىستى قاراپ، ونىڭ شىنىمەن دە جەلتوقسان وقيعاسىنا قاتىسىپ، قۋعىندالعانىن، ەڭبەك قۇقىعى شەكتەلگەنىن انىقتادى. بۇل دەرەكتەر الماتى قالاسى ۋنيۆەرسيتەتىنىڭ جانە پروكۋراتۋراسىنىڭ مۇراعاتتىق انىقتامالارىمەن، سونداي-اق كۋاگەرلەردىڭ ايعاقتارىمەن راستالدى. ازاماتتىق پروتسەستىك كودەكستىڭ 306-بابىنا جانە «جاپپاي ساياسي قۋعىن-سۇرگىن قۇرباندارىن اقتاۋ تۋرالى» زاڭنىڭ 2-بابىنا سۇيەنە وتىرىپ، سوت تالاپكەردى 1986 جىلعى وقيعالارعا بايلانىستى ساياسي قۋعىن-سۇرگىن قۇربانى دەپ تانىدى»، – دەلىنگەن حابارلامادا.
سوتتىڭ مالىمەتىنشە، اتالعان ازامات 1984 جىلى گۋرەۆ وبلىستىق پارتيا كوميتەتى مەن كاسىپوداق ۇيىمىنىڭ جولداماسىمەن قازاق مەملەكەتتىك ۋنيۆەرسيتەتىنىڭ دايىندىق بولىمىنە وقۋعا تۇسكەن. ال 1985 جىلى ۋنيۆەرسيتەتتىڭ فيلوسوفيا جانە ەكونوميكا فاكۋلتەتىنىڭ ستۋدەنتى اتانادى.
1986 جىلى ول ەكىنشى كۋرستان «قوعامدىق ءتارتىپتى بۇزدى» دەگەن جەلەۋمەن وقۋدان شىعارىلعان. بۇعان 18 جەلتوقسان كۇنى ونىڭ قۇقىق قورعاۋ ورگاندارى تاراپىنان ەش ايىپ تاعىلماستان ۇستالىپ، كەيىن بوساتىلعانى سەبەپ بولعان. الايدا ستۋدەنت وقۋدان شىعارىلىپ قانا قويماي، كوممۋنيستىك پارتيا قاتارىنان دا شىعارىلعان، ءارى جۇمىسقا ورنالاسا الماي قينالعان. ونىڭ ايەلى – اتالعان ۋنيۆەرسيتەتتىڭ فيلوسوفيا فاكۋلتەتىن بىتىرگەن تۇلەك تە، سول كەزەڭدە جۇمىس تابا الماعان. 1990–1993 جىلدارى بۇل وتباسى ءۇش بالاسىمەن جالدامالى پاتەردە تۇرىپ، الەۋمەتتىك وسال جاعدايدا ءومىر سۇرگەن.
سوت شەشىمى زاڭدى كۇشىنە ەندى.
جەلتوقسان وقيعاسى 1986 جىلدىڭ 16 جەلتوقسانىندا الماتىدا باستالدى. قازاق جاستارى كوكپ ورتالىق كوميتەتىنىڭ شەشىمىمەن ءبىرىنشى حاتشى دىنمۇحاممەد قوناەۆتىڭ ورنىنا رەسپۋبليكامەن بايلانىسى جوق گەننادي كولبيننىڭ تاعايىندالۋىنا قارسى شىعىپ، بەيبىت شەرۋگە شىققان. الايدا بۇل شەرۋلەر قاتاڭ تۇردە كۇشپەن باسىلىپ، مىڭداعان ادام سوققىعا جىعىلىپ، 8 500-گە جۋىق ادام ۇستالدى، جۇزدەگەنى وقۋدان شىعارىلىپ، جۇمىستان قۋىلدى، كوپشىلىگى قۋعىنعا ۇشىرادى. رەسمي ەمەس دەرەكتەر بويىنشا، 150-دەن استام ادام قازا تاپقان. بۇل وقيعا كسرو-داعى العاشقى ءىرى ۇلتتىق قارسىلىق رەتىندە تاريحتا قالدى جانە كەڭەس وداعىنىڭ كۇيرەۋىنە الىپ كەلگەن ۇدەرىستەردىڭ باستاماسىنا اينالدى.
