مەملەكەت باسشىسى الاتاۋدى دامىتۋ جونىندەگى كەڭەستە ينۆەستورلار ءۇشىن بارىنشا قولايلى ورتا قالىپتاستىرۋدىڭ ماڭىزىن اتاپ ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
پرەزيدەنتتىڭ ايتۋىنشا، الاتاۋ قالاسىنىڭ تابىستى دامۋى ءۇشىن قولايلى ينۆەستيتسيالىق احۋال قالىپتاستىرىپ، ينۆەستورلارعا جوعارى دەڭگەيدەگى قىزمەت كورسەتۋ قاجەت.
«ينۆەستورلار ءۇشىن بارىنشا قولايلى جاعداي مەن ەڭ جوعارى دەڭگەيدەگى سەرۆيستى قامتاماسىز ەتۋ – باسىم مىندەت. ەڭ الدىمەن بارلىق حالىقارالىق ستاندارتتاردى قاتاڭ ساقتاۋ قاجەت. اسىرەسە ۇلتتىق رەتتەۋ جۇيەسى وزىق تاجىريبەلەردەن قالىپ قويعان سالالاردا بۇل وتە ماڭىزدى. بۇل جۇمىستى ىسكە قوسۋ – ەلىمىزدىڭ جەدەل ءارى قارقىندى دامۋىنىڭ كەپىلى. جاۋاپتى لاۋازىمدى تۇلعالار باتىل شەشىم قابىلداۋدان قورىقپاۋى كەرەك. بۇل ءوتىنىش تە، كەڭەس تە ەمەس، ناقتى تاپسىرما»، – دەدى مەملەكەت باسشىسى.
پرەزيدەنت توقاەۆ ەرەكشە قۇقىقتىق مارتەبەسى بار قالالاردىڭ الەمدىك كاپيتالدى بەلسەندى تارتۋ ارقىلى كوشباسشىلىققا ۇمتىلىپ جاتقانىن اتاپ ءوتتى.
مەملەكەت باسشىسى بۇل باعىتتاعى جۇمىستا اقپاراتتىق تەحنولوگيالار، ونەركاسىپ، كولىك جانە لوگيستيكا، تۋريزم، مەديتسينا مەن ءبىلىم بەرۋ سالالارىنا باسىمدىق بەرىلۋى ءتيىس ەكەنىن اتاپ ءوتتى.
