مەملەكەت باسشىسى قاسىم-جومارت توقاەۆ قازاقستانعا رەسمي ساپارمەن كەلگەن گونكونگ ارنايى اكىمشىلىك اۋدانى اكىمشىلىگىنىڭ باسشىسى دجون ليمەن كەزدەسۋ وتكىزدى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
كەزدەسۋ 1 ماۋسىمدا وتكەن. جيىن بارىسىندا پرەزيدەنت مەيمانعا ءىلتيپات ءبىلدىرىپ، دجون ءليدىڭ قازاقستانعا العاشقى ساپارىنىڭ ماڭىزدىلىعىنا توقتالدى. مەملەكەت باسشىسىنىڭ ايتۋىنشا، بۇل ساپار قازاقستان مەن گونكونگ اراسىنداعى ىنتىماقتاستىقتى جاڭا دەڭگەيگە كوتەرىپ، قازاقستان مەن قىتاي اراسىنداعى جان-جاقتى ستراتەگيالىق سەرىكتەستىكتى ودان ءارى نىعايتۋعا ىقپال ەتەدى.
قاسىم-جومارت توقاەۆ گونكونگتىڭ حالىقارالىق قارجى جانە ىسكەرلىك ورتالىق رەتىندەگى ءرولىن اتاپ ءوتىپ، ينۆەستيتسيا، يننوۆاتسيا، تەحنولوگيا جانە حالىقارالىق ساۋدا سالالارىنداعى الەۋەتىنە جوعارى باعا بەردى. سونداي-اق پرەزيدەنت ينۆەستيتسيا، قارجى، تسيفرلاندىرۋ، جاساندى ينتەللەكت جانە كولىك-لوگيستيكا باعىتتارىندا بىرلەسكەن جوبالاردى جۇزەگە اسىرۋعا مول مۇمكىندىك بار ەكەنىن ايتتى.
مەملەكەت باسشىسى قازاقستانعا اۋقىمدى بيزنەس-دەلەگاتسيامەن كەلگەنى ءۇشىن دجون ليگە العىس ءبىلدىرىپ، بۇل گونكونگ ىسكەرلىك قاۋىمداستىعىنىڭ قازاقستانمەن ىنتىماقتاستىقتى كەڭەيتۋگە قىزىعۋشىلىعى جوعارى ەكەنىن كورسەتەتىنىن جەتكىزدى.
ءوز كەزەگىندە دجون لي جىلى قابىلداۋ ءۇشىن ريزاشىلىعىن ءبىلدىرىپ، گونكونگتىڭ قازاقستانمەن ءوزارا ءتيىمدى ىنتىماقتاستىقتى ودان ءارى تەرەڭدەتۋگە دايىن ەكەنىن مالىمدەدى.
ونىڭ ايتۋىنشا، ساپار قۇرامىنداعى دەلەگاتسيا شەتەلگە شىققان ەڭ ءىرى دەلەگاتسيالاردىڭ ءبىرى بولىپ وتىر. قۇرامىنا لوگيستيكا، جاسىل ەنەرگەتيكا، تاۋ-كەن ونەركاسىبى، يننوۆاتسيا، تەحنولوگيا جانە ءبىلىم بەرۋ سالالارىندا جۇمىس ىستەيتىن 75 رەسمي تۇلعا مەن كاسىپكەر ەنگەن.
