يسپانيادا ديماش تۋرالى دەرەكتى ءفيلمنىڭ تۇساۋكەسەرى ءوتتى، دەپ حابارلايدى “ادىرنا” ۇلتتىق پورتالى.
30 مامىر كۇنى مادريد قالاسىندا قازاقستاندىق ءانشى ديماش قۇدايبەرگەننىڭ شىعارماشىلىعى مەن ونىڭ يسپاندىق جانكۇيەرلەر قاۋىمداستىعىنا ارنالعان «Al Compás de Su Voz» اتتى دەرەكتى ءفيلمنىڭ تۇساۋكەسەرى ءوتتى.
جوبا ديماشتىڭ يسپانياداعى فان-كلۋبى مەن La Gran Voz Kazaja قاۋىمداستىعىنىڭ بىرلەسكەن باستاماسىمەن جۇزەگە اسقان. ءفيلمنىڭ رەجيسسەرى – جاس يسپان كينەماتوگرافيسى داۆيد كوليانتەس رودريگەس.
كورسەتىلىم مادريدتەگى Palacio de Hielo كينوتەاترىندا ۇيىمداستىرىلىپ، وعان 130-دان استام كورەرمەن قاتىستى. قوناقتار قاتارىندا قازاقستاننىڭ يسپانياداعى ەلشىلىگىنىڭ وكىلدەرى، ەلشى دانات مۇساەۆ باستاعان ديپلوماتتار، قازاق دياسپوراسىنىڭ مۇشەلەرى، قوعامدىق ۇيىم وكىلدەرى بولدى.
دەرەكتى فيلمدە يسپاندىق Dears قاۋىمداستىعىنىڭ بەس مۇشەسىنىڭ وقيعالارى باياندالادى. ولار ديماش شىعارماشىلىعىمەن العاش تانىسقان ساتتەرى مەن ءانشىنىڭ ونەرىنىڭ ءوز ومىرلەرىنە تيگىزگەن اسەرى تۋرالى اڭگىمەلەيدى.
ءتۇسىرىلىم بارىسىندا رەجيسسەر يسپانيانىڭ بىرنەشە ءوڭىرىن ارالاپ، كەيىپكەرلەرمەن كەزدەسىپ، قازاقستاندىق ءانشىنىڭ حالىقارالىق جانكۇيەرلەر قاۋىمداستىعىنىڭ فەنومەنىن زەرتتەگەن. جوبا اۆتورلارىنىڭ ايتۋىنشا، ءفيلمنىڭ باستى ماقساتى – الەمگە «ديماش قوزعالىسى» قۇبىلىسىن جانە ءارتىستىڭ تىڭدارماندارىنا تيگىزىپ وتىرعان مادەني ءارى ەموتسيالىق ىقپالىن كورسەتۋ.
الداعى ۋاقىتتا فيلم يسپانياداعى ۇلتتىق كينوفەستيۆالدەردە كورسەتىلەدى. فەستيۆالدىك پروكات اياقتالعان سوڭ تۋىندىنى اشىق ونلاين-پلاتفورمالاردا جاريالاۋ جوسپارلانىپ وتىر.
حالىقارالىق كورەرمەندەر ءۇشىن فيلمگە اعىلشىن، قازاق، ورىس جانە قىتاي تىلدەرىندە سۋبتيترلەر ازىرلەنەدى.
