QMDB jaýaby: Jazylǵan jaıt shyndyqqa janaspaıdy

7047
Adyrna.kz Telegram

Qazaqstan musylmandary dinı basqarmasynyń baspasóz qyzmeti  adyrna.kz saıtynda Turarbek Qusaıynovtyń jarııalaǵan «Bas múftıdi destrýktıvti aǵym ókilderi qaýmalap aldy» atty maqalasyna qatysty kelesideı málimdeıdi:

Birinshiden, avtordyń: «Dinbasynyń aınalasy destrýktıvti kúmándi adamdarǵa tolyp ketti» degen sózi eshqandaı shyndyqqa janaspaıdy. Bul – Qazaqstan musylmandary dinı basqarmasyna jáne barsha din qyzmetkerine jabylǵan jala. Osyǵan deıin Dinı basqarma qyzmetkerine, onyń dinı senimi men kózqarasyna qatysty másele bolmaǵan. QMDB janyndaǵy Saraptaý komıssııasynyń baǵalaý synynan ótken tulǵalar ǵana qyzmetke qabyldanady.

Ekinshiden, meshittiń sadaqa jáshigine túsetin qarajattyń esep-qısabyn bir adam júrgizbeıdi. Meshitke túsken qarjyny jumsaý jáne qadaǵalaý jumysyn QMDB jáne meshit janynan qurylǵan arnaıy komıssııa músheleri júrgizedi. Al QMDB janyndaǵy Tekserý komıssııasy dinı saladaǵy qarjylyq ashyqtyqty qamtamasyz etedi. Elordada 2020 jyldyń 7 aqpanynda ótken Qazaqstan musylmandarynyń kezekten tys IH quryltaıynda delegettardyń daýys berýimen Tekserý komıssııasy bekitilgen bolatyn. Komıssııa mindeti – dinı saladaǵy qarjy ashyqtyǵyn qadaǵalap, esep-qısap jumystaryna monıtorıng jasaý.

Úshinshiden, avtor: «2017-2019 jyldary astanadaǵy «Áziret Sultan» meshitinde naıb ımam bolyp júrgen Nurlan Ramazanov ózi sekildi naıb ımam Marat Bektazınovtyń meshitke sheship qoıǵan sý jańa aıaq kıimin urlaımyn dep masqarasy shyqqan» dep jazady. Bul da shyndyqqa janaspaıdy. Imamdar arasynda mundaı «urlyq oqıǵasy» bolmaǵan jáne maqalada aty atalǵan azamattar bul aqparattyń jalǵan ekenin jarııalady.

Tórtinshiden, avtor óz maqalasynda QMDB-nyń bir qyzmetkerin Saýd Arabııasynda oqyǵanyn aıta kele, onyń dinı senimine kúmán keltiredi. Dinı basqarmaǵa qyzmetke qabyldanatyn tulǵalardyń dinı senimine aldyn ala jan-jaqty taldaý jumystary júrgiziletinin jáne Saraptaý komıssııasynyń oń qorytyndysyn alǵan azamattar ǵana Bas múftı buıryǵyna usynylatynyn jetkizemiz.

Maqalada jazylǵan jalǵan aqparattar men Dinı basqarma, din qyzmetkeriniń bedeline nuqsan keltirilgen málimetterdi teriske shyǵarýdy talap etemiz jáne bul isti avtordyń ary men namysyna qaldyramyz...             

Qazaqstan musylmandary dinı basqarmasynyń

baspasóz qyzmeti

Pikirler