قمدب جاۋابى: جازىلعان جايت شىندىققا جاناسپايدى

4520

قازاقستان مۇسىلماندارى ءدىني باسقارماسىنىڭ ءباسپاسوز قىزمەتى  adyrna.kz سايتىندا تۇراربەك قۇسايىنوۆتىڭ جاريالاعان «باس ءمۇفتيدى دەسترۋكتيۆتى اعىم وكىلدەرى قاۋمالاپ الدى» اتتى ماقالاسىنا قاتىستى كەلەسىدەي مالىمدەيدى:

بىرىنشىدەن، اۆتوردىڭ: «ءدىنباسىنىڭ اينالاسى دەسترۋكتيۆتى كۇماندى ادامدارعا تولىپ كەتتى» دەگەن ءسوزى ەشقانداي شىندىققا جاناسپايدى. بۇل – قازاقستان مۇسىلماندارى ءدىني باسقارماسىنا جانە بارشا ءدىن قىزمەتكەرىنە جابىلعان جالا. وسىعان دەيىن ءدىني باسقارما قىزمەتكەرىنە، ونىڭ ءدىني سەنىمى مەن كوزقاراسىنا قاتىستى ماسەلە بولماعان. قمدب جانىنداعى ساراپتاۋ كوميسسياسىنىڭ باعالاۋ سىنىنان وتكەن تۇلعالار عانا قىزمەتكە قابىلدانادى.

ەكىنشىدەن، مەشىتتىڭ ساداقا جاشىگىنە تۇسەتىن قاراجاتتىڭ ەسەپ-قيسابىن ءبىر ادام جۇرگىزبەيدى. مەشىتكە تۇسكەن قارجىنى جۇمساۋ جانە قاداعالاۋ جۇمىسىن قمدب جانە مەشىت جانىنان قۇرىلعان ارنايى كوميسسيا مۇشەلەرى جۇرگىزەدى. ال قمدب جانىنداعى تەكسەرۋ كوميسسياسى ءدىني سالاداعى قارجىلىق اشىقتىقتى قامتاماسىز ەتەدى. ەلوردادا 2020 جىلدىڭ 7 اقپانىندا وتكەن قازاقستان مۇسىلماندارىنىڭ كەزەكتەن تىس ءىح قۇرىلتايىندا دەلەگەتتاردىڭ داۋىس بەرۋىمەن تەكسەرۋ كوميسسياسى بەكىتىلگەن بولاتىن. كوميسسيا مىندەتى – ءدىني سالاداعى قارجى اشىقتىعىن قاداعالاپ، ەسەپ-قيساپ جۇمىستارىنا مونيتورينگ جاساۋ.

ۇشىنشىدەن، اۆتور: «2017-2019 جىلدارى استاناداعى «ازىرەت سۇلتان» مەشىتىندە نايب يمام بولىپ جۇرگەن نۇرلان رامازانوۆ ءوزى سەكىلدى نايب يمام مارات بەكتازينوۆتىڭ مەشىتكە شەشىپ قويعان سۋ جاڭا اياق كيىمىن ۇرلايمىن دەپ ماسقاراسى شىققان» دەپ جازادى. بۇل دا شىندىققا جاناسپايدى. يمامدار اراسىندا مۇنداي «ۇرلىق وقيعاسى» بولماعان جانە ماقالادا اتى اتالعان ازاماتتار بۇل اقپاراتتىڭ جالعان ەكەنىن جاريالادى.

تورتىنشىدەن، اۆتور ءوز ماقالاسىندا قمدب-نىڭ ءبىر قىزمەتكەرىن ساۋد ارابياسىندا وقىعانىن ايتا كەلە، ونىڭ ءدىني سەنىمىنە كۇمان كەلتىرەدى. ءدىني باسقارماعا قىزمەتكە قابىلداناتىن تۇلعالاردىڭ ءدىني سەنىمىنە الدىن الا جان-جاقتى تالداۋ جۇمىستارى جۇرگىزىلەتىنىن جانە ساراپتاۋ كوميسسياسىنىڭ وڭ قورىتىندىسىن العان ازاماتتار عانا باس ءمۇفتي بۇيرىعىنا ۇسىنىلاتىنىن جەتكىزەمىز.

ماقالادا جازىلعان جالعان اقپاراتتار مەن ءدىني باسقارما، ءدىن قىزمەتكەرىنىڭ بەدەلىنە نۇقسان كەلتىرىلگەن مالىمەتتەردى تەرىسكە شىعارۋدى تالاپ ەتەمىز جانە بۇل ءىستى اۆتوردىڭ ارى مەن نامىسىنا قالدىرامىز...             

قازاقستان مۇسىلماندارى ءدىني باسقارماسىنىڭ

ءباسپاسوز قىزمەتى

پىكىرلەر
ۇقساس جاڭالىقتار