Jýrnalıst Nurgeldi Ábdiǵanı qoǵamdaǵy tosyn qubylysty sóz etip, oqyrman qaýymnyń nazaryn aýdardy. Avtor tık-tok áleýmettik jelisiniń tikeleı tolqynyna tún jarymynda qosylyp, úlkendi-kishilige, jastarǵa ulttyq dástúrimizge, tálim-tárbıemizge qarsy úgit aıtatyn adamdardyń kóbeıgenin baıqaǵan, dep habarlaıdy "Adyrna" ulttyq portaly.
- Din degen óte názik taqyryp qoı. Bireýdiń kóńiline, bireýdiń senimine sóz tıip ketedi dep tartynshaqtaımyz. Dese de, búgin qysqa ǵana bir oıdy ortaǵa salmaqpyn. Tık-Tok degen jeli qazir jurt kóp bas suǵatyn alańǵa aınaldy. Jasy da, kárisi de sonda. Keshe Toqaevqa da maqtap júrgen osy Tık-Tok. Biz de barmyz sonda. Sońǵy ýaqyttary qara jamylǵan qatyn-qalashtyń tikeleı efırleri lentamda jıi shyǵyp júrgen. Mán bermedim. Ondaǵy kókı-sókı qoqystyń barlyǵyn qarap, barlyǵyna sóz shyǵaryp, pikir jazyp otyratyn ýaqyt qaıda?.. - dep jazdy jýrnalıst.
Keıinnen avtor tumshalanyp alyp, qazaqy tárbıege, ulttyq salt-sanaǵa qarsy "kertolǵaý" aıtatyndardyń sózin, is-áreketin saralady.
- Jańaǵy qaraly qatyndardyń bireýi bir shyqty, ekinshisi eki shyqty. Sodan álginde erinbeı bireýiniń áńgimesin tyńdap shyqtym. Áýeli, jańaǵylaryńyz sóz sheshen, aıtarǵa aǵylyp turǵan sózmerler de emes. Eki sózdiń basyn qurap sóıleı almaıtyn ejikter. Myńq-myńq etip, árneni bir áńgime qylyp, saǵattap otyrdy. Jarty saǵattan soń, qolymdy biraq siltep, shyǵyp kettim. Sosyn, bular kóbine-kóp túngi ýaqyttarda efırge shyǵady eken. Tún degende de, eki, úshter shamasynda. Tipti, bireýin tórttiń shamasynda kórip qaldym. Aıtatyn áńgimeleri arabı termınderdi qoldana otyryp, ulttyq tárbıege qaıshy, qazaqy tanym-túsinikke jat áńgimeler. Onyń aldynda bireýi: "Áke-shesheń oramalyńa, namazyńa qarsy bolsa, onyń pikirin eleme. Qarsy shyq", - degen maǵynada birdeńelerdi aıtyp otyrǵan. Ony skırndep almappyn. Mynalary da ońyp turǵany shamaly- dedi buǵan qatysty.
Cóz sońynda Nurgeldi Ábdiǵanı kóńilindegi kóp suraqty oqyrman qaýymǵa jetkizdi. Qoldanýshylar ashyq, búkpesiz, óz yńǵaıy men shama-sharqyna, bilim men túsinik deńgeıine qaraı kontent jarııalaıtyn tık-tok jelisindegi tosyn qubylysqa toqtaý bolýy qajettigin qadap aıtty.
"Mendegi suraq: Osylardy bireý-mireý baqylap, aıtqandaryn ańdyp qarap, ne istep, ne qoıyp júrgenderin tekserip jatyr ma? Ulttyq qaýipsizdikke jaýaptylar aınalysýy tıis sharýa ǵoı! Bulardyń efırlerine kontent-analız jasaý kerek! Olardyń túngi ýaqyttarda oıanatynyn da qaperge alý kerek? Nege ol ýaqyttar? Qysqasy qazir jelilerde túngi ýaqyttardy qara kıimdi qatyndar (bálkim qyzdar shyǵar) jaýlap jatyr", - dep oıyn túıindedi ol.
"Adyrna" ulttyq portaly
