Dıssertaııalyq zertteý jumysyma materıal jınaý úshin shilde-tamyz aılarynda Túrkistan oblysynyń Shardara, Jetisaı, Maqtaral, Otyrar aýdandaryn, Qyzylorda oblysynyń Jańaqorǵan, Shıeli, Tereńózek, Jalaǵash aýdandaryn araladym. Qazirgi tańda aýyl sharýashylyǵyn damytaıyq desek, eń aldymen, sý máselesin júıeli túrde zerttep, sheshý kerek.
Sonaý erte zamannan órkenıettiń oshaǵy bolǵan Syr boıynyń jaǵdaıy qıyn búginde apattyń aldynda tur deýge bolady. Qazir sheshpese jaǵdaı budan ári ýshyǵa bermek. Syrdarııanyń Túrkistan oblysy jaǵynda sýdyń kólemi jetkilikti bolǵanymen, sýdyń jaǵasynda turyp eginge sý jetkize almaıtyn aýyldar bar eken. Mysaly, Shardaranyń mańyndaǵy Jaýshyqum aýyldyq okrýgynyń egistik jerlerine sý jetkizý qıynnyń qıyny. Sebebi Syrdyń oń jaǵalaýy bıik bolǵandyqtan sý shyqpaıdy. Aýyl halqy eski motormen ildebaılap sý shyǵaryp, egin egip jatyr.
Keńes úkimeti kezinde úlken motorlarmen sý aıdaǵan. Mundaı másele bolmaǵan. Sharýalar irgesinde aǵyp jatqan sýdyń rahatyn kóre almaýda. Nege aýyl sharýashylyǵy ónimderiniń qymbat bolýy, eń aldymen, egin sharýashylyǵyn durys sýmen qamtamasyz ete almaı jatqanymyzda. Al, Shardara aýdanyndaǵy Syrdarııanyń sol jaǵalaýy Qyzylqum, Shardara magıstraldy kanaldary arqyly sýǵarylady. Egin sýsyz qalmaǵanymen, bul betinde de sý jetispeýshiligi baıqalady.
Nurlybek DOSYMBETOV,
"Adyrna" ulttyq portaly
