"Habar" agenttıgınıŋ basşysy Kemelbek Oişybaev "Bıraq" baǧdarlamasynyŋ tūrmystyq zorlyq-zombylyq turaly şyǧarylymyna qatysty tuyndaǧan rezonansqa jauap berdı, dep habarlaidy "Adyrna" ūlttyq portaly.
Kemelbek Oişybaev baǧdarlamanyŋ atalmyş jaǧdaiyn "şalys basqan qadam" dep atady:
"Bızdıŋ arnadaǧy jaŋadan efirge şyǧa bastaǧan «Bıraq...» äleumettık tok-şouyna qatysty türlı pıkır jazylyp jatyr. TV-daǧy aitylǧan mäselege köŋıl bölıp, pıkırlerde jazyp jatqan uäjderıŋız nazarymyzdan tys qalyp jatqan joq. Qaldyrǧan pıkırlerdıŋ ışınde baǧdarlamanyŋ jürgızuşılerın, avtorlaryn ızdep, bıraz sūraq tuyndatqan eken. «Bıraq...» baǧdarlamasynyŋ efirge şyqqanyna 2 kün ǧana boldy. Jobanyŋ basty maqsaty – qoǧamdy alaŋdatyp otyrǧan äleumettık mäseleler, otbasylyq qūndylyqtar jäne basqa özektı mäselelerdı kötere otyryp, spikerler, psihologtar, zaŋgerler men basqa da sala mamandarymen bırlesıp, talqylau jäne şeşu joldaryn ızdeu. Būl taqyrypty qozǧap, naq osy keiıpkerlermen baǧdarlama jasau arqyly qoǧamdy dürlıktırıp, virustyq kontentke ainaldyru nietınen aulaqpyz" dep jazdy ol.
Jaǧdaiǧa qatysty baǧdarlama ūjymy qatysqan keiıpkerlerden de, körermennen de keşırım sūrady:
"Keşegı efirde bır otbasynyŋ mäselesı tıkelei efirde körsetıldı. Oryn alǧan jaǧdai ärqily pıkırler legın tuyndatty. Osy oqiǧa aiasynda tıptı qoǧamnyŋ kökeiınde jürgen özge saualdar äleumettık jelıler keŋıstıgıne aǧylǧanyn mūqiiat oqyǧan adam baiqar. “Bıraq”-tyŋ şalys basqan qadamy älı tüzeledı. Redaksiiaǧa osyndai dereu qoǧamdyq talqy, qoldau da maŋyzdy. Däl bügın qatysqan keiıpkerlerden de, körermennen de sūraǧan keşırımımızdı qabyl alyŋyzdar. Öz aldyna qonaǧymyz bolyp kelgen Gülmira Smailova men “Qorǧau-Astana” krizistık ortalyǧynyŋ ūjymynan jeke keşırım sūraimyz" dep jazdy Kemelbek Oişybaev.
Esterıŋızge sala keteiık, qoǧam "Habar" telearnasynda tıkelei efirde körsetılgen "Bıraq" baǧdarlamasynyŋ şyǧarylymyna narazylyq tanytqan edı. Tūrmystyq zorlyq-zombylyqtyŋ qūrbany bolǧan äieldı küieuımen tatulastyrmaq bolǧan baǧdarlama ülken şuǧa ainalǧanyn jazǧan edık.
Ūqsas jaŋalyqtar
