Qazaqstan Prezıdenti Ulttyq bank qyzmetiniń qorytyndylary jóninde keńes ótkizdi. Jıyn barysynda Memleket basshysyna Ulttyq banktiń 2017 jylǵy atqarǵan jumystary jóninde esep berilip, elimizdiń qarjy sektorynyń damý perspektıvalary baıandaldy.
Elbasy makroekonomıkalyq kórsetkishterdiń jaqsarǵanyn jáne ınflıaııanyń belgilengen mejeden aspaǵanyn atap ótip, bank júıesine memlekettiń qoldaý kórsetip jatqanyna, sondaı-aq retteýshi tarapynan qarjy ınstıtýttarynyń qyzmetin qadaǵalaýdy kúsheıtý qajettigine nazar aýdardy.
"Memleket 3 trıllıon teńgeden astam qarajat bólip, bank júıesine buryn-sońdy bolmaǵan qoldaý kórsetti. Bul rette, bankter tarapynan berilgen nesıeniń kólemi artpaı, 2017 jyldyń sońynda 12,7 trıllıon teńgeni quraǵan. "Jumys istemeıtin" nesıeniń úlesi - 10 paıyz. Bıyl kórsetkishteri óte nashar bankterdi saýyqtyrý jónindegi Ulttyq bank baǵdarlamasy toqtatylady. Akıonerleri durys basqara almaǵandyqtan bul bankter qaryzǵa batyp, salymshylar aldynda óz mindettemelerin oryndaı almady. Sol sebepti kórsetkishteri nashar boldy. Bul jaǵdaıdan qalaı shyǵýǵa bolady? Bul bankterdi saqtap qalý úshin akıonerler ózderiniń jeke qarajatyn quıyp, kezinde olardan shyǵaryp alǵan qarjyny qaıtarýǵa tıis", - dedi Memleket basshysy.
Nursultan Nazarbaev Qazaqstan halqyna arnaǵan joldaýynda jáne "Bes áleýmettik bastamasynda" kórsetilgen qarjy sektoryn qaıta jańǵyrtý jónindegi sharalarǵa toqtaldy.
"Búginde ekonomıkany uzaq merzimdi nesıemen qamtamasyz etý máselesi sheshimin tappaı otyr. Qor naryǵyn jandandyrý kerek, sondaı-aq bank júıesinde týyndaǵan jaǵdaılardy ýaqtyly baǵamdap, tıimdi áreket etý qajet. Búgin Parlamentte talqylanyp jatqan valıýtalyq retteý týraly zańǵa engiziletin ózgeristerdiń qabyldanýyna baılanysty "7-20-25" baǵdarlamasy aıasynda atqarylatyn jumysty bıyl bastaý kerek. Men qos palata depýtattarynan bul máseleni osy sessııasynyń sońyna deıin tezdetip qarastyrýdy suraımyn. Bul árbir azamatymyzǵa arnalǵan meniń "Bes áleýmettik bastamamdy" iske asyrý úshin mańyzdy", - dedi Memleket basshysy.
Danııar Aqyshev 2017 jyly Ulttyq banktiń qyzmeti naryqtaǵy baǵalardyń turaqtylyǵyn qamtamasyz etýge jáne bank sektorynyń jumysyn bir qalypqa keltirýge baǵyttalǵanyn atap ótti.
"Qarjy naryǵyndaǵy jaǵdaı qalypty. Makroekonomıkalyq kórsetkishter men qarjy sektorynyń damý ındıkatorlary turaqty túrde jaqsaryp keledi. 2018 jyly ınflıaııa 5-7 paıyz shamasynda bolady dep oılaımyz. Bıylǵy aqpan aıynyń sońyndaǵy jaǵdaıǵa sáıkes, zańdy tulǵalarǵa teńgemen beriletin nesıe stavkasy 12,9 paıyzǵa deıin tómendedi", - dedi Ulttyq bank tóraǵasy.
Budan bólek, Danııar Aqyshev teńgeniń aıyrbas baǵamyndaǵy ahýal men oǵan yqpal etken ishki jáne syrtqy faktorlarǵa túsinik berdi.
"Ótken aptada jekelegen reseılik kompanııalar men tulǵalarǵa qatysty AQSh-tyń ekonomıkalyq sankııalaryn keńeıtýine baılanysty oqıǵalar boldy. Tıisinshe Reseıdiń qor jáne valıýta naryǵynda belgili bir ózgerister oryn aldy. Árıne, olar Qazaqstannyń da valıýta naryǵyna áser etti jáne bul erkin baǵam jaǵdaıynda qalypty nárse sanalady. Biraq buǵan degen naryqtyń áseri týra proporıonaldy bolǵan joq. Eger rýbl baǵamy 10 paıyzdan astam quldyrasa, teńge nomınaldy túrde aıtsaq, 3 paıyzǵa ǵana tómendedi", - dedi Ulttyq bank tóraǵasy.
Jıyn sońynda Memleket basshysy Ulttyq bank jumysynyń jaqsara túskenin atap ótip, birqatar naqty tapsyrma berdi.
_______________________________________________________________________________________________________
Tengrinews.kz
