"حابار" اگەنتتىگىنىڭ باسشىسى كەمەلبەك ويشىباەۆ "بىراق" باعدارلاماسىنىڭ تۇرمىستىق زورلىق-زومبىلىق تۋرالى شىعارىلىمىنا قاتىستى تۋىنداعان رەزونانسقا جاۋاپ بەردى، دەپ حابارلايدى "ادىرنا" ۇلتتىق پورتالى.
كەمەلبەك ويشىباەۆ باعدارلامانىڭ اتالمىش جاعدايىن "شالىس باسقان قادام" دەپ اتادى:
ء"بىزدىڭ ارناداعى جاڭادان ەفيرگە شىعا باستاعان «بىراق...» الەۋمەتتىك توك-شوۋىنا قاتىستى ءتۇرلى پىكىر جازىلىپ جاتىر. تۆ-داعى ايتىلعان ماسەلەگە كوڭىل ءبولىپ، پىكىرلەردە جازىپ جاتقان ۋاجدەرىڭىز نازارىمىزدان تىس قالىپ جاتقان جوق. قالدىرعان پىكىرلەردىڭ ىشىندە باعدارلامانىڭ جۇرگىزۋشىلەرىن، اۆتورلارىن ىزدەپ، ءبىراز سۇراق تۋىنداتقان ەكەن. «بىراق...» باعدارلاماسىنىڭ ەفيرگە شىققانىنا 2 كۇن عانا بولدى. جوبانىڭ باستى ماقساتى – قوعامدى الاڭداتىپ وتىرعان الەۋمەتتىك ماسەلەلەر، وتباسىلىق قۇندىلىقتار جانە باسقا وزەكتى ماسەلەلەردى كوتەرە وتىرىپ، سپيكەرلەر، پسيحولوگتار، زاڭگەرلەر مەن باسقا دا سالا ماماندارىمەن بىرلەسىپ، تالقىلاۋ جانە شەشۋ جولدارىن ىزدەۋ. بۇل تاقىرىپتى قوزعاپ، ناق وسى كەيىپكەرلەرمەن باعدارلاما جاساۋ ارقىلى قوعامدى دۇرلىكتىرىپ، ۆيرۋستىق كونتەنتكە اينالدىرۋ نيەتىنەن اۋلاقپىز" دەپ جازدى ول.
جاعدايعا قاتىستى باعدارلاما ۇجىمى قاتىسقان كەيىپكەرلەردەن دە، كورەرمەننەن دە كەشىرىم سۇرادى:
"كەشەگى ەفيردە ءبىر وتباسىنىڭ ماسەلەسى تىكەلەي ەفيردە كورسەتىلدى. ورىن العان جاعداي ارقيلى پىكىرلەر لەگىن تۋىنداتتى. وسى وقيعا اياسىندا ءتىپتى قوعامنىڭ كوكەيىندە جۇرگەن وزگە ساۋالدار الەۋمەتتىك جەلىلەر كەڭىستىگىنە اعىلعانىن مۇقيات وقىعان ادام بايقار. “بىراق”-تىڭ شالىس باسقان قادامى ءالى تۇزەلەدى. رەداكتسياعا وسىنداي دەرەۋ قوعامدىق تالقى، قولداۋ دا ماڭىزدى. ءدال بۇگىن قاتىسقان كەيىپكەرلەردەن دە، كورەرمەننەن دە سۇراعان كەشىرىمىمىزدى قابىل الىڭىزدار. ءوز الدىنا قوناعىمىز بولىپ كەلگەن گۇلميرا سمايلوۆا مەن “قورعاۋ-استانا” كريزيستىك ورتالىعىنىڭ ۇجىمىنان جەكە كەشىرىم سۇرايمىز" دەپ جازدى كەمەلبەك ويشىباەۆ.
ەستەرىڭىزگە سالا كەتەيىك، قوعام "حابار" تەلەارناسىندا تىكەلەي ەفيردە كورسەتىلگەن "بىراق" باعدارلاماسىنىڭ شىعارىلىمىنا نارازىلىق تانىتقان ەدى. تۇرمىستىق زورلىق-زومبىلىقتىڭ قۇربانى بولعان ايەلدى كۇيەۋىمەن تاتۋلاستىرماق بولعان باعدارلاما ۇلكەن شۋعا اينالعانىن جازعان ەدىك.
