ۆيكتور كيانيتسا... تانىمال جۋرناليست. قولتاڭباسى بولەك پۋبليتسيست. «كومسومولسكايا پراۆدا كازاحستان» باسىلىمىنىڭ باسشىسى. جىگەرلى جەتەكشى.
قىرىق جىل بۇرىن كازگۋ-گە بىرگە تۇستىك. تۇگەلگە دەرلىك باس قالادا تۇراتىن ورىس توبىنداعى وركەۋدە جىگىتتەردىڭ ىشىندەگى ەڭ قاراپايىمى سول ەدى. ول كەيىن ماسكەۋگە اۋىسىپ كەتتى. مگۋ-ءدى ءبىتىردى. وقۋىن تاۋىسقان سوڭ سول كەزدە دۇنيەنى دۇرىلدەتىپ تۇرعان «كومسومولسكايا پراۆدادا» قىزمەت ىستەدى. ماسكەۋگە جولىمىز تۇسكەندە ءجيى جولىعىپ تۇراتىنبىز. وندا تۇراقتاپ قالماي، ەلىمىزگە قايتىپ كەلدى. ماسكەۋ جاقتى بەتكە العانداردىڭ كوشتى كەرى بۇرعانىن كورمەپ ەدىك... سودان بەرى تابان اۋدارماي اقپارات سالاسىندا ۇزاق جىل تەر توكتى. قازاق جۋرناليستەرىنە جاقىن ءجۇردى. ولاردىڭ دا ۆيكتورعا دەگەن ىقىلاسى بولەك-ءتى...
تالاي رەت جولىمىز توعىستى. ۆيتيامەن بىرگە ءبىز قايدا بارمادىق؟! مۇحيت استىق، تەڭىز كەشتىك. جەر-جەردى شارلادىق. تاۋ-تاستى كەزدىك. سوندا بايقادىق. ساپارلاس بولۋعا تاپتىرمايتىن سەنىمدى سەرىك. جايىڭدى ويلايدى، جانىڭدى ۇعادى. مي قىرتىسىنا دەيىن مادەنيەت قونعان جىگىت ەدى.
بۇگىن ومىردەن ءوتتى... ىندەت ىرگەدەن تاپ بەرىپتى. كىم ويلاعان؟.. قوش بول، ۆيكتور! سودان ەسكى البومدى اقتارىپ...
باۋىرجان ومارۇلى،
"ادىرنا" ۇلتتىق پورتالى
