موڭعول ءتىلى تۋرالى زاڭعا سايكەس، 2025 جىلدىڭ 2 قاڭتارىنان باستاپ رەسمي مەملەكەتتىك قۇجاتتاردا كيريلليتسا دا، ءداستۇرلى موڭعول جازۋى دا قولدانىلادى. بۇل تۋرالى موڭعولدىق مونتسامە اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
“موڭعول ءتىلىنىڭ وسى زاڭىنىڭ 7.2-بابىنىڭ 11.1.2. تارماعىندا مەملەكەتتىك ورگاندار مەن جەرگىلىكتى باسقارۋ ورگاندارىنىڭ رەسمي قۇجاتتاردى ۇلتتىق جازۋمەن قاتار كيريلليتسادا جۇرگىزۋ مىندەتى كوزدەلگەن. بۇل ۇلتتىق جازۋ باعدارلاماسىن كەزەڭ-كەزەڭىمەن جۇزەگە اسىرۋ جانە تيىسىنشە ءبىلىم بەرۋ جۇيەسىن قامتاماسىز ەتۋ نەگىزىندە ىسكە اسىرىلادى. 24.2-باپتىڭ 7.2-تارماعى 2025 جىلدىڭ 1 قاڭتارىنان باستاپ كۇشىنە ەنەدى”، دەلىنگەن قۇجاتتا.
ءبىلىم بەرۋ ۇيىمدارى وسى زاڭنىڭ تالاپتارىن ورىنداۋدا باستى ءرول اتقارادى.
2021 جىلى وتكىزىلگەن ۇلتتىق ساۋالناماعا مەملەكەتتىك قىزمەتكەرلەردىڭ 150 مىڭعا جۋىق وكىلى قاتىسقان .
ساۋالناما ناتيجەلەرى كورسەتكەندەي، مەملەكەتتىك قىزمەتكەرلەردىڭ 50 پايىزدان استامى رەسمي قۇجاتتاردا كيريلليتسانى ءداستۇرلى موڭعول جازۋىمەن قاتار قولدانۋعا دايىن ەكەنىن بىلدىرگەن، ال قالعان 46,4 پايىزى قارسى ەكەنىن ايتقان.
ەل بويىنشا ورتاشا كورسەتكىشتەرمەن جانە باسقا ايماقتارمەن سالىستىرعاندا، گوۆ-التاي ايماعىنىڭ مەملەكەتتىك قىزمەتكەرلەرىنىڭ 74,7 پايىزى ءوز جۇمىستارىندا موڭعول جازۋىن پايدالانۋعا دايىن ەكەندەرىن بىلدىرگەن، بۇل ەڭ جوعارى كورسەتكىش بولدى.
سونداي-اق، 200 مىڭ مەملەكەتتىك قىزمەتكەرلەردىڭ اراسىندا 69 مىڭ 400 قىزمەتكەر نەمەسە 53,6 پايىزى مەكتەپتىڭ ءبىرىنشى سىنىبىنان باستاپ موڭعول جازۋىن ۇيرەنگەن.
