اۋا رايىنىڭ كۇرت سۋىتۋى مەن قۇرعاقشىلىق اۋعانستانداعى ازىق-تۇلىك داعدارىسىن ۇلعايتا تۇسۋدە، دەپ ەسكەرتتى بۇۇ ساراپشىلارى ۆۆس-گە بەرگەن سۇحباتىندا. بۇل تۋرالى "ادىرنا" سايتى حابارلايدى.
دۇنيەجۇزىلىك ازىق-تۇلىك باعدارلاماسىنىڭ (WFP) اتقارۋشى ديرەكتورى دەۆيد بيسلي 7 قاراشاداعى كابۋلعا بارعان ساپارىنان كەيىن: «اۋعاندىقتاردىڭ 95 پايىزى ءوز-وزدەرىن تاماقپەن قامتاماسىز ەتە المايدى جانە ءبىز ولاردىڭ بارلىعىنىڭ اشتىققا ۇشىراعانىن كورىپ وتىرمىز»، - دەدى. اۋعانستانداعى كەلەسى التى اي جەر بەتىندەگى توزاققا اينالادى»، - دەدى.
دۇنيەجۇزىلىك ازىق-تۇلىك باعدارلاماسىنىڭ ساراپشىلارى بىرنەشە اي بويى حالىقارالىق قاۋىمداستىقتى اۋعانستانعا كومەك كورسەتۋدى قايتا باستاۋعا شاقىرىپ كەلەدى. تاليبان بيلىكتى باسىپ العانعا دەيىن ەلگە ءدارى-دارمەك پەن ازىق-تۇلىك جەتكىزىلگەن. بىراق ەسكى رەجيمنىڭ قۇلاۋىمەن بىرگە قولداۋ دا جوعالىپ كەتتى.
باتىس ەلدەرى قىزداردىڭ ءبىلىم الۋىنا تىيىم سالاتىن جانە شاريعاتتى بۇزعانى ءۇشىن قاتاڭ جازالاردى قالپىنا كەلتىرەتىن «تاليبان» قوزعالىسىمەن بايلانىسقىسى كەلمەيدى، دەپ جازادى ۆۆس.
كابۋلدان 50 شاقىرىم جەردەگى ۆارداك پروۆينتسياسىندا بىرنەشە ءجۇز ادام ۇن الامىز دەگەن ۇمىتپەن كەزەككە تۇردى. بۇل بۇۇ-نىڭ دۇنيەجۇزىلىك ازىق-تۇلىك باعدارلاماسىنىڭ كومەگىنىڭ قالعان قۇتقانى ەدى.
كەزەكتە تۇرعان اۋعان قارت: «قىس باستالدى دەي بەرەلىك»، - دەيدى. «ەگەر نان پىسىرەتىن ەشتەڭە بولماسا، مەن قاقاعان قىستان اقالاي امان شىعاتىنىمدى بىلمەيمىن» دەدى ول.
اۋعانستاننىڭ ورتالىعىنداعى باميان قالاسىندا ءۇش پەن 16 جاس ارالىعىنداعى جەتى بالاسىمەن جالعىز تۇراتىن جەسىر ايەل فاتەما دا تاماقتى قايدان الارىن بىلمەيدى. كۇيەۋى قاتەرلى ىسىك اۋرۋىنان قايتىس بولدى. بۇرىن فاتەما كورشى شارۋانىڭ جەرىن ارام شوپتەن جۇلىپ اقشا تاباتىن. بىراق قۇرعاقشىلىق وعان اقشا تابۋعا مۇمكىندىك بەرمەدى.
«مەن قورقامىن، بالالارىمدى تاماقتاندىراتىن ەشتەڭەم جوق»، - دەيدى فاتەما. «جاقىندا مەنىڭ قايىر سۇراۋىما تۋرا كەلەتىن سەكىلدى».
كەيبىر اۋعاندىقتار اقشا الۋ ءۇشىن قىزدارىن ساتىپ جىبەردى. فاتەما بۇل ويدان باس تارتتى.
دەۆيد بيسلي حالىقارالىق قاۋىمداستىقتى جازىقسىز ادامداردىڭ ولىمىنە جول بەرمەۋگە شاقىرادى:
«ءبىز جاس بالالاردىڭ اشتىقتان ولۋىنە كوز جۇما قاراۋدامىز. بۇل سۇمدىق. بۇل بالالاردىڭ قايدا ەكەنى بىزگە ماڭىزدى بولماۋى ءتيىس، ەڭ باستىسى كومەك».
2021 جىلدىڭ تامىزىندا حالىقارالىق كواليتسيا اسكەرلەرى اۋعانستاننان شىعارىلعاننان كەيىن تاليبان سودىرلارى ەلدەگى بيلىكتى باسىپ الدى. ولار ايەلدەردىڭ ءبىلىم الۋىنا تىيىم سالىپ، كوپشىلىك الدىندا جازالاۋدى، سونىڭ ىشىندە ۇرلىق جاساعاندار ءۇشىن اياق-قولىن كەسۋدى قايتا باستادى. تاليبان رەجيمىن الەمنىڭ ەشبىر مەملەكەتى رەسمي تۇردە مويىنداعان جوق.
"ادىرنا" ۇلتتىق پورتالى
