بۇۇ-نىڭ باس اسسامبلەياسى مەملەكەتتەردىڭ ءبىر-بىرىنە قاتىستى شىنايى اۋماعىن دالىرەك كورسەتەتىن جاڭا الەم كارتاسىنا قاتىستى قارار قابىلدادى، دەپ حابارلايدى «ادىرنا» ءتىلشىسى.
نيۋ-يوركتەگى شتاب-پاتەردە وتكەن وتىرىستا بۇۇ باس اسسامبلەياسى XVI عاسىردان بەرى قولدانىلىپ كەلگەن مەركاتور پروەكتسياسىنان رەسمي تۇردە باس تارتىپ، 2018 جىلى ازىرلەنگەن ءارى دالىرەك سانالاتىن Equal Earth پروەكتسياسىن قولداعان. قاراردى 164 مەملەكەت قولداپ داۋىس بەرگەن، ولاردىڭ قاتارىندا قازاقستان دا بار. اقش قارسىلىق تانىتسا، ەستونيا، گرۋزيا، ليتۆا، مولدوۆا، سەربيا جانە ۋكراينا قالىس قالعان.
قازىرگى ءبىلىم بەرۋ ماتەريالدارىنىڭ، ناۆيگاتسيالىق جۇيەلەردىڭ جانە تسيفرلىق سەرۆيستەردىڭ باسىم بولىگىندە تاريحي ستاندارت رەتىندە فلامانديالىق كارتوگراف گەرارد مەركاتوردىڭ 1569 جىلى ازىرلەگەن پروەكتسياسى قولدانىلىپ كەلدى. باستاپقىدا ول تەك تەڭىزدە باعدار الۋ ءۇشىن جاسالعان، سەبەبى كارتاداعى ءتۇزۋ سىزىقتار كومپاستىڭ تۇراقتى باعىتتارىنا سايكەس كەلەدى. الايدا جەردىڭ شار ءتارىزدى بەتىن جازىقتىققا ءتۇسىرۋ ماتەماتيكالىق تۇرعىدان بەلگىلى ءبىر اۋىتقۋلاردى قاجەت ەتەدى. مەركاتور پروەكتسياسىندا ەكۆاتورعا جاقىن ورنالاسقان اۋماقتار كوزبەن قاراعاندا كىشىرەيىپ، پوليۋستەرگە جاقىن ايماقتار كولەمىنەن الدەقايدا ۇلكەن بولىپ كورىنەدى. وسى وپتيكالىق اسەردىڭ سالدارىنان كارتادا گرەنلانديا افريكامەن شامالاس كولەمدە بەينەلەنەدى. ال ناقتى گەوگرافيالىق دەرەكتەر بويىنشا افريكا قۇرلىعىنىڭ اۋماعى گرەنلانديادان شامامەن 14 ەسە ۇلكەن.
قابىلدانعان قۇجاتتىڭ ۇسىنىمدىق سيپاتى بار. ول مەركاتور پروەكتسياسىن قولدانۋعا تىكەلەي تىيىم سالمايدى، الايدا مەملەكەتتىك ورگانداردى، ءبىلىم بەرۋ مەكەمەلەرىن جانە تەحنولوگيالىق كومپانيالاردى بالاما كارتالاردى ەنگىزۋگە شاقىرادى. جاڭا ستاندارت رەتىندە Equal Earth («تەڭ جەر») پروەكتسياسى ۇسىنىلدى. ونى حالىقارالىق كارتوگرافتار توبى 2018 جىلى ازىرلەگەن. بۇل جوبا پلانەتاداعى بارلىق وڭىرلەردىڭ اۋماعىن شىنايى اراقاتىناستا كورسەتەدى.
جوبانى بۇۇ-دا تانىستىرعان اۆتورلار بىرنەشە عاسىر بويى اۋماعى پروپورتسيونالدى كورسەتىلمەيتىن كارتالاردىڭ قولدانىلۋى افريكانىڭ ناقتى كولەمىن قابىلداۋدى بۇرمالاعانىن اتاپ ءوتتى. قاراردىڭ نەگىزگى ماقساتى — الەمدىك كارتوگرافياعا جاڭا عىلىمي ستاندارتتاردى ەنگىزۋ.
بىرقاتار مەملەكەت ىشكى نورماتيۆتەرىن قايتا قاراۋعا كىرىسىپ تە كەتكەن. اتاپ ايتقاندا، فرانتسيا سىرتقى ىستەر مينيسترلىگى مەركاتور پروەكتسياسىنان بىرتىندەپ باس تارتىپ، قۇرلىقتاردىڭ ناقتى اۋماعىن ءدال كورسەتەتىن كارتالارعا كوشۋدى جوسپارلاپ وتىرعانىن مالىمدەگەن بولاتىن.
